1 Iita ooththizayta

be7ada yiillotoppa;

nagara ooththizayta qanaatoppa.

2 Ays giikko istti

maata mala eeson melana;

boncco mala

istti shullidi qokkana.

3 Neni GODAAN ammanetta;

lo7o oosokka ooththa;

histtiko neni biitta bolla

palahin daana.

4 GODAAN ufayetta;

izi nees

ne wozina amo immana.

5 Ne oge GODAAS hadara imma;

izan ammanetta;

izikka nees ooththana.

6 Izi ne xilloteththa

maalado xalqqe mala kessana;

ne yo7oza pirdaaka

seeta gallassa awa mala

poo7isana.

7 GODAA sinththan co7u gaada

izi ooththana gakkanaas

dandayan naaga;

iita asati duretikkonne

istta qofay polettiko

ne istta bolla yiillotoppa.

8 Hanqo agga;

yiillofe baqata.

Yiillotoppa; ays giikko

hessi as meton yeggees.

9 Iita ooththizayti

dhoqalletti dhayana;

gido attiin GODAAN

hidota ooththizayti

biitta laattana.

10 Iita ooththizayti

guuththa wodeppe

guye de7ettenna;

neni istta koyidaakkoka

istti beettettenna.

11 Gido attiin ashketi biitta laattana;

istti gita saroteththan

ufayetti daana.✝

12 Iita asati

xillota bolla maqetteettessinne

ba ach garcceettes.

13 Gido attiin Goday

iitata bollan miiccees;

ays giikko istti dhayana gallassay

gakkidayssa izi erees.

14 Iita asati hiyeesatanne

metotanchchata dhayssanawu,

suureteththan hemettizayta

wodhanawu bantta mashsha

shoddeettessinne

bantta wondafeza dafeettes.

15 Gido attiin istta mashshay

isttas wozina ayfen gelana;

istta wondafeykka meqqana.

16 Xillos de7iza guuththay

iita asatas diza

daro aqotappe aadhdhees.

17 Ays giikko

iitata wolqqay meqqana;

xillota gidikko

GODAY minththeththees.

18 GODAY Suure asatau

ubbaa gallas naagees;

istta laataykka

mernaas isttas gidana.

19 Iita woden

suure asati yeellatettenna;

kosha layth istti kalli maana.

20 Iita asati gidikko hayqqana;

GODAA morkketi

bazzo ciishsha mala qokkana;

cuwa malakka coo dhayana.

21 Iita asi tal7i ekkidi

zaari erenna;

gido attiin xillo asi

qadhettidi gede immees.

22 GODAAN anjjettidayti

biitta laattana;

gido attiin izi qanggidayti

coo dhayana.

23 Asa ogey GODAA ufayssiko

GODAY izaade tanggo

kaaleththeessinne minththees.

24 Izi dhuphettikokka kundontta mala

GODAY ba kushen

oykki ashshees.

25 Tani kase yelaga shin

ha7i cimadis;

gido attiin xillo asi

coo yegetti attishin,

woykko iza zereththi

kath woossi mishin

tani mulekka be7a erikke.

26 Izi ubba wodekka kiyateth immees;

dichchi baynda tal7ees;

iza zaretikka anjjos gidana.

27 Iitappe haakka; lo7o miish ooththa.

Histtiko ne adussa layth de7ana.

28 Ays giikko GODAY xilloteth dosees.

Xoossay baas ammanettida

asata yeggenna;

izi istta mernaaskka naagana.

Gido attiin

iitata zereththati dhoommana.

29 Xilloti biittayo laattana;

izin mernaas de7ana.

30 Xillo asa doonay

aadho erateth yootees;

iza inxarsika xillo haasayees.

31 Iza Xoossa wogay iza wozinan dees;

iza tohoykka harchchenna.

32 Iita asi xillo as

iita ayfen xeelleessinne

wodhanawukka koyi kaallees.

33 Gido attiin GODAY xillo as

iza kushen yeggenna;

pirdas eqqiza wodekka

iza aaththi immenna.

34 GODAA hidota ooththa;

iza azazokka naaga;

izi nena biitta laatissana;

zaaridikka bonchchana;

iita asati dhoommi dhayshin

ne beyana.

35 Tani issi menxe iita asi

wola mala daayidayssa beyadis.

36 Gido attiin tani he sohora

simmada kanththiza wode

izi dhaydes;

ta koyiinkka izi beettibeenna.

37 Ane lo7o as akeeka;

suure as be7a;

saro asas wurseththi lo7o gidana.

38 Gido attiin nagaranchchati

mulera dhayana;

istti wurseththan dhoommana.

39 Xillotas atoteththi GODAAPPE yees;

meto wode izi isttas geemmizaso.

40 Xilloti GODAA guye aadhdhida;

hessa gishshas izi istta

maaddeessinne ashshees;

iitata kusheppeka

woththi ekkees.