1 Di obe owo sɛmaa, Egipte ɔka nta nyɛɛnɛtɛ ku bloblo fiɛtɛ nɔɔ labla okpile di saate lɛma Egipte ɔka suoto. 2 Ni di Farao lanya ɔblɔ di banyɔ lɛma suoto, nta nyɛɛnɛtɛ nɔɔfo ku bloblo fiɛtɛ nɔɔfo nwu nɛ. 3 Nioso aayɔ ma aalaatɛ leeyo katenkɔ di asaa banyuntɛ kanyayilatɛ leyo. Leyo katenkɔ nwu kafɔɔ baatɛ Yosef nɛ. 4 Asaa banyuntɛ kanyayilatɛ nwu layɔ ma aakpee di Yosef nnɛɛ, alɛ atoonyu ma.

Baate ni leeyo katenkɔ nwu dialaadu ni obe owo, 5 dii ninwii kakyɛ basuɔtɔ nwu banyɔ niate ni leeyo katenkɔ, nta nyɛɛnɛtɛ ku bloblo fiɛtɛ nwu baasɛ alaafɔ ate ate. Kubiala lawɛ lɛsɔdiki nɔɔ lete.

6 Kaleesɛ di Yosef lakyɛ ni ɔkyɛ lɛma, aanya alɛ suoto ditatɔɔyɔɔ ma. 7 Nioso aakaalɛ Farao banɔɔfotii nwu niate ni di leyo kantenkɔ ku nnwɔɔ di saate nɔɔ leyo alɛ, <<Be oso bite biɔɔ nkpo miɛ?>> 8 Ni baadiki kanya alɛ, <<Batii loo banyɔ buɔsɛ alaafɔ, kafɔɔ otii kuonwii nnaa abadiki kasɔ anta wo nii.>>

Ni di Yosef latɔkɔ ma alɛ, <<Diele Yaa ninfuo alaafɔ kasɔ odiki? Bika mi alaafɔ lee nwu.>>

9 Nioso ɔnɔɔfo wɔ niale ni nta nyɛɛnɛtɛ laka Yosef kɔlaafɔ nɔɔ. Aaka nwɔ alɛ, <<Di kɔlaafɔ nii kamɛ, lanya awosobi kowoso di anu nii, 10 ɛla etiɛ niawɛ kowoso nwu. Di sɛnya labɔkɛtɛ ɔbɔkɛtɛ di sɛla nwu suoto ni di atoto labɔkɔtɛ aatika awosobi akudi ya niabe ni nɛ. 11 Laklee Farao opũ di kɔnɛɛ nii, ni layɔ awosobi nwu, laka nya ntu lakpete di Farao opũ kamɛ. Ni layɔ lakpee nwɔ kɔɔnɛɛ nɛ.>>

12 Ninfɛ di Yosef latɔkɔ nwɔ alɛ, <<Kɔlaafɔ nwu kasɔ ninle alɛ, ewosola etiɛ nwu ninle ayi atiɛ nɛ. 13 Di ayi atiɛ kamɛ Farao kamadiki fɔ di leyo katenkɔ, ankplesa ɔkpɛ lɛfɔ wɔ faatɔɔbla ni anta fɔ. Fabayɔ nta ku opũ fanta Farao fɛle mmle faatɔɔbla ni saa fɛ nta nyɛɛnɛtɛ. 14 Kafɔɔ nse asaa amuu lɛlɛ fɔ ɔkyɛ faanyuma mi faale mi sibualɛ; lɛɛ mi leyooto fata Farao aadiki mi di leyo katenkɔ. 15 Diekye ɔkpaa baakpaa mi osie ku osie baadieko di batii nii nfũ di Hebri kasɔ suoto, di nfũ mmle kafɔɔ nimbla lɛsalɛsaa fiɛ bɛɛbatɛ mi leeyo katenkɔ.>>

16 Ninfɛ di bloblo fiɛtɛ nɔɔfo lanu ni Yosef kɔlaafɔ lɛsɔdiki lalɛ nii, ni aatɔkɔ Yosef alɛ, <<Amii lasɛ kɔlaafɔ nlɛ: Bloblo nkyikyɛ ntiɛ ntika mi diisi. 17 Di osi kale kamɛ alesaa ateate ya amuu bɛɛfiɛ bɛɛta ni Farao nsi kaamɛ, kafɔɔ bakansiɛ latoole nya di kakyikyɛ nwu kamɛ di disi nii.>>

18 Ni di Yosef latɔkɔ nwɔ alɛ, <<Kɔlaafɔ nwu kasɔ ninle alɛ, nkyikyɛ nwu ntiɛ ninle ayi atiɛ. 19 Di ayi atiɛ kamɛ Farao kamata mandiki fɔ di leyo katenkɔ, anta mambudi fɔ disi, man-yɔ ditiki lɛfɔ mansaka di kowoso suoto. Bakansiɛ mmakyɔkyɔfɛ fɔ suoto sina.>>

20 Dii tiɛfa nwu niale Farao lelofoyi, ni aale dii aalɛɛ banɔɔfotii nɔɔ bamuu nɛ. Ni aadiki nta nyɛɛnɛtɛ nɔɔfo ku bloblo fiɛtɛ nɔɔfo di leyo katenkɔ aawako banɔɔfotii nɔɔ nwu anu nɛ: 21 Ni aakplesa nta nyɛɛnɛtɛ nɔɔfo ɔkpɛ nɔɔ aatɔɔ, nioso aakple aatɔɔnyɛɛnɛ nta aatɔɔta Farao, 22 kafɔɔ aata baasaka bloblo fiɛtɛ nɔɔfo nwu, fɛ mmle okle di Yosef ladiki ni alaafɔ nwu kasɔ aata ma nii.

23 Kafɔɔ nta nyɛɛnɛtɛ nɔɔfo nwu ditanyuma Yosef; aayee nwɔ.