Atos 2

Pheexxiroosika Haaso’a

14 Ookkone wodda Pheexiroosi tommenna mittik welti urreexxi qonqo gikki asse’e ardake’n hiyyeexxi haaso’ee qici: «Ha’no Yihudake bogik manninna Iyyerusaalemi hexxinaaki duuchchi tennee kaddeexxa yaane egendino’a haaso’a anka laqqe. 15 Ta’a reefi gorsiixxe sase saate kademmaxxee ha’no heddina’neeshsha kunni manni machcho’eekeba’a! 16 Yaane kinni tinni kaddeechchi wabeekichchi Iyyu’eeli konneechchi butta haaso’eek hiyyichchi muuxemmaashshaten:

17 « ‹Mageni udumixxe barra’ni kaddaan hiyya’nee qici,

Hafuura anka manjo duuchcha’ni dunannon.

Ha’noxxi labbaxxinna meyyaxxi oose raaga haasotaan.

Ha’noxxi dargaggeeyye edi’a kaddaaxxa waleella uuddaan,

ha’nook geedhe oojjo oojjotaan.✝2:17 Iyu. 2:28-32.

18 Iittaanni eettenne barruwwa’ni labba meyyake anke erganjuwwi hana

Hafuura Anka dunannon;

insa’nenna raaga haasonnaan.

19 Ale iimate’n maso yaanuwwa

kaba buttate’ninna beessissuwwa

iittani munde, giiratanna wiliiletika qayyoota leellishannon.

20 Lumoxxi ulfeessendeexxi Goottiinxi barra dagebaa edidarre

arishsho dukkandaan:

agenjikinna mundetishsha diimmataan.

21 Goottiinka summa ye’aaki duuchchi kinni

anjiremaan.› »

22 «Koo Isira’eelike mannaa! Konne haaso’a laqqe: Mageni isi darree’n oddo ha’noxxe’n mambe’uwwa masooranna beessisuwwa assiyyoti Naazireetik Yessuusi ha’no’n ege’nisheexxa ha’no umo ha’nongenninni egendine’een. 23 Isoo Mageni olima muremmake ifike yaadinninna edixxe ifixxe ege’naashsha ha’noxxe anga’ni sa’isse. Ha’nonna isoo cubbaleeyyetixxe anga’ni fannisemaashshanna reyaashsha assitine.✝2:23 Mat. 27:35; Mar. 15:24; Luq. 23:33; Yoh. 19:18. 24 Yaane kinni Mageni reyotixxe ciiniinto fuggusseexxi reyotenaa’n isoo ke’isseen; reyo abiddeexxi isoo gatisa dandeeteba’a.✝2:24 Mat. 28:5-6; Mar. 16:6; Luq. 24:5. 25 Daawwitinna isixxee hiyyee qici:

« ‹Gootta duuchchi wodda Ani edo uudaannen:

isi midda anke’ni hedhemmaxxee

haranga lele’mabennon.

26 Tennexxe qalbe anxi gammada’neen; haaso’a anke’n gammashsho wo’miteen

ittanni manjunte anxinna addeti hexxaan.

27 Lubbo anxanna moogi giddo waaldabexxo;

Woyyichchi atikinna moogi giddo alo’e gataashsha assitabexxo.

28 Hedhotika ora ege’nannoshsha assitette;

ati edo ane’n gammashsho wonshitatton.›✝2:28 Far. 16:8-11.

29 «Anke dayyuwwa! Edike annuwwi giddii’n mitti Daawwiti reyexxanna moogemeexxa moogi isikinna telchi qico’ni no’o bira hedheexxa ca’a asseennexxi ha’no’n kuloo! 30 Yaane kinni Daawwiti tennee haaso’echchi wabeekake kademmaxxenna Mageni «Horte atixxenaa’ni mitte moote atixxe’ni ofo’lishshannon» hiyyeexxi isi’a kakate uwweeka addachchiisatika haaso’a ege’nemmaxxeten.✝2:30 Far. 132:11; 2 Sam. 7:12-13. 31 Tennenaa’n kexxeexxa Kiristoosi moogi giddo gatabaaxxanna maali isiki alo’abaaxxa ediseexxi uudemmaxxee reyotenaa’ni ke’a Kiristoosixxee haaso’een. 32 Yessuusii konne’e Mageni moogokenaa’ni ke’isseen; no’o duuchchinigi tenne yaane’a dhugaa kulaten. 33 Tennexxe isi Mageniinke midda’ni ulfaate ofo’leechchi uduma Woyyichchi Hafuurixxa addachchiisa Annakenaa’n adhdheexxi tennee uudina’neexxanna laqqina’neexxa no’o’a duneexxi uwwe’een. 34 Daawwiti iimi’a me’ebaan;

Isi umo ifingenninni hiyyeexxi haaso’ee qici,

« ‹Gootti, Gootta anka

35 Naapha atika atixxe lekkake uggidhisanjo assanno qico’ni

Midda anke’ni ofo’li! Hiyye.› »✝2:35 Far. 110:1.

36 «Yoona, ha’noo konne fannote’ni fannissinemmaka Yessuusi’i, Mageni, Goottakenna Kiristoosite asseexxa Isira’eelik ardi duuchchi dhugaati ege’nowwaal!»

37 Mannkinna tenne laqee wodda, qalbe insa’neexxi lumooshsha tuqende’naa Pheexiroosi’ninna wele ergameeyye’n, «No’oke dayyuwwa! Yoona no’o’ta maasinnano?» hiyye.

38 Pheexiroosinna hiyyee qici, «Aadde aage, cubbo ha’noxxinna gattowwaali hiyyendaashsha mitti mitti ha’nongi Yessuusi Kiristoosike summinni Xamaqemme! Mageniixe uwwa kadeeka Woyyichcha Hafuuranna adhdhitinaani. 39 Mageni uwweexxi addachchiisa ha’no’a, ha’noxxe oose’anna bayya hedhemmaake manni duuchchi’aten; iittani Gootti Mageni no’ok ifiba’a ye’aake manni duuchchi’aten.»

40 Pheexxiroosi lebeexxi «Wele heddo hiyyichchinni xexe’achchiisa’ni tenne fuggaalete ilanaa’n anjiremme» hiyyeexxi insa’nee gorse. 41 Insa’nenaa’ni heddi manni hiyyichcho isika adhdheexxi xamaqeme; eettenne barra’n sase kuma geyyaaki manni amane insa’ne’ni lebeme.