1 Abeet GODAWU!

Ta Xoossawu neni taas qotettizaso;

tana gooddiza ubbaafe

neni tana ashsha.

2 Neni tana ashshontta aggiko,

istti tana gaammo mala

menththereththidi,

ooninne ashshonttason

puuzereththana.

3,4 Abeet GODAWU ta Xoossawu!

Tani as qohidaa gidikko,

taas lo7o ooththidaades

iita zaaridaa gidikko,

woykko gaasoykka baynda

ta morkkefe bonqqidaa gidikko,

heyta mala yo7otappe issinokka

tani ooththidaa gidikko,

5 ta morkkey tana gooddi oykko;

tana sa7ankka yedhereththo;

tana biittan yeggidi

ta bonchcho kawushsho.

6 Abeet GODAWU!

Ne hanqon denda eqqa;

eexxiza ta morkketa

hanqo bolla denda;

ta Xoossawu beegga;

tumu pirda pirda.

7 Dereta duulatay

ne yuushozan shiiqo;

neni istta bolla kawota.

8 GODAY kawoteththata bolla pirdees.

Abeet GODAWU!

Taas ta xilloteththa malanne

ta suureteththa mala pirda.

9 Qofanne wozina pilgga eriza

xillo Xoossawu!

Iitata geneza neni dhayssa;

gido attiin xillota saron naaga.✝

10 Xoossi taas gondalle;

wozina xillota

izi ashshiza Xoossa.

11 Xoossay xillo pirdiza Xoossa;

izi gallas gallas

ba hanqo qonccisiza Xoossa.

12 Asi ba nagara paaxidi

simmontta aggiko,

Xoossi ba mashsha leefees;

izi ba wondafeza

dafi oykkees.

13 Izi wodhiza ola

miishshata giigssees;

tama laco mala

popol7u giza

ba toora yiishshaa giigssees.

14 Iitateth shaaridi,

gene qanththatiday wordo yelees.

15 Hara asatas olla bookkida asi

ba bookkida ollan

simmi kundees.

16 Izi ehiza geney

iza hu7es simmees;

iza makkallaykka simmidi

izas gidees.

17 GODAA xilloteththa gishshas

tani iza galatana;

qasse Ubbaafe Dhoqqa

GODAA sunththas

tani galata mazamure yexxana.