Mateus 8

Yesu angumuponetsa mutantsi va muvina va Chiloma

5 Siku yimwe Yesu ho avaga ankwinjila mu muji gwa Kapelinawumu, muvina yumwe va vimilitsi akatsaje, 6 na kumugongola kuta, "Mutwa, mutantsi vangu avasise kukaye, antamika wutamwa wa kupola muvili gweka, na kaha avaga atache ndalahela."

7 Yesu akamulonjelaje, "Ngutsa kumuponetsa."

8 Lechelelo yula muvina va vimilitsi akamulonjelaje kuta, "Mutwa, heni sinambe fwaye heve winjile mu nyumba yangu, lechelelo ulonje lulongwa hela na mutantsi vangu akupona. 9 Kwasawuli heni ntsili mu wutavala, na kaha heni ntsi muvina va vatova ligalu, manyi ntsimulonjele yumwe, bite kula, nayo am’bita, na kaha manyi ntsimulonjele mutantsi vangu kuta, utse, atsaga, na manyi ntsimulonjele kuta, dite hino, nayo aditaga." 10 Yesu hoavaga kuhulika ndongwa itso, akapomokaje na kuvalonjela vala wo vamufwataga, Ntsinguvalonjela wukweli kuta, "Ntsing’ali kumuwona munu munya litumbilo likomi kota lino kwa vanu va mu inyi ya Isilaheli." 11 Ntsinguvalonjela kuta, "Vanu wolofu vakutsa kuhuma lubali lwa kulihumilo lwa litsuva na kulisotelo lwa litsuva, nawo vakikala hamwe na Ibulahimu, na Yisaka, na Yakobo muliwungo lya kulya na kung’wa ku Wuntsajila wa Mulungu, 12 lechelelo vana va Wuntsajila, vakutotswa mu lijitsa la kivala, ko kukuva na chivembo na kugwegwetsula mino." 13 Kaha Yesu akamulonjelaje yula muvina, "Ubite na yivaje ihyo kota fyo witumbye. Mutantsi va yula muvina akaponaje luvala lulo."