Tutulungan ng Diyos ang Kanyang mga Mamamayan
1 Nakakaawa kayong mga nangwawasak
na hindi pa nakaranas ng pagkawasak.
Nakakaawa kayo, kayong mga taksil,
na hindi pa napagtataksilan.
Kapag natapos na ang inyong
pangwawasak at pagtataksil,
kayo naman ang wawasakin
at pagtataksilan.
2 Panginoon, kaawaan nʼyo po kami.
Nagtitiwala kami sa inyo.
Palakasin nʼyo kami araw-araw,
at iligtas sa panahon ng kaguluhan.
3 Tumatakas ang mga tao
sa dagundong ng inyong tinig.
Kapag kayoʼy tumayo upang magparusa,
ang mga bansaʼy nagkakawatak-watak.
4 Sasamsamin ang kanilang mga ari-arian,
at matutulad sila sa halamang
sinalakay ng balang.
5 Ang Panginoon ay dakila sa lahat!
Siyaʼy naninirahan sa langit.
Paiiralin niya ang katarungan
at katuwiran sa Jerusalem.
6 Siya ang magpapatatag sa inyo.
Ililigtas niya kayo at bibigyan
ng karunungan at kaalaman.
At ang mahalagang kayamanan ninyo
ay ang pagkatakot sa Panginoon.
7 Makinig kayo!
Ang matatapang nʼyong mamamayan
ay humihingi ng saklolo
sa mga lansangan.
Ang inyong mga sugo
para sa kapayapaan
ay umiiyak sa pagsisikap
na mapanatili ang kapayapaan.
8 Wala nang dumadaan
o lumalakad sa mga lansangan.
Nilalabag na ang kasunduan
at hindi na pinahahalagahan
ang mga saksi nito.33:8 ang mga saksi nito: Ito ang nasa Dead Sea Scrolls. Sa tekstong Masoretic, ang mga bayan.
Wala nang taong iginagalang.
9 Kawawa ang lupain ng Israel.
Nalalanta ang mga puno ng Lebanon,
at napapahiya.
Naging ilang ang kapatagan
ng Saron.
Nalalaglag ang mga dahon
ng mga puno sa Bashan at sa Carmel.
10 Sinabi ng Panginoon,
"Kikilos na ako ngayon,
at dadakilain ako ng mga tao.
11 Kayong mga taga-Asiria,
walang kabuluhan ang inyong mga plano
at mga ginagawa.
Ang nag-aapoy ninyong galit33:11 galit: Sa literal, hininga o espiritu.
ang tutupok sa inyo.
12 Masusunog kayo hanggang sa maging
tulad kayo ng apog.
Matutulad kayo sa matitinik na mga halamang
pinutol at sinunog."
13 Kayong mga bansa, malapit man o malayo,
pakinggan ninyo ang mga ginawa ko
at kilalanin ninyo ang kapangyarihan ko.
14 Nanginginig sa takot ang mga makasalanan
sa Zion.
Sabi nila, "Ang Diyos ay parang nagliliyab
na apoy na hindi namamatay.
Sino sa atin ang makakatagal
sa presensya ng Diyos?"
15 Ang makakatagal ay ang mga taong
namumuhay nang matuwid
at hindi nagsisinungaling,
hindi gahaman sa salapi
o tumatanggap ng suhol.
Hindi sila nakikiisa
sa mga mamamatay-tao
at hindi gumagawa ng iba pang masamang gawain.
16 Ganyang klase ang mga taong
nakatira sa matataas na lugar,
at ang kanilang kanlungan
ay ang malalaking bato.
Hindi sila mawawalan
ng pagkain at inumin.
17 Makikita ninyo33:17 ninyo: Sa Hebreo, mo. ang isang
makapangyarihang hari
na namamahala
sa napakalawak na kaharian.
18 Maaalala ninyo ang nakakatakot na araw
nang dumating sa inyo
ang mga pinuno ng Asiria
at binilang ang inyong mga tore
at kung ilang ari-arian
ang makukuha nila sa inyo.
19 Ngunit hindi na ninyo makikita
ang mga mayayabang na iyon,
na ang salita nila
ay hindi ninyo maintindihan.
20 Tingnan ninyo ang Zion, ang Jerusalem,
ang lungsod na pinagdarausan natin
ng ating mga pista.
Makikita na magiging mapayapang lugar
at magandang tirahan ito.
Itoʼy magiging parang toldang matibay,
na ang mga tulos ay hindi mabunot
at ang mga tali ay hindi malagot.
21 Ipapakita rito sa atin ng Panginoon
na siyaʼy makapangyarihan.
Ang Jerusalem ay parang isang lugar
na may malawak na ilog at batis,
na hindi matatawid
ng mga sasakyan ng mga kaaway.
22 Gagawin ito ng Panginoon
dahil siya ang ating hukom, mambabatas,33:22 mambabatas: O tagapamahala.
at siya ang ating hari.
Siya ang magliligtas sa atin.
23 Ang Jerusalem ngayon
ay parang sasakyang pandagat
na maluwag ang mga tali at palo,
at hindi mailadlad ang layag.
Ngunit darating ang araw na maraming ari-arian
ang sasamsamin ng Jerusalem
sa kanyang mga kaaway.
Kahit ang mga pilay
ay bibigyan ng bahagi.
24 Wala nang mamamayan sa Jerusalem
na magsasabi, "May sakit ako."
Patatawarin sila ng Diyos
sa kanilang mga kasalanan.