1 GODAA galatite!

Izi kiya gidida gishshas,

iza siiqoykka

mernaas gidida gishshas

GODAA galatite.✝

2 GODAY ooththida wolqqama

ooso yootanaas,

woykko iza galata

ubbaa qonccisanaas

dandayzay oonee?

3 Pirday geellattontta mala

naagizaytinne

ubba wode xillo ooththizayti

anjjettidayta.

4 Abeet GODAWU!

Neni ne asaa maaddiza wode

tana qoppa;

istta neni ashshiza wode

tanakka alla.

5 Hessika ne doorida asaas

sa7ay kiyiin tani beyana mala,

ne asaa ufayssa

tani ufayettana mala,

ne nayti bonchchettida gaason

tanikka ufayssan

magulana malassa.

6 Nuni nu aawata mala

nagara ooththidos;

mooronne iita ooththidos.

7 Nu aawati Gibxen de7iza wode,

ne malalisiza ooso

qoppibeettenna.

Ne siiqo daroteththaa

istti akeekibeettenna;

Zo7o abba lanqen makkallida.✝

8 Gidikkoka izi ba sunththaa

gishshas, ba gita

wolqqa erisanaas

istta ashshides.

9 Izi Zo7o abba seerides;

abbayka melides;

bazzon kaaleththizayssa mala

ciimma giddora

istta kaaleththidi pinththides.

10 Izi istta

ixxizayta kusheppe ashshides;

morkketa kusheppe

istta wozzides.

11 Istta morkketa haaththi mittides;

isttafe issoyka attibeenna.

12 He wode Isra7eeleti

iza qaala ammanida;

iza yeththan sabbida.✝✝

13 Gidikkoka istti izi ooththoyssa

heerakka dogida.

Iza zore naagontta

bantti koyidayssa ooththida.

14 Istti bazzo biittan keehi amottida;

qasse mela biittankka

Xoossa paaccida.

15 Hessa gishshas izi

istti woossidayssa immides;

gido attiin istta shemppos

gilqateth kiittides.✝

16 Asati bazzon dunkaani dishe

Musenne GODAAS dummatida

aylle Aaroone

qanaatida wode,

17 biittay doyettidi

Daataane mittides;

Abraame iza keeththa

asatara moogides.

18 Qasse istta maabaraa giddon

tamay eexxiin,

lacoy he iita asata xuuggides.✝

19 Korebe Zuman de7ishe

worqqa seerisidi

mara misle medhdhida;

histtidi he mislaas goynnida.

20 Istti bantta bonchcho Xoossaa

maata miza

miiza mislen laammida.

21 Istti banttana ashshida

Xoossa dogida;

izi Gibxen gita ooso,

22 Kaame biittankka

malalisizayssanne

Zo7o abban, «Hoola!» giissizayssa

ooththidayssa dogida.

23 Hessa gishshas Xoossi

istta dhayssana gides;

gido attiin dhayssontta mala

iza hanqoza zaaranaas

Xoossi doorida

Musey giddon eqqides.✝

24 He lo7o biittayo kadhida;

Hessafe guye

iza qaalan ammanettibeettenna.

25 Istti bantta Dunkaaneza giddon

zuuzumidanne

GODAA qaalas

azazettontta ixxida.

26 Hessa gishshas istti

bazzon kundi dhayana mala,

izi ba kushe denththidi caaqqides.✝

27 Istta zereththati

kawoteththata giddon

olettanayssanne

istti biitta gaxa gakkanaas

laalettanayssa yootides.✝

28 Hessafe guye istti

Ba7aali-Pe7ooren diza

eeqas goynnizaytara

issife gayttida;

shemppoy baynda eeqatas

yarshettida yarshoza mida.

29 Istti bantta ooson

GODAA hanqeththida;

histtiin istta giddon

iita hargey wodhdhides.

30 Gido attiin Finihaasi dendidi

istta mooroza pirdiin

iita hargey

istta bollafe kichchides.

31 Hessika yeletappe yeleta gakkanaas

mernaas izas

xilloteth gididi qoodettides.

32 Mariiba pultto matan

GODAA hanqeththida;

istta gaason Muse bolla

metoy gakkides.

33 Ays giikko istti Muse yiillosida;

histtiin iza doonappe

bessontta qaalay ke7ides.✝

34 GODAY dhayssite giin

istti Kanaane asata dhayssibeettenna.

35 He palaappe istti

he kawoteththatara

geletti ekettidi walakettidanne

istta de7o woga kaallida.

36 Xoossa asati istta eeqas goynnida;

hessika isttas woximade gidides.✝

37 Istti bantta attumanne macca nayta

daydanththatas yarshida.✝

38 Istti xillo suuth

Kanaane eeqatas yarshida;

bantta attumanne macca nayta

suuth gussida;

he suuththan biittay tunides.✝

39 Hessaththo istti

bantta ooson tunidanne

layma maccassa mala

bantta Xoossas

ammanettontta ixxida.

40 Hessa gishshas GODAA hanqoy

iza asaa bolla eexxi ke7ides;

izi bayta harassettides.✝

41 Izi istta hara kawoteththata kushen

aaththi immides;

istta morkketi istta haarida.

42 Istta morkketi istta naaqqidanne

bantta shenen ayssida.

43 Izi istta daroto ashshides;

gido attiin istta makkallas

gixxi kezida;

bantta nagara gaason dhayda.

44 Gidikkoka istti waassida waasoza siyidi

istta waayeza qoppides.

45 Istta gishshas

ba caaqo qaala hassa7ides;

aggontta ba siiqo daron

istta maarides.

46 Istta di7ida ubbay

isttas qadhettana mala

ooththides.

47 Abeet GODAWU Nu Xoossawu!

Nuna ashsha.

Nuni ne geeshsha

sunththa galatana mala

kawoteththata giddofe

nuna shiishsha.

48 GODAY, Isra7eele Xoossi

mernaappe mernaa gakkanaas

galatetto!

Asay ubbay, «Amiin» go.

GODAA galatite!✝