1 Haane, k’orane ək’elin qoyt’al,

hikmətın axtıda ona’a.

2 Axtıne cigabışee, yəqqı’ne mıglek,

yəqbı cureedaxhene cigee ulyobzur.

3 Şaharne akkabışisnee,

ı’kkəəne cigabışee axtıra qoyt’al:

4 «İnsanar, zı şolqa ona’a,

vuşde gırgıng’ulqa zı ghal aaqa.

5 Caahilyar, ı’mreqa k’oraba ilyaake,

beynyavabı, ək’eleeqa qudoora.

6 K’ırı alixhxhe, zı geed ıkkanne karane hək’ee eyhe,

zı qotkuyn eyhesva ghal aaqa.

7 Yizde ghalen hək’en eyhe,

yizda miz pisınçile həlyvəəq’ənna.

8 Yizde ghalençe qı’ğəən gırgın qotkuyn vod,

yizde cuvabee quç’otkuriyvallayiy hor deşin.

9 Zı uvhiyn gırgın ək’elynanbışilqa hiyxharan,

ats’al aveykiynbışdemee, man qotkuyn vodun.

10 Nuk’rayle ooqa yizın terbiye aqqe,

məttıne k’ınəəğəyle ooqad ats’al aqqe.

11 K’orana ək’el, gıranne g’ayebışile gıranba vob,

yik’es ıkkanan nencad mançika sa aqqas dexhe.

12 Zaqa, hikmətıqa, ats’aliy şu’ur vob,

yizda k’anena hambaz k’orana ək’el vob.

13 Rəbbile qəyq’ənang’uk’le pisın g’ımece vod.

Vuceecar vuc xərra, axtıra ıkkiy, pisda yəq apk’ıniy,

horana miz hav’uy zak’le g’ımece vod.

14 Mısləhətiy şu’ur yizda vob,

zaqa k’orana ək’el, guc vob.

15 Zaleğana paççahaaşe xəbvalla haa’a,

vuk’lek vukkekkanbışe qotkuyn q’aanunbı oyk’an.

16 Qopkuba vuk’lek vukkekkane gırgıne ç’ak’ınbışe

zaleğana xəbvalla haa’a.

17 Zı ıkkananbı zasıb vukkananbı,

zı t’abal ha’anbışik’le zı aveykesda.

18 Kariy qıvaats’iyvalla,

gyatsts’ı-gixhxhiyvalla, qopkuvalla yizde k’ane vod.

19 Yizın şagav məttıne k’ınəəğəyle,

zaken xayir g’əyxiyne nuk’rayle gıranda vod.

20 Zı qopkuvaline yəqqə,

adaaletne yəqqə iykar.

21 Zı ıkkananbı karalqa hivxhar haa’a,

xaazinabı gyatsts’a’a.

22 Rəbbee zı Cune işbışde q’oma irxhın,

gırgıne itxhınne karbışile ögee zı ıxha.

23 Gırgın ixhanassecad,

dyunye ixhanassecad zı vornaniy.

24 K’oran deryahbı ixhessecad,

xhyanıka gyatsts’ıyn xhyan ı’lqəən cigabı ixhessecad zı ıxhana.

25 Suvabı çine cigeeqa gixhxhessecad,

tepabı ixhessecad zı vornaniy.

26 Allahee ç’iyeyn aq’va, qadaalybı,

ts’ettiyn tooz itxhıning’a,

27 xəybı çine cigeeqa giyxheng’a, zı maa’ar ıxhana.

K’orane xhinel oğa gırgale ts’ıts’aamee,

28 buludbı xəəqə giyxhemee,

k’oralybışeedın xhyan ı’lqəən cigabı it’um hı’ımee,

29 xhyanbı Cune əmreençe qığmeeç’ecenva deryahıs sarhad ts’ıts’aamee,

ç’iyeys xhebbı giyxheng’a,

30 zı Allahne k’ane işniy g’ooce.

Yiğıs zı Mang’una ulyniy şadaa’a,

Mang’une ögiylir şadexhenaniy.

31 Zı dyunyeynemeeyiy

insanaaşinemee şadexhenaniy.

32 Həşde, dixbı, zal k’ırı alixhxhe.

Yizda yəq avquynbı nimee baxtivarariy!

33 Zı helene terbiyel k’ırı alixhxhe, man g’ılymadaççe

k’orana ək’elynanbı vuxhe.

34 Zal k’ırı iliyxhena, yiğıs yizde xaasne,

yizde akkayne ögil ulyorzulyna nimee baxtivariy!

35 Zı aveykıng’uk’le ı’mı’r iveeke,

Rəbbir mang’uka yugra ixhes.

36 Zı xılençe g’aykkiyng’vee cukun ha’a,

zı şavuk’leyiy g’ımece mang’us qik’as ıkkiykan».