1 Intteno dere haarizaytoo!

Addaka intte doonappe

xillo haasayay kezizee?

Asa ubbaas xillo pirdeetii?

2 Akkay! Intte wozinan

iita miish halchcheeta;

intte kushey biitta bolla

makkalla ooso ooththees.

3 Iitati ba aayi uloppe doommidi

mooro oge beettes;

yelettida gallassafe doommidi

baletteettessinne wordoteettes.

4 Istti shooshsha mala

marzera deettes;

tulle goppe shooshsha mala

ba hayth tulliseettes.

5 Muurennizayssi ay mala

cincca gidikkoka

goppe shooshshi

iza cenggurssaa siyenna.

6 Abeet Xoossawu!

Istta achchaa menththa;

abeet GODAWU!

Gaammota banqila menththa.

7 Istti gukkiza haaththa mala

dhayetto;

istti dukkiza

wondafe yiishshay dun7o.

8 Istti bishe

muushiza dhaadhdhe mala

gidetto;

poo7o be7ontta awucaya yelettida

naa mala gidetto.

9 Agunththa tamay oto suulisontta

dhayza mala nagaranchchata

ne eeson dhayssa.

10 Nagaranchchata bolla

halo kessizayssa be7idi

xilloti ufayettana.

Iitata suuththan

ba toho meecettana.

11 He wode asay,

«Addaka xilloti ooththida

lo7o oosos

woytoy dees;

tumukka sa7a bolla pirdiza

Xoossi dees» gaana.