Lucas 8

27 Tabɔkɔ Ɔzhizɔsi a wɔma mu kwoda, akwɛyi onzu uwufo uwu bɔkɔ e yi eyo iyeyi a wɔ mu kwuse e kpolo wu. I to kwuye e bɔkɔ onzu ele e lo ekpayi mɛnwu mo ba a ŋɔ mogba mo, mu agariwu gba a ŋɔ le. 28 Tabɔkɔ a ma Ɔzhizɔsi, a tara ikyakwokwo akwɛyi a ta mɛzhi mu idu wu, a wanu mu opwu uwɔkwu tee, <<Kimbe ba ŋɔ ngyi mbala mi, Ɔzhizɔsi, Umɛ uwu Ukpo edego-ala? Mi kpa ŋa ɛshɛku tee ki lo mi inyashi mo!>> 29 E siso ɛlɛ kwuwongu Ɔzhizɔsi a kpa kwundu ungwu ira ɛyi kaa la ku wɔma ku shi ɛnwu iyi onzu le-e. Ku koko ku yi wu wɔwɔ, ba o lo wu ɛyɛ mewo mbala alɛ, o gbo wu mo, tetete a zɛ ɛyɛ ɛnyi ma akwɛyi kwundu kwu rawuma kwu kawa mu ɔsɛ.

30 Ɔzhizɔsi e yo wu tee, <<O ya ŋa tee?>> A gba wu opwu tee <<O ya mi tee <riba,>>> kwuwongu eyombeyi riba i yi mawu. 31 Eyombeyi ɛnyi i kpa Ɔzhizɔsi ɛshɛku kaa le fu mbo mu kwuvɔ ungwu indomo ngwu kwu yi ibɔma mo.

32 Uzhi riba uwu erusu ba o yi mu irimo kɛlɛ mbala mba mu odudu mɔmɔ. Akwɛyi ɛndu iyira ɛnyi i nda Ɔzhizɔsi kwoya tee le shi mbo kaa lo fye mu uzhi uwu erusu ɔwu, akwɛyi Ɔzhizɔsi a nya mba ma tee lo fye. 33 I wɔ kwudu mu onzu awu akwɛyi i fye mu uzhi uwu erusu ɔwu. Uzhi uwu erusu ɔwu ndii u kpɛdɔma tabakɔ erusu mbamba o solomo o fu mu risu akwɛyi embyi o ka mba ma.

34 Enzu wa pya erusu mbamba o ma kiya ingyi ki wo, akwɛyi o rɛnya o fu oga mu kwuse kwɔngu mbala itu. 35 Enzu o wɔ kwudu kaa lo ma kiya ingyi ki wo, akwɛyi tabɔkɔ o bo mbaa Ɔzhizɔsi, o du onzu uwu bɔkɔ eyombeyi i wɔma ma wu awu, a ŋɔma mu idu iyi Ɔzhizɔsi, laa ekpayi mɛnwu, egbo wu i gbama mogba-a; akwɛyi iyi i wombo mo lɛɛbi.