1 जेबे यारोबाम लगभग ठारा साला तक इस्राएलो पाँदे राज करने लगी रा था, तेबे अबिय्याह यहूदा रा राजा बणेया। 2 से तीऊँ साला तक यरूशलेम शईरो दे राज करदा रया। ओर तेसरी माया रा नाओं मीकायाह था; जो गिबा रे रणे वाल़े ऊरीएलो री बेटी थी। यहूदा रे राजा अबिय्याह ओर इस्राएलो रे राजा यारोबामो बीचे लड़ाई ऊई। 3 अबिय्याह तो 400,000 सिपाईया खे लई की लड़ने खे गया ओर यारोबाम 800,000 सिपाईया खे लई की तेस सामणे लड़ने खे आया।

4 तेबे अबिय्याह समारैम नाओं रे पाह्ड़ो पाँदे, जो एप्रैमो रे पाह्ड़ी इलाके पाँदे ए, खड़ा ऊई की बोलणे लगेया, "ओ यारोबाम, ओ सारे इस्राएलियो, मेरी सुणो। 5 क्या तुसा खे नि जाणना चाईयो कि इस्राएलो रे यहोवा परमेशरे लूणो री वाचा✝13:5 लूणो री वाचा गिण. 18:19 बानी की दाऊद ओर तेसरे कुलो खे इस्राएलो रा राज्य सदा खे देईता रा। 6 तेबे बी नबातो रा पाऊ यारोबाम जो दाऊदो रे पाऊ सुलैमानो रा काम करने वाल़ा था, से आपणे स्वामिए रे खलाफ उठी रा। 7 तेसगे अल़्के ओर नीच माणूं कट्ठे ऊईगे रे ओर जेबे सुलैमानो रा पाऊ रहूबियाम बच्चा ओर उतावल़े मनो रा था ओर तिना रा सामणा नि करी सको था, तेबे सेयो तेसरे खलाफ तागतबर ऊईगे। 8 एबे तुसे सोचोए कि आसे यहोवे रे राजो रा सामणा करूँए, जो दाऊदो री ल्वादा रे आथो दे ए; कऊँकि तुसे सब मिली की बड़ा समाज बणी गे रे ओर तुसा गे सेयो सूईने रे बाच्छूए री मूर्तिया बीए, जो यारोबामे तुसा रा देवता ऊणे खे बणवाया। 9 क्या तुसे यहोवे रे पुरोईता खे, मतलब हारूणो री ल्वाद ओर लेवी लोक निकयाल़ी की दूजे देशा रे लोका जेड़े पुरोईत नि राखी राखे? जो कोई एक बाच्छू ओर सात खाडू आपणा संस्कार करने खे ली आओ था, से तिना रा पुरोईत ऊई जाओआ, जो परमेशर नि ए। 10 पर आसा लोका रा यहोवा परमेशर ए ओर आसे से नि छाडेया ओर आसा गे यहोवे री सेवा-टईल करने वाल़े पुरोईत, हारूणो री ल्वाद ओर आपणे-आपणे कामो दे लगे दे लेवी ए। 11 सेयो हर रोज प्यागा-साँजा यहोवे खे होमबलि ओर खुशबूदार द्रव्य रा तूप बाल़ोए ओर शुद्ध मेजो पाँदे पेंटा री रोटी सजाओए ओर सूईने री दीवट ओर तिजी रे दिऊए साँजा-साँजा खे बाल़ोए; आसे तो आपणे परमेशर यहोवे री आज्ञा खे मानदे रये, पर तुसे से छाडीता रा। 12 देखो, आसा साथे म्हारा परदान परमेशर ए ओर तेसरे पुरोईत तुसा रे खलाफ साआ बानी की बजाणे खे तुरहिया लई की बी आसा साथे ए। ओ इस्राएलियो, आपणे बुजुर्गा रे परमेशर यहोवे साथे नि लड़ो, कऊँकि तुसे सफल नि ऊणे।"

13 पर यारोबामे काणे वाल़े तिना पीछे पेजी ते, सेयो तो यहूदा रे सामणे थे ओर काणे वाल़े तिना पीछे थे। 14 जेबे यहूदिये पीछे मूँ फेरेया, तेबे देखेया कि आसा रे आगे ओर पीछे दुँईं तरफा ते लड़ाई ऊणे वाल़ी ए; तेबे तिने यहोवे री दुहाई दित्ती ओर पुरोईत तुरहिया खे बजाणे लगे। 15 तेबे यहूदी मर्दे जयजयकार कित्ती ओर जेबे यहूदी मर्दे जयजयकार कित्ती, तेबे परमेशरे अबिय्याह ओर यहूदा रे सामणे, यारोबाम ओर सारे इस्राएली काये। 16 तेबे इस्राएली यहूदा रे सामणे ते नठे ओर परमेशरे सेयो तिना रे आथो रे करीते। 17 अबिय्याह राजे ओर तेसरी प्रजा रे लोके सेयो बड़ी मारा साथे मारे एथो तक कि इस्राएली लोका बीचा ते 500,000 सिपाई काये। 18 तेस बखते तो इस्राएली दबी गे ओर यहूदी इजी बजा ते प्रबल ऊए कऊँकि तिने आपणे पितरा रे परमेशर यहोवे पाँदे परोसा राखेया था। 19 तेबे अबिय्याहे यारोबामो रा पीछा करी की तेसते बेतेल, यशाना ओर एप्रोन शईर ओर तिना रे गाँवो लई ले। 20 अबिय्याह री पूरी जिन्दगी यारोबाम फेर तागतबर नि ऊआ ओर यहोवे से एड़ा मारेया कि से मरी गा। 21 पर अबिय्याह ओर बी सामर्थी ऊईगा ओर तिने चौदा जवाणसा साथे ब्या कित्तेया, जिना ते बाई माठे ओर सोल़ा बेटिया पैदा ऊईया। 22 अबिय्याह रे काम ओर तेसरा चाल-चलण ओर तेसरे वचन, इद्दो नबीए री कताबा दे लिखी राखे।