यशैया 55

तिर्खाएकाहरूलाई निमन्त्रणा

1 "हे सबै तिर्खाएकाहरू हो,

पानीनिर आओ;

जससित धन छैन, तिमीहरू पनि आओ,

र किनेर खाओ!

आओ, विनाधन, विनामूल्य

दाखमद्य र दूध किन!

2 जे कुरा रोटी होइन, त्यसका निम्ति तिमीहरू किन रकम खर्च गर्छौ;

अनि जुन कुराले सन्तुष्‍ट पार्दैन, त्यसको निम्ति किन परिश्रम गर्छौ?

सुन, मेरो कुरा सुन, र जे असल छ, त्यो खाओ,

ताकि तिमीहरूको प्राण उत्तम भोजनमा तृप्‍त हुन सकोस्।

3 कान थाप र मकहाँ आओ;

मेरो कुरा सुन, ताकि तिमीहरू जीवित रहन सक।

म तिमीहरूसित अनन्तको करार बाँध्नेछु;

दावीदलाई प्रतिज्ञा गरेको मेरो विश्‍वासयोग्य प्रेम।

4 हेर, मैले त्यसलाई जातिहरूका बीच साक्षी बनाएको छु;

मानिसहरूका शासक र सेनापति ठहराएको छु।

5 निश्‍चय तिमीहरूले नजानेका राष्ट्रहरूलाई तिमीहरू बोलाइपठाउनेछौ;

अनि याहवेह इस्राएलका पवित्र परमेश्‍वरका कारण

तिमीहरूलाई नचिनेका जातिहरू

तिमीहरूतिर हतारसाथ आउनेछन्;

किनकि उहाँले तिमीहरूलाई गौरवले भर्नुभएको छ।"

6 जबसम्म याहवेहलाई पाउन सक्छौ, तबसम्म उहाँलाई खोज!

उहाँ नजिक हुनुहुँदा नै उहाँलाई पुकार!