Êxodo 18

ಜೆತ್ರೊ ಮೊಯ್ಜೆಕ್ ಬೆಟ್ತಲೆ

1 ಜೆತ್ರೊ ಮನ್ತಲೊ ಮೊಯ್ಜೆಚೊ ಮಾಮಾ, ಅನಿ ಮಿದ್ಯಾನ್ ಲೊಕಾಂಚೊ ಪುಜಾರಿ, ಹೆನಿ ದೆವಾನ್ ಅಪ್ಲ್ಯಾ ಲೊಕಾಕ್ನಿ ಕರಲ್ಲ್ಯಾ ಚಮತ್ಕಾರಾಚ್ಯಾ ವಿಶಯಾತ್ ಆಯ್ಕಲ್ಯಾನ್ ಅನಿ ಸರ್ವೆಸ್ಪರಾನ್ ಇಜ್ರಾಯೆಲ್ ಲೊಕಾಕ್ನಿ ಇಜಿಪ್ತಾಕ್ನಾ ಕಸೆ ಬಲ್ವುನ್ ಹಾನ್ಲ್ಯಾನ್ ಮನ್ತಲೆ ಬಿ ತೆಕಾ ಕಳಲ್ಲೆ. 2 ಹೆನಿ ಯೆತಾನಾ ಅಪ್ಲ್ಯಾಕ್ಡೆ ಧಾಡುನ್ ಹೊಲ್ಲ್ಯಾ ಮೊಯ್ಜೆಚಿ ಬಾಯ್ಕೊ ಜಿಪ್ಪೊರಾ ಮನ್ತಲಿ ಅನಿ ತಿಚ್ಯಾ ದೊನ್ ಲೆಕಾಕ್ನಿ ಬಲ್ವುನ್ ಹಾನ್ಲ್ಯಾನ್. 3 ಮೊಯ್ಜೆನ್ ಅಪ್ನಿ ದುಸ್ರ್ಯಾ ದೆಶಾಚೊ ಪರ್ವಾಸಾಕ್ ಯೆಲ್ಲೊ ಮನುನ್ ಥೊರ್ಲಾ ಲೆಕಾಕ್ "ಗೆರ್ಶೊಮ್" ಮನುನ್ ನಾವ್ ಥವ್ಲ್ಯಾನ್. 4 ಅನಿ ಅಪ್ನಾಚೊ ಬಾಬಾಚೊ ದೆವ್ ಮಾಕಾ ಮಜತ್ಕಾರಿ ಹೊವ್ನ್ ಮಾಕಾ ಫರೊವ್ ರಾಜಾಚ್ಯಾ ಹಾತಿತ್ನಾ ಚುಕ್ವುಲ್ಯಾನ್ ಮನುನ್ ಘೆವ್ನ್ ಧಾಕ್ಲ್ಯಾ ಲೆಕಾಕ್ "ಎಲಿಯೆಜೆರ್" ಮನುನ್ ನಾವ್ ಥವ್ಲ್ಯಾನ್. 5 ಮೊಯ್ಜೆಚೊ ಮಾಮಾ ಜೆತ್ರೊ, ಮೊಯ್ಜೆಚ್ಯಾ ಬಾಯ್ಕೊ ಪೊರಾಕ್ನಿ ಬಲ್ವುನ್ ಘೆವ್ನ್ ಡಂಗ್ಳಿತ್ಲ್ಯಾ ದೆವಾಚ್ಯಾ ಮಡ್ಡಿಚ್ಯಾ ಜಗ್ಗೊಳ್ ವಸ್ತಿ ಹೊತ್ತ್ಯಾ ಮೊಯ್ಜೆಕ್ಡೆ ಯೆಲೊ. 6 ಅನಿ ತೆನಿ ಮೊಯ್ಜೆಕ್ "ಮಿಯಾ ತುಜೊ ಮಾಮಾ, ಜೆತ್ರೊ ತುಜ್ಯಾ ಬಾಯ್ಕೊ ಪೊರಾಂಚ್ಯಾ ವಾಂಗ್ಡಾ ಯೆಲಾ", ಮನುನ್ ಸಾಂಗುನ್ ಧಾಡ್ಲ್ಯಾನ್. 7 ಮೊಯ್ಜೆನ್ ಭಾಯ್ರ್ ಯೆವ್ನ್ ಅಪ್ಲ್ಯಾ ಮಾಮಾಕ್ ನಮಸ್ಕಾರ್ ಕರುನ್, ಅಪ್ಪುನ್ ಘೆವ್ನ್, ಮಾನಾ ಎಕಾ ಮೆಕಾಕ್ ಇಚಾರ್‍ನಿ ಕರುನ್ ಘೆವ್ನ್ ಮಾನಾ ತೆನಿ ಬಿಡಾರಾತ್ ಗೆಲ್ಯಾನಿ. 8 ಮೊಯ್ಜೆನ್ ಅಪ್ನಾಕ್ ಅನಿ ಇಜ್ರಾಯೆಲ್ ಲೊಕಾಕ್ನಿ ಮಜತ್ ಕರುನ್ ಫಾರೊವಾಕ್ ಅನಿ ಇಜಿಪ್ತಾಚ್ಯಾ ಲೊಕಾಕ್ನಿ ತರಾಸ್ ದಿಲ್ಲೆ ಅನಿ ಅಪ್ನಾಕ್ ವಾಟೆ ವರ್‍ತಿ ಯೆಲ್ಲಿ ತರಾಸಾ ಸಗ್ಳಿಬಿ ತ್ಯಾತುರ್ ಸರ್ವೆಸ್ಪರಾನ್ ಕಸೆ ಪಾರ್ ಕರ್ಲ್ಯಾನ್ ಮನ್ತಲೆಬಿ ಅಪ್ನಾಚ್ಯಾ ಮಾಮಾಕ್ ಸಾಂಗ್ಲ್ಯಾನ್ . 9 ಸರ್ವೆಸ್ಪರಾನ್ ಇಜ್ರಾಯೆಲ್ ಲೊಕಾಕ್ನಿ ಸುಟ್ಕಾ ಕರುನ್ ತೆಂಕಾ ಯೆವ್ಡೆ ಲೈ ಮಜತ್ ಕರಲ್ಲೆ ಆಯ್ಕುನ್ ಜೆತ್ರೊಕ್, ಲೈ ಖುಶಿ ಹೊಲಿ. 10 ಅನಿ ತೆನಿ, "ಇಜಿಪ್ತಾತ್ನಾ ಅನಿ ಫಾರೊವ್ ರಾಜಾಚ್ಯಾ ಹಾತಿತ್ನಾ ತುಮ್ಕಾ ಸುಟ್ಕಾ ಕರಲ್ಲ್ಯಾ ಸರ್ವೆಸ್ಪರಾಕ್ ಸ್ತುತಿ ಹೊಂವ್ದಿತ್!, ಅಪ್ನಾಚ್ಯಾ ಲೊಕಾಕ್ನಿ ಗುಲಾಮ್ ಗಿರಿತ್ನಾ ರಾಕ್ವನ್ ಕರಲ್ಲ್ಯಾ ಸರ್ವೆಸ್ಪರಾಕ್ ಸ್ತುತಿ ಹೊಂವ್ದಿತ್. 11 ತೆನಿ ಅಪ್ಲ್ಯಾ ಲೊಕಾಕ್ನಿ ತೆಂಚ್ಯಾ ಹಾತಿತ್ನಾ ಸುಟ್ಕಾ ಕರುನ್, ತಿ ಇಜಿಪ್ತಾಚಿ ಲೊಕಾ ಬಡಾಯ್ ಕರ್‍ತಲ್ಯಾ ವಿಶಯಾತ್ ತೆಂಕಾ ಖಾಲ್ತಿ ಕರ್ಲ್ಯಾನ್, ತಸೆ ಹೊವ್ನ್ ಸಗ್ಳ್ಯಾ ದೆವಾಂಚ್ಯಾಕಿಂತಾಬಿ ಸರ್ವೆಸ್ಪರ್ ದೆವುಚ್ ಮೊಟೊ ಮನ್ತಲೆ ಅತ್ತಾ ಮಾಕಾ ಕಳುನ್ ಯೆಲಾ" ಮಟ್ಲ್ಯಾನ್. 12 ಅನಿ ಯೆವ್ಡೆಚ್ ನಸ್ತಾನಾ, ಮೊಯ್ಜೆಚೊ ಮಾಮಾ ಜೆತ್ರೊನ್ ಸರ್ವೆಸ್ಪರಾಕ್ ಜಾಳ್ವುತಲಿ ಬಲಿ ಅನಿ ಹುರಲ್ಲಿ ಬಲಿ ಭೆಟ್ವುಲ್ಯಾನ್, ಆರೊನ್ ಅನಿ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾ ಲೊಕಾನಿ ಯೆವ್ನ್ ದೆವಾಚ್ಯಾ ಇದ್ರಾಕ್ ತೆಂಚ್ಯಾ ವಾಂಗ್ಡಾ ಜೆವಾನ್ ಕರ್ಲ್ಯಾನಿ.

ನ್ಯಾಯ್ ನಿರ್ನಯ್ ಕರ್‍ತಲ್ಯಾಕ್ನಿ ನೆಮಸ್ತಲೆ

13 ದುಸ್ರೆ ದಿಸಿ ಮೊಯ್ಜೆ ಲೊಕಾಕ್ನಿ ನ್ಯಾಯ್ ನಿರ್ನಯ್ ಕರುಕ್ ಬಸಲ್ಲೊ; ಲೊಕಾ ಸಕ್ಕಾಳಿಕ್ನಾ ಸಾಂಜ್ ಪತರ್ಬಿ ತೆಜ್ಯಾಕ್ಡೆ ಇಬೆ ಹೊತ್ತಿ. 14 ಮೊಯ್ಜೆ ಲೊಕಾಂಚ್ಯಾ ವಾಂಗ್ಡಾ ಬೊಲುನ್ಗೆತ್ ಹೊತ್ತೆ ಸಗ್ಳೆ ತೆಜ್ಯಾ ಮಾಮಾನ್ ಬಗುನ್, "ತಿಯಾ ಕಶ್ಯಾಕ್ ಲೊಕಾಂಚ್ಯಾ ಸಾಟ್ನಿ ಯೆವ್ಡೆ ಲೈ ತರಾಸ್ ಕರುನ್ ಘೆತೆಯ್?, ಲೊಕಾ ಬಗಟ್ಲ್ಯಾರ್ ಸಕ್ಕಾಳಾಕ್ನಾ ಸಾಂಜ್ ಪತರ್ಬಿ ತಿಯಾ ಎಕ್ಲೊಚ್ ಇಬೆರಾವ್ನ್ ನ್ಯಾಯ್ ನಿರ್ನಯ್ ಕರುಲೈ ಕಾಯ್?" ಮನುನ್ ಇಚಾರ್‍ಲ್ಯಾನಿ. 15 ತನ್ನಾ ಮೊಯ್ಜೆನ್, "ಹಿ ಲೊಕಾ ದೆವಾಚೊ ನಿರ್ದಾರ್ ಆಯ್ಕುಕ್ ಸಾಟ್ನಿ ಮಾಜಾಕ್ಡೆ ಯೆತಾತ್; 16 ತೆಂಚ್ಯಾತ್ ಕಾಯ್ಬಿ ಝಗ್ಡೊ ಉಟ್ಲ್ಯಾರ್ ತೆನಿ ಮಾಜ್ಯಾಕ್ಡೆ ಯೆತಾತ್, ಮಿಯಾ ಇಚಾರ್ ಕರುನ್, ತೆಂಕಾ ನ್ಯಾಯ್ ನಿರ್ನಯ್ ಕರುನ್, ಸರ್ವೆಸ್ಪರಾಚೊ ಹುಕುಮ್ ತೆಂಕಾ ಸಾಂಗ್ತಾ" ಮನುನ್ ಜವಾಬ್ ದಿಲ್ಯಾನ್. 17 ತೆ ಆಯ್ಕುನ್ ಜೆತ್ರೊನ್ ಮೊಯ್ಜೆಕ್, "ಹೆ ತಿಯಾ ಕರುಕ್ ಲಾಗಲ್ಲೆ ಸಮಾ ನಾ. 18 ಹೆ ಕಾಮ್ ಲೈ ತರಾಸಾಚೆ ಹಾಯ್, ಹೆ ತುಜ್ಯಾನ್ ಎಕ್ಲ್ಯಾಚ್ಯಾನ್ ಚಾಲ್ವುಕ್ ಹೊಯ್ನಾ, ತಿಯಾ ಅನಿ ಲೊಕಾ ಖರೆಚ್ಬಿ ಲೈ ತರಾಸಾತ್ ಪಡ್ತ್ಯಾಸಿ. 19 ತಸೆ ಹೊವ್ನ್, ಮಾಜೆ ಬೊಲ್ನೆ ಆಯ್ಕ್, ಅನಿ ಮಾಜ್ಯಾ ಸಲಹಾಕ್ನಿ ಕಾನ್ ದಿ, ಸರ್ವೆಸ್ಪರ್ ತುಜ್ಯಾ ವಾಂಗ್ಡಾ ರ್‍ಹಾತಾ, ಅನಿ ತಿಯಾ ಹ್ಯಾ ಲೊಕಾಂಚೊ ಝಗ್ಡೊ ಹೆಂಚ್ಯಾ ಅನಿ ಸರ್ವೆಸ್ಪರಾಚ್ಯಾ ಮದ್ದಿ ಇಬೆ ರಾವ್ನ್ ಸರ್ವೆಸ್ಪರಾಕ್ಡೆ ಹಾನ್ತೆಯ್, ತೆ ಸಮಾ ಹಾಯ್. 20 ಅನಿ ದೆವಾಚಿ ಹುಕುಮಾ ಲೊಕಾಕ್ನಿ ಶಿಕ್ವುನ್ ತೆನಿ ಚಲುಚಿ ಹೊಲ್ಲಿ ವಾಟ್ ಅನಿ ಕರುಚೆ ಹೊಲ್ಲಿ ಕಾಮಾ ಕಳ್ವುಕುಚ್ ಪಾಜೆ. 21 ಖರೆ ತಿಯಾ ಹ್ಯಾ ಲೊಕಾತ್ನಿ ಶಕ್ತ್ ಹೊತ್ತೆ, ದೆವಾಚಿ ಭಕ್ತಿ ಹೊತ್ತೆ, ವಿಶ್ವಾಸಾಚೆ ಅನಿ ಲಂಚ್ ಅಪ್ಡಿನಸಲ್ಲೆ ಹೊವ್ನ್ ಹೊತ್ತ್ಯಾಕ್ನಿ ಎಚುನ್ ಘೆ, ತೆಂಕಾ ಹಜಾರ್, ಸೆಂಬರ್ ಪನ್ನಾಸ್ ಅನಿ ಧಾ ಲೊಕಾಂಚೆ ಅಧಿಕಾರಿ ಕರುನ್ ನೆಮಸ್. 22 ತೆನಿಚ್ ಕನ್ನಾಬಿ ಲೊಕಾಂಕ್ನಿ ನ್ಯಾಯ್ ನಿರ್ನಯ್ ಕರುಂದಿತ್, ಅನಿ ಲೈ ಮೊಟೆ ಮೊಟೆ ಝಗ್ಡೆ ಎಕುಚ್ ತುಜ್ಯಾ ಇದ್ರಾಕ್ ಹಾನುಂದಿ, ತೆನಿ ಅಸೆ ತುಜೆ ವಜ್ಜೆ ಘೆಂವ್ದಿತ್, ತನ್ನಾ ತುಜೆ ವಜ್ಜೆ ಕಮ್ಮಿ ಹೊತಾ. 23 ತುಕಾ ಅಸೆ ಕರುಕ್ ದೆವ್ ಒಪ್ಕಿ ದಿಂವ್ದಿತ್, ಅಸೆ ಕರಲ್ಲ್ಯಾಕ್ ತಿಯಾ ಹೆ ಕಾಮ್ ಕರುಕ್ ಶಕ್ತ್ ಹೊತೈಯ್, ಅನಿ ಹಿ ಲೊಕಾಬಿ ಸಮಾಧಾನ್ ಹೊವ್ನ್ ಅಪಪ್ಲ್ಯಾ ಘರಾಕ್ನಿ ಜಾತಾತ್", ಮಟ್ಲ್ಯಾನ್.

24 ಮೊಯ್ಜೆನ್ ಅಪ್ಲ್ಯಾ ಮಾಮಾಚ್ಯಾ ಸಲಹಾಕ್ನಿ ಒಪ್ಕಿ ದಿಲ್ಯಾನ್, ಅನಿ ತೆನಿ ಸಾಂಗಲ್ಲ್ಯಾ ಸಾರ್ಕೆಚ್ ಕರ್ಲ್ಯಾನ್. 25 ಮೊಯ್ಜೆನ್ ಇಜ್ರಾಯೆಲ್ ಲೊಕಾಕ್ನಿ ಶಕ್ತ್ ಹೊತ್ತ್ಯಾಕ್ನಿ ಎಚುನ್ ಘೆವ್ನ್, ಹಜಾರ್, ಸೆಂಬರ್, ಪನ್ನಾಸ್ ಅನಿ ಧಾ ಲೊಕಾಚ್ಯಾ ವರ್‍ತಿ ಅಧಿಕಾರಿ ಕರುನ್ ನೆಮಸ್ಲ್ಯಾನ್. 26 ಹೆನಿಚ್ ಲೊಕಾಕ್ನಿ ಕನ್ನಾಬಿ ನ್ಯಾಯ್ ನಿರ್ನಯ್ ಕರ್‍ತಲೆ ಹೊಲೆ, ಅನಿ ಲೈ ತರಾಸಾಚೆ ಹೊತ್ತೆ ಝಗ್ಡೆ ಮೊಯ್ಜೆಕ್ಡೆ ಹಾನ್ಲ್ಯಾನಿ, ಅನಿ ತರಾಸಾಚೆ ನತ್ತೆ ಝಗ್ಡೆ ಸಗ್ಳೆ ಅಪ್ನಿಚ್ ನಿರ್ನಯ್ ಕರ್ಲ್ಯಾನಿ.

27 ಮಾನಾ ಮೊಯ್ಜೆನ್ ಅಪ್ಲ್ಯಾ ಮಾಮಾಕ್ ಧಾಡುನ್ ದಿಲ್ಯಾನ್, ಅನಿ ತೊ ತೆಚ್ಯಾ ಗಾಂವಾಕ್ ಪರ್‍ತುನ್ ಗೆಲೊ.