1 Isra7eeley,

«GODAY nunara donttaakko

nu waananee?

2 Nu morkketi nu bolla dendida wode

GODAY nunara bayndaako,

3 istta hanqoy nu bolla

tama mala eexxida wode

istti nuna paxa mittanashin.

4 Haaththi nuna ekki baanashin;

di7oy nuna mittanashin.

5 Kixa haaththi nuna

maanashin» getto.

6 Nuna nu morkketa achchan

puuzisontta ashshida

GODAY galatetto.

7 Nuni shankkanchchata narxafe

kafoy kessi ekkiza mala

kessi ekkidos;

Yardey duuxxides

nunikka kessi ekkidi attidos.

8 Salonne sa7a medhdhida

GODAA sunththan

nuus maadoy yees.