Atos 3

Apetulo atenda kunnamia nangwabha

1 Lichobha limo, chaa ticha kimuho, Apetulo na Ayohana bhakibhanga bhatendakujaulanga ku Nyuumba ja Annoongo, muda gwa kwaajopa Annoongo. 2 Wakati hogwe bhandu bhakibhanga bhampapitinge mundu jumo nangwabha chibhelekwa. Bhandu habho bhatenditanga kummekanga jono mundu kila lichobha pa nniyango gwa Nyuumba ja Annoongo gukemitwa, "Nniyango gwa Kuhalala" ili ajope choachela kwa bhenibhala bhabhajingilanga pa Nyuumba ja Annoongo. 3 Jono mundu pabhakaabhona Apetulo na Ayohana bhabhikujingilanga pa Nyuumba ja Annoongo, akaajopanga bhapekehe mbiha. 4 Apetulo na Ayohana bhakaalolekea muno, na jono Apetulo akaalobholela, "Ntulole!" 5 Nabhena akaatendebhukila, bhabhikulolela kupata chilebhe kubhoka kwachabhenji. 6 Ngapena Apetulo akaalobholela, "Nanga mbiha, nambo chenichela chibhinacho mbakumpekeha. Kwa lihina lya Ayesu Kilisito bha ku Nazaleti nnyeme nnyaule!" 7 Akaakamula lubhoko lwa kunnelo, akajinula. Popopo makongono na hindindili yabhe hikabhee na machili. 8 Akahomba, akajema na kujemeka kujenda. Penapo akajingila pamo nabho pa Nyuumba ja Annoongo, abhikujenda na kuhombahomba kongo abhikwalumbalila Annoongo. 9 Bhandu bhoha bhakaabhona abhikujenda na kwaalumbalila Annoongo. 10 Pabhakaamanya kubhehe nga jonijola jwatendita kujopajopa kubhandikila na gonigola, "Nnyango gwa Kuhalala" pa Nyuumba ja Annoongo, bhakakangachanga muno hata bhakotokuelewanga gagaapatite.