1 Abeet GODAWU!

Neni halo kessiza Xoossa;

Abeet halo kessiza Xoossawu!

Ne bonchcho qonccisa.

2 Abeet sa7a pirdizayssoo! Denda!

Otoranchchatas bessiza

qixaate imma.

3 Abeet GODAWU!

Iitati awude gakkanaas

gam7anee?

Istti awude gakkanaas

ufayettanee?

4 Iita ooththiza ubbati

bantta otoro qaalan haasayeettes;

coo ceeqetteettes.

5 Abeet GODAWU!

Istti ne deraa liiqiseettes;

asaa toochcheettes.

6 Istti am7etanne

bete asata wodheettes;

yi7ota siifeettes.

7 Histtidi isttas,

«GODAY nuna be7enna;

Yaaqoobe Xoossi

akeekenna» geettes.

8 Intteno asaa giddofe

dammatoo! Akeekite!

Intteno eeyatoo!

Awude intte eranee?

9 Hayth immida

Xoossi siyennee?

Ayfe medhdhida Xoossi be7ennee?

10 Kawoteththaa seerizayssi

qaxxayennee?

As erateth tamaarsizayssi

baas erennee?

11 GODAY asa qofay dhallonttayssanne

hada gididayssa erees.✝

12 Abeet GODAWU!

Neni seerizaadeynne

neni ne wogappe tamaarsiza

asi anjjettidaade.

13 Iitati kundana ollay

bookettana gakkanaas,

ne iza metoppe shempisaasa.

14 GODAY ba asaa olenna;

izi bayta aggenna.

15 Pirday simmidi xillo pirdas

yoch gidana;

xilloti ubbay

tuma pirda kaallana.

16 Makkallanchchata bolla

ta gishshas eqettanay oonee?

Iita ooththizaytarakka

ta gishshas mootettanay oonee?

17 GODAY tana maaddonttaakko,

tani eeson duufon gelada

sirphi gaana.

18 Abeet GODAWU!

Tani, «Kundana hanays» gishin

ne mernaa siiqoy tana kaafides.

19 Ta wozinay ceecen kumida wode

ne minththeththoy ufays darsees.

20 Wogan zemppidi geella pirdizaadera

neni zuppetanaas dandayay?

21 Xillo asata bolla gene duulateettes;

suure asata bollaka

hayqo pirda pirdeettes.

22 GODAY gidikko taas

tani baqata attiza miixa;

ta Xoossi ta izan

zemppiza wogga zaalla.

23 Istta iitateththaa gishshas

izi istta qaxxayana;

istta nagara gishshas

izi istta dhayssana;

GODAA nu Xoossay

istta dippi histtana.