1 Abeet GODAWU!

Tani yootizayssa ezga;

ta un7on woossiza

woosaakka siya.

2 Ta kawozo Xoossoo!

Ta nena woossiza gishshas

tana maadda gaada

ta waassiza waaso ne siya.

3 Abeet GODAWU!

Maalado maalado guuran

neni ta qaala siyaasa.

Maalado maalado guuran

tani ta woosa

ne sinth shiishshada,

neni taas immiza zaaro

ekkana gaada naagays.

4 Neni iitateththan

ufayettontta Xoossa;

iitati nenara de7ettenna.

5 Ceeqettizayti

ne sinththan eqqettenna;

iita miish ooththiza ubbata

neni ixxaasa.

6 Wordo haasayzayta

neni dhayssaasa.

Suuth gussizaytanne

cimmiza asata

neni harasettaasa.

7 Gido attiin tani ne maaro daron

ne keeththa gelana.

Ne geeshsha Keeththaako simmada

bonchchoninne yashshateththan

nees goynnana.

8 Abeet GODAWU! Ta morkketappe

ne tana ashsha;

tana ne xilloteththankka

kaaleththa;

ne oge ta sinththan suurisa.

9 Istta doonappe keziza qaalay

tumu gidenna.

Istta wozinankka geney kumides;

istta doonay

doyettida duufo mala;

istti bantta inxarsan

as cimmeettes.✝

10 Abeet Xoossoo!

Istta bolla neni pirda;

istta geney istta ekki bo.

Istta nagaray daro;

hessa gishshas

neni istta goodda digga;

ays giikko

istti ne bolla geellattida.

11 Gido attiin nenan zemppida

ubbati ufayetetto;

istti mernaas ufayssan yexxetto.

Ne sunththa siiqiza

ubbati ufayetetto;

isttika nenan naagettetto.

12 Abeet GODAWU!

Neni xillota anjjaasa;

Neni gondallen kammiza mala

ne kiyateththan istta kammaasa.