1 Abeet GODAWU!

Ta nena wozinappe woossays.

2 Abeet ta Xoossawu!

Tani nenan ammanettays;

tana yeellasoppa;

ta morkketikka

ta bolla ceeqettofetto.

3 Nena hidota ooththizayti

yeellatettenna;

gido attiin gene ooththizayti

yeellatana.

4 Abeet GODAWU!

Tana ne oge bessa;

ne geedo kaalo tana tamaarsa.

5 Neni tana ashshiza Xoossa;

ne tumateththan

tana kaaleththanne tamaarsa;

ubba wode ta hidotay nena.

6 Abeet GODAWU!

Beniisofe diza ne qadheteththaanne

ne kiyateththa hassa7a.

7 Ta yelagateththa nagaranne

mooro hassa7oppa;

Abeet GODAWU!

Ne gita kiyateththa malanne

ne lo7eteththa keena tana qoppa;

8 GODAY kiyanne suure;

hessa gishshas nagaranchchata

ba oge tamaarssees.

9 Ashketa suure ogera kaaleththees;

isttaka ba oge tamaarssees.

10 GODAA caaqo qaalanne

maara naagizaytas

iza ogey ubbay kiyanne tuma.

11 Abeet GODAWU!

Ta nagaray keehi daro;

gidikkoka ne sunththa gishshas

atto ga.

12 GODAAS yayyiza asi oonee?

Ne doorada baana ogeza

izi nena tamaarsana.

13 Izi ubbaa wodekka lo7o duus daana;

iza zereththati biitta laattana.

14 GODAY bana yayyizaytappe

ba xuura qottenna;

izi isttas ba gelida caaqo

qaalakka erisees.

15 GODAY ta toho

narxafe kessi ekkiza gishshas,

ta ayfey maado demmanaas

ubba wode izakko xeellees.

16 GODAWU! Tani bizza dizaadenne

qohettida as gidida gishshas,

ne haa taakko simma;

ne maaroteththaka bessa.

17 Taas metoy darides;

ta metozappe tana neni kessa.

18 Ta metozanne

ta tuggaa neni be7a;

Ta nagara ubbaa atto ga.

19 Ta morkketi ay keena daridaakko

ne be7a;

istti tana ay mala ixxizaakko

ne xeella.

20 Neni tana naaganne ashsha;

ta nenan zemppadis;

ne tana yeellasoppa.

21 Ne taas hidota gidida gishshas

suureteththaynne tumateththay

tana naago.

22 Abeet Xoossawu!

Isra7eele asa

meto ubbaafe neni wozza.