1 Ta wozinappe lo7o qofay pulttees;

ta giigsida ginxoza

kawoza sissana;

ta inxarsayka

eranchcha xaafe bi7ire mala.

2 Asa ubbaafe neni keeha lo7aasa;

ne puulan kumida

qaala haasayaasa;

hessa gishshas Xoossi nena

mernaas anjjides.

3 Wolqqama kawoo!

Ne mashsha gixxa;

bonchchonne teema may7a.

4 Tumateththas,

ashketeththasinne xilloteththas

ne teemateth may7ada

ola xoonanaas sinththe hordofa;

ne ushachcha kushey

malalisiza miish besso.

5 Ne yiishshati qarata;

istti kawo morkketa

wozina ayfen caddana;

kawoteththati xoonettidi

ne toho garsan kundana.

6 Abeet Xoossawu!

Ne kawoteththa algay

mernaas daana;

ne kawoteththa guufeykka

suureteththa guufe.

7 Neni xilloteth dosaasa;

makkallateth ixxaasa.

Hessa gishshas Xoossay,

ne Xoossay

ne laggetapekka aaththidi

nena ufayssa zayten tiydes.✝

8 Karbbefe, godare uuththafenne

Burgudeppe

oosettida shitton ne may7oy

cacafettidi sawo tunnu gees;

Danggarsa zaalen alleqettida

ne kawoteththa keeththan

diixettiza diiththaynne

maasinqoy nena ufayssees.

9 Kawoteththa keeththan diza

maccassata giddon

kawota macca nayti deettes;

godatteya geeshsha

worqqan alleqettada

neeppe ushachcha

baggan eqqadus.

10 Ta nayee, ezga siya;

ne hayththa haa yegga.

Ne deraanne

ne aawaa keeththa doga.

11 Ne medha lo7oy

kawo wozina ekkides;

izi nees goda gidida gishshas

ne iza bonchcha.

12 Xiroose asay izis

imota ekki yaana;

dureti nena aadashana.

13 Kawaa naya kawo keeththa giddon

ay mala lo7azee!

Izi may7oyka worqqan alleqides.

14 Ba alleqo may7oza may7ada

kawozaakko bawus;

izi lagge gidida geela7oti

izo azhabi izas ekki yida.

15 Istti ufayettishenne

hombocishe yiidi

kawoza keeth geleettes.

16 Kawoo! Ne nayti

ne aawata soho laattana;

neni istta biitta

ubbaa bollan shuumana.

17 Tani ne sunththi yeleta ubbaan

hassa7ettana mala ooththana.

Hessa gishshas asay

mernaas nena sabbana.