Kyenesis 29

Yakob Lakyɛ Aalaabuo Laban Leyo.

1 Yakob layefe osuku aasifi ni aalaadu kufĩ katunkɔ batii nsɔ suoto nɛ. 2 Ni aanya ditubiɔ ninwii late di kasɔ nwu suoto, bafoso akyuu atiɛ nte ni di ɔlɔɔkɔ; diekye ditubiɔ nwu kamɛ mandu ntu manta bafoso nwu nkpo nnyi nɛ. Difuɔ dibinte latĩi ditubiɔ nwu kanya. 3 Obe lele nse bafoso nwu nkpo bamuu ntɔbasi yi, nse bafosobakpatɛ nwu ntoomunusa difuɔ nwu di ditubiɔ nwu kanya bɛɛta bafoso nwu ntu beenyi. Nse batookple beemunusa difuɔ nwu beetĩi ditubiɔ nwu kanya.

4 Yakob lakaalɛ bafosobakpatɛ alɛ, <<Babiloo, ɔfɛ biekye?>>

Ni baatɔkɔ nwɔ alɛ, <<Buokye Haran.>>

5 Ninfɛ aakaalɛ ma alɛ, <<Biye Laban, Nahor ɔwa?>>

Ni baatɔkɔ nwɔ alɛ, <<Yii, buye nwɔ.>>

6 Ninfɛ di Yakob lakaalɛ ma alɛ, <<Sikpe nwɔ osie?>>

Ni baatɔkɔ nwɔ alɛ, <<Yii, sikpe nwɔ osie, nnya obisankobi nɔɔ Rahel nikɔwa ku bafoso nɛ.>>

7 Ninfɛ di Yakob labuɛ alɛ, <<Binyu, kale diiloo biakpee ni bafoso nwu. Bita ma ntu banyi biekplesa ma bisifiko baalawee sɛfa.>>

8 Ninfɛ baadiki kanya alɛ, <<Bulɔbafuo ɔbla nkpo diɛlaase di obe wɔ di bafoso nwu bamuu ntoosi ni fiɛ bubamunusa difuɔ nwu di ditubiɔ nwu kanya munta ma ntu mannyi.>>

9 Di obe wɔ ayɛ ɔɔkakatɛko ma nii, ni di Rahel lakye aawa ku ote bafoso nɛ, diekye ɔsanko bafosokpatɛ aale. 10 Di obe wɔ di Yakob lanya ni ɔfa nɔɔ Laban obisankobi Rahel ku bafoso nɔɔ yi, ni aakyɛ aalaamunusa difuɔ nwu di ditubiɔ nwu kanya aata ɔfa nɔɔ bafoso ntu baanyi nɛ. 11 Ninfɛ di Yakob lafĩfĩɔ Rahel akpoo nɛ, ninfɛ aakyako kaku owi nɛ, ta suoto lɛyɔɔ oso. 12 Ninfɛ aatɔkɔ Rahel alɛ, teefɔ ɔnantii nle, Rebeka obisuɔtɔbi nle. Nioso Rahel latoso aasifi aalaatɔkɔ ote.

13 Nfanwu, di Laban lanu ni Yakob ɔlaa wɔ mmle alɛ obilɛma sankobi obisuɔtɔbi ale nii, ni aapɛsɛwa aalaakyakako nwɔ nɛ. Ninfɛ aaminiko nwɔ, aafĩfĩɔ nwɔ akpoo, ni aakpaa nwɔ aasifiko leyo nɛ. Nfa nfɛ di Yakob latɔkɔ nwɔ sɛlaa se mmle simuu nɛ. 14 Ninfɛ di Laban latɔkɔ nwɔ alɛ, <<Ami omu ntɔ fale.>>

Yakob Layɔ Lea Ku Rahel.

Obe wɔ di Yakob lasiɛ ni di ɔkyɛ nɔɔ kɔwɛntɛ, 15 ni di Laban latɔkɔ nwɔ alɛ, <<Di ami omu ɔnantii fale nii, faabla ɔkpɛ fantɛɛ kasakasa? Tɔkɔ mi lɛsaa le fabafũ ni.>>

16 Laban lawɛ babisankobi banyɔ, ɔkasale leyooto niale Lea, ɔnyɔɔfa leyooto niale Rahel. 17 Lea anu kaamɛ labla buɛɛ, kafɔɔ Rahel lalɛ sekpeele kaakɔ biala. 18 Nioso Yakob labɔmbɔ Rahel ni aabuɛ alɛ, <<Kamabla ɔkpɛ nta fɔ alɛɛ akuɛnsĩ fan-yɔ obisankobi lɛfɔ Rahel fantɛɛ n-yɔ.>>

19 Ninfɛ di Laban labuɛ alɛ, <<Dilɛ dilenke alɛ kayɔ nwɔ nta fɔ fan-yɔ, alɛ kayɔ nwɔ nta osuɔtɔ bamba. Siɛ di ɔkyɛ nii.>> 20 Nioso Yakob labla ɔkpɛ alɛɛ akuɛnsĩ alɛ aayɔ Rahel, ote ko diate nwɔ fɛ ayi asɛɛ ko dile ta lɛbɔmbɔ le aawɛ aatɔɔ ni osie kanya oso.

21 Ninfɛ di Yakob latɔkɔ Laban alɛ, <<Yɔ ɔsɔfɔ nii fatɛɛ, diekye obe nii ntoowo, komiɛ nlɛ munko nwɔ bute.>>

22 Nioso Laban lawa ɔsanko ɔyɔ alesaa aakyakako batii bamuu ninfa. 23 Kafɔɔ obe wɔ di kale laloo nii, Laban layɔ obisankobi nɔɔ Lea aata Yakob, ni manko Yakob baalate nɛ. 24 Ni di Laban layɔ ɔlanle sankobi nɔɔ Silfa aata obisankobi nɔɔ Lea alɛ ale nwɔ kpɛmblatɛ nɛ.

25 Obe wɔ kaale lasɛ nii, Lea di Yakob lanya. Nioso Yakob lakaalɛ Laban alɛ, <<Obe lɛsaa fɛɛbla mi nkpo nɛ? Diele Rahel labla ɔkpɛ lata fɔ nlɛ kɔyɔ? Ni be lɛsaa oso nfɛ fɛɛkyɔnkyɔ mi?>>

26 Ni di Laban ladiki kanya alɛ, <<Di okpoo loo ɔsaabla kanya yi, man-yɔ obi bisɔ baata kɔsa fiɛ di ɔnɔɔfole. 27 Nioso afɔ yɛntɛ nawɔkyi wɔ mmle ɔsanko ɔyɔ ɔsaabla, ni kamayɔ obisɔnle kafɔɔ nta fɔ, nse fabakple fambla ɔkpɛ fantɛɛ alɛɛ akuɛnsĩ bamba.>>

28 Yakob latuna di ɔlaa nwu suoto. Nioso aaloo ni nawɔkyi nwu nkpo ɔsaabla ku Lea yi, ni di Laban layɔ Rahel obisankobi nɔɔ kafɔɔ aatɔɔ aayɔ nɛ. 29 Ni di Laban layɔ ɔlanle sankobi nɔɔ Bilha aata obisankobi nɔɔ Rahel alɛ ale nwɔ kpɛmblatɛ nɛ. 30 Ninfɛ di Yakob late ku Rahel kafɔɔ nɛ, aabɔmbɔ Rahel aalenkee Lea. Ninfɛ di Yakob lakple aabla ɔkpɛ alɛɛ akuɛnsĩ bamba aata Laban nɛ.

Yakob Babi.

31 Obe wɔ di SAATE nwu lanya alɛ Yakob dilɔɔbɔmbɔ ni Lea yi, ni aatɔɔ aakyako babi olofo nɛ, kafɔɔ Rahel layibla ɔlɛma. 32 Lea labalaka lɛmɛ ni aalofo obisuɔtɔbi nɛ. Ninfɛ aatɔɔ leyooto alɛ Ruben nɛ. Ni aabuɛ alɛ, <<Ta di Saate ntɔɔnyɛɛ ni nyaami oso, lefũ lenu nlɛ ɔsa nii nfɛ mabɔmbɔ mi.>>

33 Aakple aalaka lɛmɛ, ni aalofo osuɔtɔbi bamba nɛ. Ni aabuɛ alɛ, <<SAATE nwu ntookple ɛɛtɛɛ osuɔtɔbi wɔ mmle kafɔɔ, diekye aanu alɛ batabɔmbɔ mi,>> nioso aatika nwɔ leyooto alɛ Simeon.

34 Aakple aalaka lɛmɛ, ni aalofo osuɔtɔbi bamba nɛ. Ni aabuɛ alɛ, <<Nunua ɔsa nii nfɛ manuankaa mi di suoto diekye ntoolofo babisuɔtɔbi batiɛ lɛtɔɔ.>> Ninfɛ aatika nwɔ leyooto alɛ Lewi nɛ.

35 Aakple aalaka lɛmɛ, ni aalofo osuɔtɔbi bamba nɛ. Ninfɛ aabuɛ alɛ, <<Nunua kamatansa Saate nwu,>> nioso aatika nwɔ leyooto alɛ Yuda. Ninfɛ aadiɛ babi olofo nɛ.