1 Abeet GODAWU!

Tani nena kumeththa

wozinappe galatana;

malalisiza ne oosoza

ubbaaka ta yootana.

2 Tani nenan ufayettananne

hashshu gaana.

Ubbaafe Dhoqqa Xoossawu!

Tani ne sunththas

galata mazamure yexxana.

3 Ne qoncciza wode

ta morkketi guye simmana;

ne sinththafekka

dhuphetti dhayana.

4 Neni taas xillo pirda pirdadasa;

neni xilloteththan pirdashe

ne kawoteththa araatan uttadasa.

5 Neni kawoteththata seeradasa;

iitatakka dhayssadasa;

neni istta sunththaa

meri mernaaskka qucca diggadasa.

6 Morkketi meri mernaas dhayda;

istta katamatakka

mulera dhoqalla dhayssadasa;

istti mulera dogetti attida.

7 Gido attiin GODAY

mernaas kawotidi dees;

izi pirdanaas

ba araata giigsides.

8 Izi ha alameza

xilloteththan pirdana;

kawoteththata bollaka

tumateththan pirdana.

9 GODAY un7ettidaytas

baqati attizaso;

meto wodetankka

qotetti attizaso.

10 Ne sunththa erizayti

nenan ammanetteettes;

ays giikko GODAWU!

Neni nena koyzayta

yegga aggabeekka.

11 Xiyoonen kawoti uttida GODAAS

galata mazamure yexxite;

izi ooththida ooso

dere ubbaas qonccen yootite.

12 Ays giikko suuth gussizaytas

halo kessiza Xoossi

naaqettidayta waasoza

izi dogenna.

13 Abeet GODAWU!

ta morkketi

tana yedeththizayssa be7a.

Neni taas qadhettada

hayqoppe tana ashsha.

14 Hessika tani Xiyoone asa karen

eqqada nena galatanaassinne

ne ashshidayssan

keeha ufayettanaassa.

15 Kawoteththay ba bookkida

ollan kundides.

Istti qotti woththida woximadey

istta toho oykkides.

16 GODAY ba xillo pirdan erettides;

iita asi ba kushen ooththida

ooso woximaden oykettides.

17 Iitati si7oolen gelana;

Xoossa dogiza kawoteththay

ubbayka istta mala hanana.

18 Hiyeesati aydekka

dogetti attettenna;

woykko manqota hidotay

coo mernaas dhayenna.

19 Abeet GODAWU!

Kawoteththati ba wolqqan dendidi

ne bolla ceeqettontta mala

neni istta bolla pirda.

20 Abeet GODAWU!

Ne istta daganththa;

istti as gididayssa

neni istta erisa.