1 Derezoo, intte ubbatikka

hayssa siyite!

Intteno sa7a bolla diza ubbatoo!

Hayssa ezgite.

2 Dhoqqaynne ziqqay,

dureynne manqoyka siyite.

3 Ta wozina qofay akeeka immees;

Ta doonay

aadho erateththa qaala

haasayees;

4 Tani ta hayth

leemisotakko zaarana;

istta birsheththaaka

ta diiththan qonccisana.

5 Meto gallassi yiza wodenne

iitateththan tana labizayti

dooddi uttiko

ta ays babboo?

6 Ba aqotan ammanettizaytassinne

ba dureteththa daron

ceeqettizaytas ta ays babboo?

7 Asi barkka bana wozzenna;

woykko ba shemppo gishshas

Xoossas waaga qanxxanaas

dandayenna.

8 Asa shemppo waagay

keehippe al7o;

shemppo duuththiza waagay

mulekka deenna.

9 Ay waaga qanxxiinkka

izi mernaas de7ana mala,

woykko izi hayqqontta mala

ooththanawu dandayenna.

10 Eeyatinne dammati hayqqiza mala

aadho eranchchatikka hayqqana;

ubbayka ba aqota

haras yeggi baana;

hessa ubbayka be7ana.

11 Daro gade

istti ba sunththan haarikkoka

isttas mernaa keeththay duufo;

izikka isttas

yeletappe yeleta gakkanawu

duussaso gidana.

12 Asi ay duretikkoka

ba dureteththaara kanththenna;

izi do7a mala hayqqana.

13 Banan ammanettiza

eeyata qaadaynne

istta qaala kaallizayta

wurseththa saamay hayssa.

14 Shukas qorettida dorsata mala

istti duufos doorettida;

hayqoy istta heenththanchcha

gidana;

istti bantta yalliso keeththafe

haakkidi duufon musana.

Suure asati maaladora

istta duufo bollara simerettana.

15 Gido attiin Xoossi

ta shemppo wozzana;

izi tana hayqo wolqqafe

ashshi ekkana.

16 Asi duretiza wodenne

iza aqotay dari dari biza wode

izaades yayyofa.

17 Gaasoykka izi hayqqishe

aykkoka ekkidi beenna;

iza aqotay izara issife

duufon gelenna.

18 Asi paxa diza woden,

«Taas kumides» giikkoka,

ubbay izas giigida gishshas

galatettikokka,

19 simmidi mulekka

poo7o be7onttaso

ba aawata maabaran gayttees.

20 Asi erateththi baynda

ay duretikkoka

izi do7a mala hayqqana.