1 Izi kiyanne iza siiqoy

mernaas gidida gishshas

GODAA galatite!✝

2 Isra7eele asay,

«Iza siiqoy mernaassa» go.

3 Aaroone zereththati,

«Iza siiqoy mernaassa» getto.

4 GODAAS yayyizayti ubbay,

«Iza siiqoy mernaassa» getto.

5 Tani un7ettida wode

GODAAKKO waassadis;

histtiin izi ta waasoza allidi

tana un7ofe kessides.

6 GODAY tanara diza gishshas

tani yayyike.

Asi tana ay ooththanee?✝

7 GODAY tana maaddanaas

tanara dees;

ta morkketa xooneteththaa

tani ayfen be7ana.

8 Asan ammaneteththafe

GODAAN ammaneteththay lo7o.

9 Daannatan ammaneteththafe

GODAAN ammaneteththay lo7o.

10 Kawoteththati ubbay

tana dooddida;

gido attiin GODAA sunththan

tani istta xoonadis.

11 Istti tana ubbasora

dooddi oykkida;

gido attiin GODAA sunththan

tani istta xoonadis.

12 Istti tana

maththi dooddiza mala dooddida;

gido attiin agunththi

eexxiza mala

eexxi dhayda;

GODAA sunththan

tani istta xoonadis.

13 Tana sugiin kundanaas

gandigaradis;

gido attiin GODAY

tana maaddides.

14 GODAY taas

minoteththinne yeththa;

tana ashshizay iza.✝

15 Xillota dunkaane giddon

xoono ililisinne

ufayssa yeththi,

«GODAA ushachcha kushey

wolqqama miish

ooththides!» gishe seetettees.

16 GODAA ushachcha kushey

dhoqqu dhoqqu gides!

GODAA ushachcha kushey

wolqqama miish ooththides.

17 Tani hayqqike

shemppora paxa de7ana;

GODAY ooththida ooso

buroppeka awajjana.

18 GODAY tana keehi qaxxaydes;

gido attiin hayqos

aaththi immibeenna.

19 Tani giddo gelada

GODAA galatana mala

xilloteththa pengeta

ane taas doyte!

20 Hayssi GODAA penge;

izara xilloti xalla gelana.

21 Neni taas siyida gishshassinne

xoono immida gishshas

tani nena galatays.

22 Gimbizayti kadhidi

ixxida shuchchay

gulas hu7en woththiza

shuch gidides.✝

23 Hayssika GODAA ooso;

qasse nu ayfesikka

malalisiza miishsha.✝

24 Hayssi gallassay

GODAY ooththida gallassa;

ane nuni izan

ufayettoossinne ililoos.

25 Abeet GODAWU!

Ha7i nuna ashsharkkii!

Abeet GODAWU!

Ha7i nuus injjesarkkii!✝

26 GODAA sunththan yiza asi

anjjettidayssa gido!

Nuni GODAA Keeththan

inttena anjjoos.✝

27 GODAY Xoossa;

izi nuus poo7isides;

cilila miththa haggata oykkite;

yarsho yarshizasoza bolla diza

kacetakko gakkanaas kezite;

ba7aale bonchchite.

28 Neni ta Xoossa;

tani nena galatana;

Neni ta Xoossa;

tani nena gitasana.

29 Izi kiya gidida gishshas

GODAA galatite!

Iza siiqoy mernaassa.