1 Abeet GODAWU!

Ne taas kuwa gidana mala

ta neekko yadis;

aydekka tana yeellasoppa;

ne xilloteththan tana ashsha.

2 Ne hayththa taakko zaara;

eeson tana ashsha;

neni tana genththiza zaalla gida;

tana ashshiza mino miixa

taas gida.

3 Ee, neni taas zaalla;

ta izan gela attiza miixa;

ne sunththa gishshas

tani baana oge

bessanne kaaleththa.

4 Neni taas zemppo gidiza gishshas,

istti taas waaxi woththida

narxafe tana ne naaga.

5 Abeet GODAWU tumu Xoossawu!

tani ta shemppo

ne kushen hadara immays;

neni tana wozza.✝

6 Paththontta eeqatas

goynnizayta tani ixxays;

tani gidikko GODAAN ammanettays.

7 Ta meto neni be7ida gishshassinne

ta tuggaa neni erida gishshas

tani ne siiqon ufayettays.

8 Neni tana ta morkketas aaththa

aaththa immabeekka;

ta tohotakka

aaho sohon essadasa.

9 Abeet GODAWU!

Tani meton geladis;

taas qadhetta.

Tani daro mishettadis;

ta ayfey, ta ashoynne

ta shemppoy daaburdes.

10 Ta shemppoya waayen daaburadus;

ta layththayka ceecen wurides.

Meto daron

ta wolqqay cingides;

ta meqeththatikka

giddon seerida.

11 Ta morkketa ubbaas

tani qidhe miish gidadis;

ta shoorotas miires attadis;

tana erizaytas kadhes gidadis;

ogen tana be7idaytikka

taappe baqateettes.

12 Tani hayqqida asa mala dogettadis;

mooho oto mala gidadis.

13 Tani daroti saasukettishin siyadis;

dagamay Ubbasora dees;

istti ta bolla genen duulateettes;

tana wodhanawukka

maqetteettes.

14 Gido attiin GODAWU!

Tani nenan ammanettada,

«Neni ta Xoossa» gays.

15 Ta de7o layththay

ne kushenna;

tana gooddiza

ta morkketa kusheppe

ne tana ashsha.

16 Ne aylleza bolla

ne sinththa poo7isa;

ne maaroteththan tana ashsha.

17 Abeet GODAWU!

Tani nena xeygays;

tana yeellasoppa;

iitati gidikko yeellatetto;

duge duufon gelidi sirphi getto.

18 Xilloza bolla otoron, kadheninne

xalateththan haasayza gishshas

wordanchchata doona duudisa.

19 Nenan zemppanaas

neekko shiiqidaytassinne

nees yayyizaytas

neni asaa sinththan isttas

immana gaada minjja woththida

kiyateththi ay mala daroo!

20 Neni istta ne keeththan genththada

asaa maqqofe ashshaasa;

neni istta ne dizason qottada

iita inxarsafe naagaasa.

21 Tani morkkey dooddi oykkida

katamaa giddon diza wode

izi malalisiza ba maaroteth

tana bessida gishshas

GODAY galatetto.

22 Tani dagammada,

«Ne sinththafe kichchadis» gadis.

Gido attiin tana maaddana mala

nena ta xeygida wode

ta waasoza neni siyadasa.

23 Intteno Xoossa asatoo!

GODAA siiqite.

GODAY izan ammanettizayta

naagees;

gido attiin otoranchchatas

isttas bessiza qixaate immees.

24 Intte hidota

GODAAN ooththidaytoo!

Beeggitenne minnite.