Êxodo 3

ದೆವಾನ್ ಮೊಯ್ಜೆಕ್ ಬಲ್ವಲ್ಲೆ

1 ಮೊಯ್ಜೆ ಅಪ್ಲೊ ಮಾಮಾ ಮಿದ್ಯಾನಾಚೊ ಯಾಜಕ್ ಹೊವ್ನ್ ಹೊತ್ತ್ಯಾ ಜೆತ್ರೊ ಮನ್ತಲ್ಯಾಚಿ ಬಕ್ರಿ ರಾಕುನ್ಗೆತ್ ತೆಂಕಾ ಡಂಗ್ಳಿಚ್ಯಾ ಫಾಟ್ಲ್ಯಾ ಭಾಜುಕ್ ಚಲ್ಸುನ್ಗೆವ್ನ್ ಜಾವ್ನ್ "ಸಿನಾಯ್" ಮನ್ತಲ್ಯಾ ಪವಿತ್ರ್ ಮಡ್ಡಿಚ್ಯಾ ಜಗ್ಗೊಳ್ ಯೆಲೊ. 2 ತನ್ನಾ ಸರ್ವೆಸ್ಪರ್ ದೆವಾಚ್ಯಾ ಧುತಾನ್, ಜಳ್ತಲ್ಯಾ ಆಗಿಚ್ಯಾ ಸಾರ್ಕೊ ಕಾಟ್ಯಾಂಚ್ಯಾ ಝಿಳಿತ್ನಾ ದಾಕ್ವುನ್ ಘೆಟ್ಲ್ಯಾನ್, ತನ್ನಾ ಮೊಯ್ಜೆನ್ ಬಗ್ತಾನಾ, ಕಾಟ್ಯಾಂಚ್ಯಾ ಝಿಳಿಕ್ ಆಗ್ ಲಾಗಲಿ; ಖರೆ ಝಿಳ್ ಜಳುನ್ ಜಾವ್ಕ್ ನಾ. 3 ತನ್ನಾ ಮೊಯ್ಜೆನ್ "ಝಿಳ್ ಕಶ್ಯಾಕ್ ಜಳಿ ನಾ! ಹೆ ಪವಿತ್ರ್ ದ್ರಶ್ಯಾ ಮಿಯಾ ಜಗ್ಗೊಳ್ ಜಾವ್ನ್ ಬಗುಚೆ" ಮಟ್ಲ್ಯಾನ್.

4 ತೊ ಬಗುಕ್ ಮನುನ್ ಜಗ್ಗೊಳ್ ಯೆವ್ಲಾಗಲೆ ಸರ್ವೆಸ್ಪರ್ ದೆವಾನ್ ಬಗುನ್ ತೆಕಾ, "ಮೊಯ್ಜೆ, ಮೊಯ್ಜೆ," ಮನುನ್ ಬಲ್ವುಲ್ಯಾನ್, ತನ್ನಾ ತೆನಿ "ಅಬಕ್, ಮಿಯಾ ಹಿತ್ತೆಚ್ ಹಾಂವ್" ಮಟ್ಲ್ಯಾನ್.

5 ತನ್ನಾ ದೆವಾನ್ "ಹಿತ್ತೆ ಜಗ್ಗೊಳ್ ಯೆವ್ ನಕ್ಕೊ! ತುಜ್ಯಾ ಪಾಂಯಾತ್ಲಿ ವ್ಹಾನಯಾ ಕಾಡ್, ಕಶ್ಯಾಕ್ ಮಟ್ಲ್ಯಾರ್, ತಿಯಾ ಇಬೆ ಹೊತ್ತೊ ಪವಿತ್ರ್ ಜಾಗೊ" ಮಟ್ಲ್ಯಾನ್.

6 ಅನಿ ದೆವಾನ್ ತೆಕಾ, ಮಿಯಾ ತುಜ್ಯಾ ಪುರ್ವಜಾಂಚೊ ಬಾಬಾ, ಅಬ್ರಾಹಾಮ್, ಇಸಾಕ್, ಅನಿ ಜಾಕೊಬಾಚೊ ದೆವ್ ಹೊವ್ನ್ ಹಾಯ್ ಮಟ್ಲ್ಯಾನ್, ತನ್ನಾ ಮೊಯ್ಜೆನ್ ಅಪ್ನಾಚೆ ತೊಂಡ್ ಧಾಪುನ್ ಘೆಟ್ಲ್ಯಾನ್, ಕಶ್ಯಾಕ್ ಮಟ್ಲ್ಯಾರ್, ತೊ ದೆವಾಕ್ ಬಗುಕ್ ಭಿಂವ್ಲೊ.

7 ತನ್ನಾ ಸರ್ವೆಸ್ಪರ್ ದೆವಾನ್, "ಮಿಯಾ ಇಜಿಪ್ತಾತ್ ಹೊತ್ತ್ಯಾ ಮಾಜ್ಯಾ ಲೊಕಾಂಚೊ ತರಾಸ್ ಬಗ್ಲಾ, ತೆಂಕಾ ತರಾಸಾನಿ ಕಾಮಾ ಕರಸ್ತಲ್ಯಾಂಚ್ಯಾ ವಿಶಯಾತ್ ತೆಂಚೆ ಅಳಾಪ್ ಮಾಕಾ ಆಯ್ಕ್ಲಾ. ತೆಂಚೊ ದುಖ್ ಮಾಕಾ ಗೊತ್ತ್ ಹಾಯ್. 8 ತಸೆ ಹೊವ್ನ್ ತೆಂಕಾ ಇಜಿಪ್ತಾಚ್ಯಾ ಲೊಕಾಂಚ್ಯಾ ಹಾತಿತ್ನಾ ಸೊಡ್ಸುಕ್ ಅನಿ ಥೈತ್ನಾ ಭಾಯ್ರ್ ಹಾನುನ್ ದುದ್ ಅನಿ ಮ್ಹಾಂವ್ ಹೊಂವ್ತಲ್ಯಾ ವಿಶ್ಯಾಲ್ ಹೊತ್ತ್ಯಾ ಬರ್ಯಾ ದೆಶ್ಯಾಕ್ ಮಟ್ಲ್ಯಾರ್, ಕಾನಾನ್ ಗಾರಾಂಚ್ಯಾ, ಹಿತ್ತಿಯಾಂಚ್ಯಾ, ಅಮೊರಿತಾಂಚ್ಯಾ, ಪೆರಿಜಿಯಾಂಚ್ಯಾ, ಹಿವ್ವಿಯಾಂಚ್ಯಾ ಅನಿ ಜೆಬುಸಿಯಾಂಚ್ಯಾ ಗಾಂವಾಕ್ ಬಲ್ವುನ್ ನೆವ್ಕ್ ಉತ್ರುನ್ ಯೆಲಾ. 9 ಅತ್ತಾ ಆಯ್ಕ್, ಇಜ್ರಾಯೆಲಾಂಚಿ ಬೊಬ್ ಮಾಕಾ ಪಾವ್ಲಾ ಇಜಿಪ್ತಾಚಿ ಲೊಕಾ ತೆಂಕಾ ತರಾಸ್ ದಿತಲೆ ಮಿಯಾ ಬಗಟ್ಲಾ. 10 ತಸೆ ಹೊವ್ನ್ ಜಾ; ಮಾಜಿ ಲೊಕಾ ಹೊವ್ನ್ ಹೊತ್ತ್ಯಾ ಇಜ್ರಾಯೆಲ್‌ಕಾರಾಕ್ನಿ ಇಜಿಪ್ತ್ ದೆಶ್ಯಾಕ್ನಾ ಭಾಯ್ರ್ ಹಾನುಕ್ ಸಾಟ್ನಿ ತುಕಾ ಫಾರೊವ್ ಮನ್ತಲ್ಯಾ ರಾಜಾಕ್ಡೆ ಧಾಡುನ್ ದಿವ್ಲಾ" ಮಟ್ಲ್ಯಾನ್.

11 ಮೊಯ್ಜೆನ್ ದೆವಾಕ್, "ಫಾರೊವ್ ರಾಜಾಚ್ಯಾ ಇದ್ರಾಕ್ ಜಾವ್ಕ್ ಹೊಂವ್ದಿತ್ ನಾತರ್ ಇಜ್ರಾಯೆಲಾಚ್ಯಾ ಲೊಕಾಕ್ನಿ ಇಜಿಪ್ತಾಕ್ನಾ ಸೊಡ್ಸುನ್ ಹಾನುಕ್ ಹೊಂವ್ದಿತ್ ಮಿಯಾ ಕೊನ್?" ಮಟ್ಲ್ಯಾನ್.

12 ತನ್ನಾ ದೆವಾನ್ ತೆಕಾ, "ಮಿಯಾಚ್ ತುಜ್ಯಾ ವಾಂಗ್ಡಾ ರ್‍ಹಾತಾ; ತಿಯಾ ಮಾಜ್ಯಾ ಲೊಕಾಕ್ನಿ ಇಜಿಪ್ತಾಕ್ನಾ ಭಾಯ್ರ್ ಹಾನಲ್ಲ್ಯಾ ತನ್ನಾ ತುಮಿ ಹ್ಯಾ ಮಡ್ಡಿರುಚ್ ದೆವಾಕ್ ಆರಾದನ್ ಕರ್ತ್ಯಾಶಿ, ತುಕಾ ಧಾಡುನ್ ದಿಲ್ಲೆ ಮಿಯಾಚ್ ಮನ್ತಲ್ಯಾಕ್ ಹಿಚ್ ತುಕಾ ವಳಕ್ ಹೊವ್ನ್ ರ್‍ಹಾತಾ," ಮಟ್ಲ್ಯಾನ್.

13 ಮೊಯ್ಜೆನ್ ದೆವಾಕ್, ಮಿಯಾ ಇಜ್ರಾಯೆಲಾಂಚ್ಯಾ ಜಗ್ಗೊಳ್ ಜಾವ್ನ್, ತುಮ್ಚ್ಯಾ ಪುರ್ವಜಾಂಚ್ಯಾ ದೆವಾನ್ ಮಾಕಾ ತುಮ್ಚ್ಯಾ ಜಗ್ಗೊಳ್ ಧಾಡ್ಲಾ; ಮನುನ್ ಸಾಂಗ್ತಾನಾ ತೆನಿ ಎಕ್ ಎಳಾ "ತೆಚೆ ನಾವ್ ಕಾಯ್?" ಮನುನ್ ಇಚಾರ್ಲ್ಯಾರ್ ಮಿಯಾ ಕಾಯ್ ಜವಾಬ್ ದಿವ್ಚೆ? ಮನುನ್ ಇಚಾರ್‍ಲ್ಯಾನಿ.

14 ತನ್ನಾ ದೆವಾನ್ "ಜೆ ಹಾಯ್ ತೊಚ್ ಮಿಯಾ" ತಿಯಾ ಇಜ್ರಾಯೆಲಾಂಚ್ಯಾ ಲೊಕಾಕ್ನಿ "ಜೆ ಹಾಯ್" ಹೆನಿ ಮಾಕಾ ತುಮ್ಚ್ಯಾಕ್ಡೆ ಧಾಡ್ಲಾ ಮನುನ್ ಸಾಂಗ್ ಮಟ್ಲ್ಯಾನ್. 15 ಅನಿ ದೆವಾನ್ ಮೊಯ್ಜೆಕ್; "ತಿಯಾ ಇಜ್ರಾಯೆಲ್‌ಕಾರಾಕ್ನಿ ಪುರ್ವಜ್ ಹೊವ್ನ್ ಹೊತ್ತ್ಯಾ ಅಬ್ರಾಹಾಮಾಚೊ ದೆವ್, ಇಸಾಕಾಚೊ ದೆವ್, ಜಾಕೊಬಾಚೊ ದೆವ್ ಹೊವ್ನ್ ಹೊತ್ತ್ಯಾ ಸರ್ವೆಸ್ಪರ್ ದೆವಾನ್ ಮಾಕಾ ತುಮ್ಚ್ಯಾಕ್ಡೆ ಧಾಡ್ಲಾ" ಮನುನ್ ಸಾಂಗ್, ಸಗ್ಳ್ಯಾ ಎಳಾಕ್ಬಿ ಹೆಚ್ ಮಾಜೆ ನಾವ್, ಹ್ಯಾ ನಾಂವಾನುಚ್ ಮಾಕಾ ಸದಾಸರ್ವತಾಕ್ ಅನಿ ಫಿಡೆ ಯೆತಲಿ ಸಗ್ಳ್ಯಾ ಪಿಳ್ಗಿಯಾಂಚಿ ಲೊಕಾಬಿ ಯಾದ್ ಕರ್‍ತಾತ್. 16 ತಿಯಾ ಜಾವ್ನ್ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾ ಲೊಕಾಕ್ನಿ ಗೊಳಾಕರ್, ತೆಂಕಾ ತುಮ್ಚ್ಯಾ ಪುರ್ವಜಾಂಚೊ ದೆವ್ ಮಟ್ಲ್ಯಾರ್, ಅಬ್ರಹಾಮ್, ಇಸಾಕ್, ಅನಿ ಜಾಕೊಬಾಚೊ ದೆವ್ ಹೊವ್ನ್ ಹೊತ್ತ್ಯಾ ಸರ್ವೆಸ್ಪರಾನ್ ಮಾಕಾ ದಾಕ್ವುನ್ಗೆವ್ನ್ ತುಮ್ಚ್ಯಾ ವಿಶಯಾತ್ ಅಸೆ ಮಟ್ಲಾ; ತುಮ್ಕಾ ಇಜಿಪ್ತ್ ದೆಶ್ಯಾತ್ ಹೊಲ್ಲ್ಯಾ ತರಾಸಾಕ್ನಿ ಮಿಯಾ ಡೊಳ್ಯಾನ್ ಬಗಟ್ಲಾ ಅನಿ ಕಳ್ವುನ್ ಘೆಟ್ಲಾ. 17 ಇಜಿಪ್ತಾತ್ ತುಮ್ಕಾ ಹೊಲ್ಲ್ಯಾ ತರಾಸಾಂತ್ನಾ ಸುಟ್ಕಾ ಕರುನ್, ದುದ್ ಅನಿ ಮ್ಹಾಂವ್ ಹೊಂವ್ತಲ್ಯಾ ದೆಶ್ಯಾಕ್ ಮಟ್ಲ್ಯಾರ್ ಕಾನಾನ್ ಗಾರಾ, ಹಿತ್ತಿಯಾ, ಅಮೊರಿತಾ, ಪೆರಿಜಿಯಾ, ಹಿವ್ವಿಯಾ ಅನಿ ಜೆಬುಸಿಯಾ ವಸ್ತಿ ಕರ್‍ತಲ್ಯಾ ದೆಶ್ಯಾಕ್ ಹಾನುಚೆ ಮನುನ್ ಸಾಂಗ್.

18 ತೆನಿ ತುಜ್ಯಾ ಗೊಸ್ಟಿಕ್ ಕಾನ್ ದಿತ್ಯಾತ್, ತಿಯಾ ಅನಿ ಇಜ್ರಾಯೆಲಾಂಚಿ ಜಾಂನ್ತಿ ಲೊಕಾ ಇಜಿಪ್ತ್ ದೆಶ್ಯಾಚ್ಯಾ ರಾಜಾಕ್ಡೆ ಜಾವ್ನ್ ತೆಕಾ, "ಇಬ್ರಿಯಾಂಚೊ ದೆವ್ ಹೊವ್ನ್ ಹೊತ್ತೊ ಸರ್ವೆಸ್ಪರ್ ಅಮ್ಕಾ ದಿಸ್ಲೊ, ತಸೆ ಹೊವ್ನ್ ಅಮಿ ಡಂಗ್ಳಿತ್ ತಿನ್ ದಿಸ್ ಚಲುನ್ ಜಾತಲೆ ತವ್ಡೆ ಧುರ್ ಜಾವ್ನ್, ಅಮ್ಚೊ ದೆವ್ ಸರ್ವೆಸ್ಪರಾಕ್ ಬಲಿ ಭೆಟ್ವುಕ್ ಪಾಜೆ ತಿಯಾ ಅಮ್ಕಾ ಒಪ್ಕಿ ದಿ" ಮನುನ್ ಇಚಾರಾ. 19 ಖರೆ ತೊ ಇಜಿಪ್ತಾಚೊ ರಾಜಾ ಕವ್ಡೆ ಸಾಂಗ್ಲ್ಯಾರ್ಬಿ ತುಮ್ಕಾ ಸೊಡಿನಾ, ಮನ್ತಲೆ ಮಾಕಾ ಗೊತ್ತ್ ಹಾಯ್. 20 ತಸೆ ಹೊವ್ನ್, ಮಾಜೊ ಹಾತ್ ಉಕ್ಲುನ್ ಇಜಿಪ್ತಾತ್ ಅಜಾಪಾಚಿ ಕಾಮಾ ಕರುನ್ ಲೈ ನಮುನ್ಯಾಚಿ ತರಾಸಾ ದಿತಾ, ತೆಚ್ಯಾ ಮಾನಾ ರಾಜಾ ತುಮ್ಕಾ ಸುಟ್ಕಾ ಕರ್ತಾ.

21 "ಮಾಜ್ಯಾ ಲೊಕಾಕ್ನಿ ಇಜಿಪ್ತಾಚಿ ಲೊಕಾ ದಯಾ ದಾಕ್ವಿ ಸಾರ್ಕೆ ಕರ್ತಾ, ತಸೆ ಹೊವ್ನ್ ತುಮಿ ಥೈತ್ನಾ ಜಾತಾನಾ ಖಾಲಿ ಹಾತಾನಿ ಜಾತಲೆ ಹೊಯ್ನಾ. 22 ತುಮ್ಚಿ ಹರ್ ಎಕ್ ಬಾಯ್ಕೊ ಮಾನುಸ್ ಅಜುಭಾಜುಚ್ಯಾ ಬಾಯ್ಕಾಂಚ್ಯಾಕ್ನಾ ಅನಿ ತುಮ್ಚ್ಯಾ ಘರಾತ್ನಿ ಹೊತ್ತ್ಯಾ ಬಾಯ್ಕಾ ಮಾನ್ಸಾಂಚ್ಯಾಕ್ನಾಬಿ ಚಾಂದಿ, ಸೊನ್ಯಾಚಿ ವಸ್ತಾ ಅನಿ ಕಪ್ಡೆ ಮಾಗುನ್ ಘೆಂವ್ದಿತ್, ತೆ ತುಮ್ಚ್ಯಾ ಪೊರಾ ಬಾಳಾಕ್ನಿ ನೆಸ್ವಾ ಅಸೆ ಇಜಿಪ್ತಾಚ್ಯಾ ಲೊಕಾಂಚ್ಯಾಕ್ನಾ ಲುಟಿ ಕರುನ್ ಘೆವ್ನ್ ಜಾತ್ಯಾಶಿ" ಮಟ್ಲ್ಯಾನ್.