1 Abeet GODAWU!

Neni taas ta baqata attizaso;

mulekka ne tana yeellasoppa.

2 Ne xilloteththan tana kessa ekka;

ne hayththa taakko yeggada

tana ashsha.

3 Ne taas ubba wode

geemetta attiza

mino zaalla gida;

tana ashshanaas ne azaza;

taas mino miixaynne

zaallay nena.

4 Abeet ta Xoossawu!

Iitata kusheppe,

genanchchatappenne

menxe iitatappe

tana ashsha.

5 Abeet Ubbaa Haariza GODAWU!

Ta hidotay nena;

yelagateththa wodeppe

doommada

ta ammanettizay nena.

6 Tani yelettoosofe doommada

ta nenan zemppadis;

ta aayey uloppe ta yelettana mala

ooththiday nena;

ubba wode ta nena galatays.

7 Daro asay tana

dumma ayfen xeellides;

neni gidikko ta baqata attiza

wogga zaalla.

8 Gallas kumeth ne bonchcho

ta yootanaas,

ta doonan galatay kumides.

9 Tani cimmida woden tana oloppa;

ta wolqqay ixxida woden

tana aggofa.

10 Ays giikko ta morkketi

tana hilida;

tana wodhanawu koyzayti

ta bolla iita maqettida.

11 Istti, «Xoossi iza aggides;

iza ashshanaykka deenna;

hessa gishshas ane iza

gooddi oykkoos» gida.

12 Abeet Xoossawu! Taappe haakkofa.

Abeet ta Xoossawu!

Tana maaddanaas elela.

13 Tana mootizayti yeellatidi dhayetto.

Tana qohanawu koyzayti

yeellanne kawushshateth

may7etto.

14 Tani gidikko ubbato nena

hidota ooththays.

Tani galata bolla galata

nees gujjana.

15 Tani ay likke haasayanaakko

erontta aggikokka

gallas kumeth ta doonay

ne xilloteththa gishshassinne

ne atoteththa gishshas haasayees;

16 Abeet Godawu, Xoossawu!

Tani yaada ne wolqqama

ooso awajjana;

qasseka ne xilloteththaa xalla

yootana.

17 Abeet Xoossawu!

Neni tana yelagateththafe

doommada tamaarsadasa;

tanikka hanno gakkanawu

malalisiza

ne oosoza awajjays.

18 Abeet Xoossawu!

Ne maataa guyeppe

yaana yeletas,

ne wolqqa guyeppe yaana dere ubbaas,

ta qonccisana gakkanaassinne

ta cimada puulumana gakkanaas

ne tana aggofa.

19 Abeet Xoossawu!

Ne xilloteththay salo gakkides;

Abeet Xoossawu!

Neni gita miish ooththadasa;

nena misatizay oonikka deenna.

20 Neni ta bolla daro meto ehadasa;

gidikkoka neni tana

ciimma ollafe

goochcha kessadasa;

ta de7o zaara ooraththadasa.

21 Neni ta bonchcho

kaseyssafe darsana;

neni tana zaareththadakka

minththeththana.

22 Abeet ta Xoossawu!

Ne tumateththa gishshas

tani nena diiththan galatana;

abeet Isra7eele Geeshshawu!

Tani maasinqon nena sabbana.

23 Ta wozinay ufayssan kumidi

nees yexxiza wode,

neni wozzida ta shemppoya

nees ililawus.

24 Ta inxarsay

ne xilloteththa gishshas

gallas kumeth haasayees;

ta qoheteth koyzayti

yeellatidanne kawuyida.