1 Abeet Xoossawu!

Beni aadhdhida wode

ne ooththida gita miishshaa

nuni siyidos;

nu aawata wodekka

ne ooththidayssa

istti nuus yootida.

2 Kawoteththata neni ne kushen

goodda kessadasa;

nu aawata

istta biittan tokkadasa;

deraa liiqisadasa;

gido attiin

ne kawoteththata aassadasa.

3 Istti bantta mashshan olidi

he biitta oykkibeettenna;

istti xooniday

ba qese minoteththan gidenna.

Gido attiin neni

isttan ufayettida gishshas

ne ushachcha kushey,

ne qeseynne

ne sinththa poo7o wolqqay

hessa ooththides.

4 Ta Xoossawu ta kawoy nena;

Yaaqoobe zereththaas

xoono immiday

Xoosso nena.

5 Nenan gididi nu morkketa

nu oli xoonana;

ne sunththan nunara eqettizayta

nuni yedhdhana.

6 Tani ta tooran ammanettike;

ta giththa mashshayka

tana ashshenna.

7 Gido attiin neni nuna

nu morkketappe ashshaasa;

qasse nuna ixxizayta

neni kawushshaasa.

8 Nuni ubba wode

Xoossan ceeqettoos;

ne sunththaaka mernaas sabboos.

9 Ha7i gidikko ne nuna aggadasa;

qasseka kawushshadasa;

neni nu olanchchatara

issife kezizayssa aggadasa.

10 Nu morkketa sinththafe

nuna baqatissadasa;

nunara eqettizayti

nu aqota bonqqida.

11 Neni nuna dorsata mala shukas

aaththa immadasa;

qasse kawoteththata giddon

nuna laalladasa.

12 Neni ne asaa hiraysson bayzadasa;

gido attiin wodhe demmabeekka.

13 Neni nuna nu shoorotas cashshas,

qasse nu heeran dizaytas qidhessinne

miichchas kessadasa.

14 Neni nuna kawoteththata giddon

haysi7es kessadasa;

istti bantta hu7e nu bolla

qaaththi qaaththi

qidhana mala ooththadasa.

15 Ta ubba wode kawuyadis;

ta sinththi yeella may7ides.

16 He ubbay tana gakkiday

ta morkketi ta bolla

halo kessishin

harati kadhidi miiccida gishshassa.

17 Nuni nena dogontta dishin

woykko ne caaqo qaala

pacinchchontta dishin

hayssi ubbay nu bollan gakkides.

18 Nu wozinay neeppe

guye undudibeenna;

nu tohoy ne ogeppe

gaxa kezibeenna.

19 Gido attiin neni nuna

menththereththada

do7a ogen yeggadasa;

girdi gida dhumankka oladasa.

20 Nu Xoossa sunth

nuni balidaa gidikko

nu kushekka eeqa xoossata

woossanaas miccidaakko,

21 hayssa eroy Xoos xoonanee?

Izi wozinan geemmi diza

xuura ubbaa erees

22 Gido attiin ubbaa gallas

ne gishshas

hayqos aadhdhi imettidos;

shukas efiza dorsata malakka

qoodettidos.✝

23 Abeet Godawu beegga!

Ays dhiskay?

Denda! Mernaas nuna aggofa.

24 Ne sinththa nuuppe ays genththay?

Nu qoheteththanne

nu un7eteththa ays dogay?

25 Nuni duge gudullan yegettidos;

biitta bollaka porccu gidos.

26 Abeet Godawu,

nuna maaddanaas denda!

Ne mernaa siiqon nuna wozza.