Mateus 25

Chifani cha mbowa atatu

14 "Chinchijha, ufumu wa Mnungu ulingana ni mundhu wadapita ku ulendo ni kwaika mbowa wake kuti aimilile chuma chake. 15 Wadampacha kila mmojhi kulingana ni umo wakhozela. Mmojhi wadampacha timathumba tisano ta zahabu, mwina timathumba elufu ziwili ta zahabu, ni mwina timathumba elufu imojhi ta zahabu. Ndiipo iye wadachoka kupita ku ulendo. 16 Yujha wadalandila tmatumba tisano ta zahabu, wadapita kuchita malonda ni wadabalicha timatumba tina ta tisano ta zahabu. 17 Chimchijha mbowa yujha wadalandila matumba yawili, wadayabalicha, yadaongezeka matumba ina yawili ya zahabu. 18 Nambho yujha wadalandila kathumba kamojhi ka zahabu, wadachoka ni kupita kukumba jhenje ni kukakwilila kajha kathumba ka zahabu wadapachidwa ni mkulu wake.

19 "Yapo yadatha masiku yambili, yujha wamkulu wake wadabwela ni kufuna kujhiwa ghani ya chuma chake. 20 Mbowa yujha wadalandila timatumba tisano, wadajha kupeleka timatumba tina tisano ta zahabu, uku ni wadakamba, ‘Iwe mbuye udanipacha timatumba tisano ta zahabu, penyani napeleka timatumba tina tisano ta zahabu.’ 21 Mkulu wake wadamkambila, ‘Wachita bwino, iwe ni mbowa wabwino ni ukhulupilika. Pakuti udakhulupilika kwa vindhu vochepa, chipano sinikupache vindhu va vikulu, majha ukondwele pamojhi ni mkulu wako!’ 22 Ndiipo wadajha yujha mbowa wadalandila timatumba tiwili ta zahabu, wadakamba, ‘Iwe mbuye udanipacha timatumba tiwili ta zahabu, kaonani napatanjho timathumba tiwili ta zahabu,’ 23 Mkulu wake wadakamba, ‘Wachita bwino, iwe ni mbowa wabwino ni okhulupilika. Pakuti udali wokhulupilika kwa vindhu vochepa, sinikuike uimilile vindhu va vikulu, majha ukondwele pamojhi ni mkulu wako!’ 24 Ndiipo wadajha yujha mbowa wadalandila kathumba kamojhi ka zahabu, wadakamba, ‘Iwe mbuye, nijhiwa iwe nimundhu wopande lisungu, ukolola yapo siuda vyale ukokola yapo siudamwaze, 25 Nidaopa, nidapita kubisa kathumba kanu ka zahabu pandhaka. Ili yapo kathumba kanu ka zahabu.’ 26 Mkulu wake wadamyangha, ‘Iwe mbowa woipa ni mlesi! Ujhiwa kuti ine nikolola yapo sinida vyale ni kukusa yapo sinida vyale mbeu? 27 Udafunika ukapache kathumba kako ka zahabu wandhu yawo aghulicha zahabu, kuti yapo sinibwele nipate phindu. 28 Mlandeni kathumba ka zahabu, ni mumpache yujha wali ni timathumba khumi ta zahabu. 29 Pakuti kila uyo wachitila njhito icho nampacha sinimchuluchile vina nayo siwakhale navo vambili. Nambho mundhu waliyonjhe uyo siwachitila njhito icho nimpacha, ata chaching’ono walinacho siwalandidwe. 30 Mbowa uyu woipa, mtaeni kubwalo kumdima uko sikukhale chililo ni kubukutula mano.’"