1 GODAA galatite;

iza sunththa xeygite;

izi ooththida oosota

kawoteththata erisite.

2 Izas ginxo giigsite;

galata yeththika yexxite;

malalisiza iza ooso ubbaa yootite.

3 Geeshsha sunththan

izayssan ceeqettite;

GODAA koyzayta

wozinay ufayetto.

4 GODAANNE iza wolqqa xomosite;

ubbato iza sinththa koyite.

5,6 Intteno iza aylle

Abrahaame zereththatoo!

Doorettida Yaaqoobe naytoo!

Izi ooththida malalisiza oosota,

iza malaatanne izi pirdida

pirda akeekite.

7 Izi GODAA nu Xoossaa;

iza suure pirdayka

sa7a ubbaa bolla dees.

8 Izi ba caaqo qaala mernaas

ba azazida qaala shii yeleta

gakkanaas naagees.

9 Izi Abrahaames caaqqida

caaqo qaala,

Yisaaqas immida qaala balenna.✝

10 Hessa Yaaqoobes woga,

Isra7eelesikka

mernaa caaqo qaala

histtidi minththi essides.✝

11 Qasseka, «Nees Kanaane

biittaa immana;

izikka ne zereththatas

laata gidana» gides.

12 Istti qoodan qii guuththatanne

Kanaane biittan

bete gididi diza wode,

13 issi dereppe hara dere,

issi kawoteththafe

hara kawoteth yuuyida.

14 Xoossi istta oonikka qohanaas

immibeenna;

istta gishshas kawota seerishe,

15 «Tani tiydayta bochchofte;

nabeta qohopite» gides.✝

16 GODAY biittaa bolla

kosha yeddides.

Istta kath ubbaa dhayssides.✝

17 Gido attiin izi ba asaa ashshanaas

isttafe sinththan aylleteththas

bayzettida Yooseefe kiittides.✝

18 Iza tohoti kaatenan waaxettida;

izi sansalatan qashettides.

19 Izi kase yootidayssi

polettana gakkanaas

GODAA qaalay iza paaccides.✝

20 Kawoy as kiittidi

iza birshisides;

deraa haarizayssi

qasho keeththafe kessides.✝

21 Kawozi iza ba keeththas

goda ooththides;

baas diza ubbaa

aqota bolla shuumides.✝

22 Hessika shuumeta

maarara kaaleththana malanne

gita asata aadho erateth

tamaarsana mala sunththides.

23 Hessafe guye Isra7eeley

Gibxe gelides;

Yaaqoobey Kaame biittan

bete as gididi de7ides.✝

24 GODAY ba asaa keehi corasides;

istta morkketappe

istta aaththi minththides.

25 Izi Gibxe asay

ba asaa ixxana malanne

ba aylleta bolla

dendana mala ooththides.✝

26 Hessafe guye ba aylle Musenne

ba doorida Aaroone

isttako kiittides.✝

27 Istti Gibxe asata sinththan

Xoossa malaata,

Kaame biittan

malalisiza miish ooththida.

28 GODAY dhuma kiittidi

he biitta dhumisides;

gido attiin Gibxe asati

iza azazo ixxis gida.✝

29 Istta haaththa suuththan laammidi

moleta wodhides.✝

30 Istta biitta ubbaa

kawoza keeththaaka

shodhdhey kumides.✝

31 Izi azaziin boxeynne uu7ey

istta biitta ubbaa bolla

shom7ushom7ides.✝

32 Istta biitta bollan ira gishshas

shach wolqqanththara

bukisides.

33 Izi istta woyne turanne

balase mith ubbaa dippi histtides;

istta biittan de7iza miththatakka

menththereththides.✝

34 Izi azaziin booleynne

qooday baynda

gumbaroy kezides.

35 Histtidi istta gaden

mokkida kath ubbaa mides;

istta biittan diza cilila miish

ubbaaka dippi histtides.✝

36 GODAY Gibxe deren

bayrata ubbaa wodhides;

koyro yelettida nayta

ubbaaka dhayssides.✝

37 Hessafe guye izi Isra7eele asaa

worqqanne bira alleqora kessides;

istta giddofe

kundidi attiday ooninne baawa.

38 Gibxe asati isttas

daro yayyida gishshas

istti kezi bishin ufayettida.✝

39 Xoossay istta kammanaas

shaara miccides;

omars isttas poo7isanawu

tama giigsides.✝

40 Istti miza miish oychchiin

kuracho misatiza kafota

isttas yeddides;

istta salo quma kalisides.✝

41 Izi zaalla phalqiin haaththi pulttides;

shaafa malakka duge bazzo goggides.✝

42 Izi ba aylle Abrahaames

caaqqida geeshsha qaala

hassa7ides.

43 Izi ba asaa ufayssan,

ba dooridayta ililisan kessides.

44 Izi isttas hara kawoteththata

biitta immides;

histtiin istti harati

daaburi kessida kaththa

ayfe laattida.✝

45 Hessa izi ooththiday

istti izi woththida

maara naaganaassa;

iza wogaakka polanaassa.

GODAA galatite!