36 Dan leet Jesus de Volkjshäaden gonen un jinkj en daut Hus nenn. Un siene Jinja kjeemen no Am un säden: Erkjläa ons daut Jlikjnis vom Onkrut opp däm Aka. 37 Un Hee auntwuad un säd to äant: Dee daut goode Sot seit, es de Menschensän. 38 De Aka es de Welt. Daut goode Sot sent de Kjinja vom Rikj, oba daut Onkrut sent de Kjinja von däm Beesen. 39 De Fient, dee daut seid, es de Diewel. De Eifst es daut Welt-Enj. Un de Drascha sent de Enjel. 40 Jrod soo aus daut Onkrut jesaumelt un met Fia vebrent woat, soo woat daut uk sennen, wan dit Welt-Enj kjemt. 41 De Menschensän woat siene Enjel rutschekjen, un see woaren saumlen ut sien Rikj aul de Oajanissen, un dee doa Jesazlooset doonen 42 un woaren äant en dän Fia-Owen schmieten. Doa woat daut Hielen un daut Tänen-Kjnirschen sennen. 43 Dan woaren de Jerajchte schienen aus de Sonn en äa Voda sien Rikj. Wäa doa Uaren haft toom hieren, däm lot hieren!