1 Abeet GODAWU!

Ta woosa siya;

ta waasoy neekko gakko.

2 Ta metotida gallas

ne sinththa taappe genththofa;

ne hayththa taakko zaara;

tani neekko waassiza wode

taas eeson alla.

3 Ays giikko ta layththay

cuwa mala dhayees;

ta meqeththaykka

tama bonqo mala eexxees.

4 Ta wozinay

away labida maata mala handes;

taas qoodhey kath ixxides.

5 Taas oole daroppe dendoyssan

meqeththi xalla attides.

6 Tani bazzon diza biya kafo

woykko laalettida keeththan

de7iza gutto mala.

7 Tani ichchiin dhiskoy yeenna;

tani keeththa hu7en

barkka uttida kafo mala gidadis.

8 Ta morkketi ubbaa gallas

tana cayeettes;

tana iiseththizayti ta sunth

qanggettida mala qoodida.

9 Tani bidinth dhiille mala qam7adis;

ta afunththaaka

ushshara walakka uyadis.

10 Ne hanqo gaasoninne

ne bosha gaason

ne tana pude denththoosoppe

duge oladasa.

11 Ta de7o layththay omarsa wode

kuwa mala;

tani maata mala meladis.

12 Gido attiin abeet GODAWU!

Neni kawoteththa araatan

mernaas uttadasa;

ne sunththayka yeletappe

yeleta gakkanaas hassa7ettana.

13 Neni Xiyoonis

kiyateth ooththiza wodey

gakkida gishshassinne

wodezikka ha7i gidida gishshas

neni dendada izis qadhettana.

14 Ne oosanchchati izan diza

shuchchata doseettes;

budhettida biittaska

qadhetteettes.

15 Kawoteththati GODAA

sunththaas yayyana;

sa7a kawoti ubbay

iza bonchchana.

16 GODAY Xiyoono zaari essiza wode

izi ba gitateththa bessana.

17 Izi hiyeesata woosaa siyana;

istta shoobbeka kadhenna.

18 Buron yelettanay

GODAA galatana mala

hayssi yiza yeletas xaafetto.

19 GODAY dhoqqan diza

ba geeshsha sohoppe

duge xeellides;

izi saloppe duge

sa7a be7ides.

20 Hessika qashettida

asata waaso siyanaassinne

hayqos pirdettida asata

qashoppe birshanaassa.

21 Hessa gishshas GODAA sunththi

Xiyoonin yootettana;

iza galatay

Yerusalaamen awajjettana.

22 Deretinne kawoti issife shiiqidi

GODAAS he wode goynnana.

23 Izi tani naateteththan dishin,

izi ta minoteththaa

ogen ashshides;

ta daana layththaaka

qaanththides.

24 Histtiin tani,

«Abeet ta Xoossawu!

tani daana layththaa

buro baggasishin

ne tana ekkofa.

Abeet GODAWU!

Neni yeletappe yeleta gakkanaas

daasa» gays.

25 Neni beni sa7a medhdhadasa;

salotikka ne kushe ooso.

26 Heyti ubbay dhayana;

gido attiin neni minna daana;

istti ubbayka

afala mala wurana;

neni istta carqqa

mala laammana;

isttika aadhdhana.

27 Gido attiin awudekka

neni nena;

ne layththay mulekka wurenna.✝

28 Nees ooththizayta nayti

saroteththan daana;

istta zereththayka

ne sinththan minni eqqana.