1 Ngunit ito ngayon ang sinasabi ng Panginoong

lumikha sa iyo, O Israel:

"Huwag kang matakot dahil ililigtas kita.*

Tinawag kita sa iyong pangalan,

at ikaw ay akin.

2 Kapag dumaan ka sa tubig,

akoʼy kasama mo.

Kapag tatawid ka sa mga ilog,

hindi ka malulunod.

Kapag dumaan ka sa apoy,

hindi ka masusunog;

at sa ningas nitoʼy hindi ka magliliyab.

3 Sapagkat ako ang Panginoon mong Diyos,

ang Banal na Diyos ng Israel,

na iyong Tagapagligtas.

Ibibigay ko ang Ehipto bilang pantubos sa iyo,

ang Etiopia, at ang Seba bilang kapalit mo.

4 Ibibigay ko ang ibang mga tao

bilang kapalit mo,

dahil ikaw ay marangal

at mahalaga sa aking paningin,

at dahil mahal kita.

5 Huwag kang matatakot

sapagkat kasama mo ako.

Titipunin ko ang iyong mga lahi

mula sa silangan hanggang sa kanluran.

6 Sasabihin ko sa mga bansa sa hilaga,

‘Ibalik ninyo sila,’

at sa timog, ‘Huwag ninyo silang pigilan.’

Hayaan ninyong bumalik

ang aking mga mamamayan

mula sa malayo,

at umuwi

mula sa kasuluk-sulukan ng mundo.

7 Sila ang mga taong aking tinawag.

Nilikha ko sila

para sa aking karangalan."

8 Tawagin mo ang aking mga mamamayan

na may mga mata, ngunit hindi makakita;

may mga tainga, ngunit hindi makarinig.

9 Tawagin mo ang lahat

ng mamamayan ng mga bansa.

Sino sa mga diyos-diyosan nila

ang makakahula tungkol

sa hinaharap?

Sino sa kanila ang makapagsasabi

tungkol sa mga nangyayari ngayon?

Isama nila ang kanilang mga saksi

upang patunayan

ang kanilang sinasabi,

upang ang mga makakarinig

ay makapagsasabing, "Totoo nga."

10 "Kayo ang aking mga saksi,"

wika ng Panginoon.

"Pinili ko kayong maging mga lingkod ko,

upang makilala ninyo ako

at magtiwala kayo sa akin,

at maunawaan ninyo na ako lamang ang Diyos.

Walang ibang Diyos na nauna sa akin,

at wala ring Diyos na susunod pa sa akin.

11 Ako lamang ang Panginoon

at maliban sa akin

ay wala nang iba pang Tagapagligtas.

12 Nagpahayag ako na ililigtas ko kayo,

at tinupad ko nga ito.

Walang ibang Diyos

na gumawa nito sa inyo,

kayo ang mga saksi ko."

Sinabi pa ng Panginoon,

"Ako ang Diyos.

13 Mula pa noon ako na ang Diyos.

Walang makakatakas

sa aking mga kamay.

Walang makakapagbago

ng mga ginagawa ko."

14 Ito ang sinasabi

ng Panginoon ninyong Tagapagligtas,

ang Banal na Diyos ng Israel,

"Para maligtas kayo,

ipapasalakay ko ang Babilonia

sa mga sundalo ng isang bansa,

at tatakas sila sa pamamagitan

ng mga barkong kanilang ipinagmamalaki.

15 Ako ang Panginoon,

ang inyong Banal na Diyos,

ang lumikha sa Israel, ang inyong Hari.

16 "Ako ang Panginoon

na gumawa ng daan sa dagat,

ng landas sa gitna ng mabagsik na alon.

17 Tinipon ko ang mga karwahe

at mga kabayo,

at ang buong hukbo ng Ehipto.

Doon sila natumba

at hindi na muling babangon pa.

Para silang ilaw na namatay,

napawi ang kanilang buhay.

18 Ngunit huwag na ninyong

iisipin pa ang nakaraan,

19 dahil bagong bagay na ang gagawin ko.

Itoʼy nangyayari

at nakikita na ninyo.

Gagawa ako ng daan

at mga bukal sa disyerto.

20 Pararangalan ako ng maiilap na hayop,

pati na ng mga asong-gubat

at mga kuwago,

dahil maglalagay ako

ng mga bukal sa disyerto

para may mainom

ang mga pinili kong mamamayan.

21 Sila ang mga taong aking nilikha

para sa akin

at upang magpuri sa akin.

22 "Ngunit hindi mo ako tinawag, Jacob;

nagsawa ka na sa akin, Israel.

23 Hindi ka na nag-aalay sa akin

ng mga tupang handog na sinusunog.

Hindi mo na ako pinararangalan

ng iyong mga handog

kahit na hindi kita pinahirapan

o pinagod sa paghingi

ng mga handog

na regalo at mga insenso.

24 Hindi mo ako ibinili ng mga insenso

o pinagsawa sa mga taba ng hayop

na iyong mga handog.

Sa halip, pinahirapan mo ako

at pinagod sa iyong mga kasalanan.

25 "Ako mismo ang naglilinis

ng mga kasalanan mo

para sa aking karangalan,

at hindi ko na iyon aalalahanin pa.

26 Isipin natin ang mga nakaraan.

Magharap tayo.

Patunayan mong wala kang kasalanan.

27 Nagkasala sa akin

ang mga ninuno mo,

at nagrebelde sa akin

ang iyong mga pinuno.

28 Kaya inilagay ko sa kahihiyan

ang iyong mga opisyal,

at ikaw, Israel, ay ipinaubaya ko

sa kapahamakan at kahihiyan.