Deuteronômio 6

महा-आज्ञा

1 यो सेयो आज्ञा, बिदिया ओर नियम ए जो तुसा खे सिखाणे री परमेशर यहोवा माखे आज्ञा देई राखी कि तुसे तिना खे तेते प्रदेशो रे मानो जेतेरे मालक ऊणे खे यरदन नदिया ते पार जाणे वाल़े ए। 2 तूँ ओर तेरा माठा ओर तेरा पोता परमेशर यहोवे रा डर मानदे ऊए तेसरी तिना सारी बिदिया ओर आज्ञा पाँदे, जो आऊँ ताखे सुणाऊँआ, आपणी पूरी जिन्दगी चलदा रओ, जेते कि तूँ जादा उम्रा तक बणेया रा रओ।

3 ओ इस्राएल सुण, ओर एड़ा ई करने री चौकसी कर; ताकि तेरा पला ओ ओर तेरे पितरा रे परमेशर यहोवे रे वचनो रे मुताबिक तेस प्रदेशो रे जो बऊत ई पजणे वाल़ा देश ए, तुसे अणगिणत ऊई जाओ।

4 ओ इस्राएल सुण, यहोवा आसा रा परमेशर एक ई यहोवा ए;*6:4 मरक 12:29-33 5 ओर तूँ यहोवा आपणे परमेशरो साथे आपणे पूरे मनो ते, पूरे प्राणो ते, पूरे दमाको ते ओर आपणी पुरिया तागता ते प्यार कर।*6:5 मत्ती 22:37, लूक 10:27 6 यो आज्ञा जो आऊँ आज ताखे सुणाऊँआ सेयो तुसे सदा याद राखणियां। 7 ओर तैं यो आपणे बाल-बच्चेया खे समजयाई की सिखाणियां ओर कअरे बैठे रे, बाटा रे चलदे, लेटदे, उठदे इना री चर्चा करदे रणा।*6:7 इफिसि 6:4 8 यो आपणे आथो रे चिह्नो रे रूपो दे बानणियां ओर यो तेरी आखी बीचे टीके रा काम करो।*6:8 मत्ती 23:5 9 यो आपणे-आपणे कअरो री चौखटा रे कनारे ओर आपणे प्रवेश द्धारो पाँदे लिखणियां।

आज्ञा खे ना मानणे री चेतावणी

10 जेबे तेरा परमेशर यहोवा ताखे तेते प्रदेशो रे पऊँचाओ जेतेरे बारे दे तिने अब्राहम, इसहाक ओर याकूब नाओं रे तेरे बुजुर्गा ते ताखे देणे री कसम खाई ओर जेबे से ताखे बड़े-बड़े ओर अच्छे शईर, जो तैं नि बणाए 11 ओर अच्छी-अच्छी चीजा साथे परे रे कअरो दे, जो तैं नि परे ओर खणे रे कुएँ, जो तैं नि खणे ओर अंगूरा रे बगीचे ओर जैतूनो रे डाल़, जो तैं नि लगाए, इना सारिया चीजा खे जेबे से देओ ओर तूँ खाई की रज्जी जाए, 12 तेबे सावधान रणा, केथी एड़ा नि ओ कि तूँ यहोवे खे पूली जाए, जो ताखे गुलामिया रे कअरो ते, मतलब मिस्र प्रदेशो ते निकयाल़ी की ल्याया। 13 तैं आपणे परमेशर यहोवे रा डर मानणा, तेसरी ई सेवा करनी ओर तेसरे ई नाओं री कसम खाणी।*6:13 मत्ती 4:10, लूक 4:8

14 तुसे पराये देवतेया रे, मतलब आपणे चऊँ कनारले प्रदेशो रे लोका रे देवतेया पीछे नि जाणा; 15 कऊँकि तेरा परमेशर यहोवा जो तां बीचे ए, से जल़न राखणे वाल़ा ईश्वर ए; केथी एड़ा नि ओ कि तेरे परमेशर यहोवे रा कोप तेरे खलाफ पड़को ओर से ताखे तरतिया पाँदा ते नाश करी देओ। 16 तूँ यहोवा, आपणे परमेशरो खे नि परख, जेड़ी तुसा रे बुजुर्गे मस्सा रे तेसरी परीक्षा कित्ती थी।*6:16 मत्ती 4:7, लूक 4:12 17 आपणे परमेशर यहोवे रिया आज्ञा, चतौणिया ओर बिदिया, जो तिने ताखे देई राखिया, सावधानिया साथे मानणियां। 18 जो काम यहोवे रिया नजरा दे ठीक ओर सराणे जोगा ओ, सेई करेया करना, जेते कि तेरा पला ओ ओर तूँ तेस खरे प्रदेशो रे जाई की तेतेरा मालक ऊई जा जेतेरे बारे दे यहोवे तेरे बुजुर्गा साथे कसम खाई थी, 19 ताकि तेरे सारे दुश्मण तेरे सामणे ते दूर कित्ते जाओ, जेड़ा कि यहोवे वादा कित्तेया था।

20 तेबे बादो ते जेबे तेरा पाऊ पूछो कि यो चतौणिया, बिदिया ओर नियम, जिना खे मानणे री आज्ञा म्हारे परमेशर यहोवा देई राखी, इना रा मतलब क्या ए?*6:20 इफिसि 6:4

21 तेबे आपणे पाऊए खे बोलणा, "जेबे आसे मिस्रो रे फिरौनो रे गुलाम थे, तेबे यहोवा आपणी बड़ी सामर्था साथे आसा खे मिस्रो री गुलामिया ते छुड़ाई की ल्याया। 22 ओर यहोवे आसा रे देखदे ऊए मिस्रो रे फिरौन ओर तेसरे सारे कराने खे दु:ख देणे वाल़े बड़े-बड़े चिह्न ओर चमत्कार दखाए, 23 से आसा खे तेथा ते छुड़ाई की ल्याया, ताकि आसे एते प्रदेशो रे पऊँची की, जेतेरे बारे दे तिने आसा रे बुजुर्गा ते कसम खाई थी, आसा खे देओ। 24 यहोवे आसा खे इना सबी बिदिया खे मानणे री आज्ञा दित्ती, ताकि आसे आपणे परमेशर यहोवे रा डर मानूँ ओर ईंयाँ सदा म्हारा पला ओ ओर से आसा खे जिऊँदा राखो, जेड़ा कि आजके दिने ए। 25 जे आसे आपणे परमेशर यहोवे रिया नजरा दे तेसरी आज्ञा रे मुताबिक इना सारे नियमा खे मानणे दे चौकसी करूँगे, तो ये आसा खे तार्मिकता ठईरनी।"