1 Abeet GODAWU!

Ne taas wolqqa immida gishshas

ta nena siiqays.

2 GODAY taas zaalla;

tani olappe naagettiza miixa;

izi tana ashshizayssa;

ta Xoossay tani izan

geemetta attiza wogga zaalla.

Izi taas gondalle;

izi tana ashshiza kace;

taas izi mino zemppo.

3 Galatay bessiza GODAA

tani xeygays;

izi ta morkketappe tana ashshees.

4 Hayqo wodoroy tana cuullides;

dhayssiza di7oy tana mittides.

5 Duufo wodoroy tana qachchides;

hayqo woximadey

ta sinththan waaxettides.

6 Tana metoy un7iin

GODAA xeygadis;

«Tana maadda» gaada

ta Xoossas waassadis;

izi ba Keeththan dishe

ta cenggurssaa siyides;

tani waassida waasoy

iza hayththan wodhdhides.

7 Xoossi hanqettida gishshas

biittay qaaxxides;

zumata xaphoy kokkorides.

8 Iza sidheppe

hanqo cuway cuwattides;

iza doonappe

miza tama lacoy kezides;

iza doonappe

xuuggiza bonqoy pulttides.

9 Salo phalqidi wodhdhides;

he wode iza toho garsara

dhippi gida shaaray dees.

10 Kiruben uttidi paallides;

carko qefe ekkidi

pude dendi bides.

11 Bana dhuman kammides;

iza Dunkaaneza dhippi gida

irara shaaray dooddides.

12 Iza sinththan de7iza

gita poo7ozappe shachchinne

wolqqanththi ke7ides;

dhippi gida shaarakka

kanththi ke7ides.

13 GODAY dada mala

saloppe guummides;

Ubbaafe Dhoqqa Xoossay

ba cenggurssa sissides;

wolqqanththaninne

tama lacon qonccides.

14 Ba wondafeza yiishshaa yeddides;

ba morkketakka laallides;

wolqqanththa poo7o kiittidi

istta yedeththides.

15 Abeet GODAWU!

Neni seerida wodenne

ne hanqoy eexxida wode,

gita abbati

ichchida biittay beettides;

qasse sa7a yochchay qonccides.

16 GODAY bollafe ba kusheza

duge yeddidi tana oykkides;

ciimma haaththafe tana kessides.

17 Izi ta bolla wolqqatiza

ta morkketappe,

tana ixxizaytappe ashshides.

18 Tana metoy un7ida gallas

istti ta bolla dendida;

gido attiin GODAY

taas zemppo gidides.

19 Izi tana aaho demban kessides;

tanan ufayettida gishshas

tana ashshides.

20 Ta xilloteththa mala

GODAY taas qanxxides;

ta kushe geeshshateththa mala

izi taas zaarides.

21 Tani GODAA oge kaalladis;

tani ta Xoossa aggada

iita ooththabeekke.

22 Tani iza woga ubbaa naagadis;

iza azazoza polanaappe

guye gabeekke.

23 Tani iza sinththan suure de7adis;

tanateththaa nagarappe naagadis.

24 Hessa gishshas

GODAY taas

ta xilloteththa mala immides;

ta kushey iza sinththan

geesh gidida mala zaarides.

25 Abeet GODAWU!

Ammanettizaytas

neni ammanettaasa;

suuretas neni suure.

26 Geeshshataskka neni geeshsha;

gido attiin geellatas neni geella.

27 Ashketa ne ashshaasa;

gido attiin otoranchchata

kawushshaasa.

28 Abeet GODAWU!

Ne taas xomppaasa;

Xoossay neni taas

dhuma poo7isaasa.

29 Ne maaddiin

tani ta morkketa olays;

ta Xoossa wolqqan tani istta

gimbe bollara guppa aadhdhays.

30 Xoossa ogey suure;

GODAA qaalay ammanettizayssa;

Izakko baqatiza ubbatas

izi gondalle.

31 Xoossafe attiin hara xoossi oonee?

nu GODAAPPE attiin hara zaallay oonee?

32 Taas wolqqa immizaynne

ta oge saro ooththizay Xoossa.

33 Izi ta tohota

genessa toho mala minththees;

tana dhoqqasohotan saroteththan woththees.✝

34 Izi ta kusheta

ola tamaarssees;

hessa gishshas tani ta qesen

xarqimala birata wondafeza

dafada dukkays.

35 Ashshiza ne gondalle taas immadasa.

Ne ushachcha kushen tana zemppisadasa;

taakko ziqqi gaada tana gitasadasa.

36 Ta oge aassadasa;

hessa gishshas ta tohoy handarashibeenna.

37 Ta morkketa tani

yedeththa oykkadis;

tani istta dhayssana gakkanaas

guye simmabeekke.

38 Istti nam7anththo

dendontta mala shocadis;

ta toho garsankka kundida.

39 Olas tana wolqqa gixissadasa;

ta morkketa

ta sinththan gulbatissadasa.

40 Ta morkketa ta sinththafe

guye zaara baqatissadasa;

tana ixxizayta tani dhayssadis.

41 Banttana maaddana mala waassida;

gido attiin ooninne istta ashshibeenna.

GODAA istti xeygida;

gido attiin izi isttas koyibeenna.

42 Carkoy pittidi efiza gudulla mala

tani istta ooththadis;

ogen de7iza urqqa malakka

istta yedhettadis.

43 Makkalla asappe tana ashshadasa;

ne tana kawoteththata ayssizaade

histta shuumadasa;

ta erontta derey

taas haarettides.

44 Tana erontta allaga derey

taas azazettees;

istti ta goobateththaa siyidi

taas ziggeettes.

45 Istti yashshan kaha dhayeettes;

bantti naagiza miixappe kezidi

kokkorishe taakko yeettes.

46 GODAY de7o Xoossa!

Ta zemppiza

wogga zaallay galatetto!

Tana ashshida Xoossay

dhoqqu dhoqqu go!

47 Izi ta halo kessiza Xoossa;

kawoteththata taas haarisiza Xoossa.

48 Ta morkketappe tana ashshaasa;

Abeet GODAWU!

Neni ta morkketa bolla

tana dhoqqu dhoqqu histtaasa;

makkallanchcha asatappe

neni tana ashshaasa.

49 Hessa gishshas tani nena

kawoteththata sinththan galatana;

tani ne sunththa yeththan sabbana.✝

50 Xoossi ba kawoththida kawos

xoono bolla xoono immees.

Ba tiydayssas kiyateththa bessees;

Dawitesinne iza zereththatas

mernaas hessaththo ooththees.