1 Abeet GODAWU!

Ne hanqon tana seeroppa;

ne yiillon tana muroppa.

2 Ne wondafe yiishshi tana caddides;

ne kusheykka

tana naaqqi oykkides.

3 Ne hanqofe dendidayssan

ta bollay payyenna;

ta nagara gaason

ta asateththay papattides.

4 Ta qohoy tana mittides;

deexo tooho mala

tana naaqqi oykkides.

5 Tani eeyateththan ooththida

nagara gaason

ta madunththay xinqqides.

6 Tani hokkadissinne quunnadis.

Gallas kumeth

yeekkashe pe7adis.

7 Ta ashoy tama misha mala

xuuggees;

ta bollayka payyenna.

8 Tani ixettadissinne nififi gadis;

ta wozinay

ceecida gishshas waassays.

9 Abeet Godawu!

Ta amo ubbaa ne eraasa;

tani ceecizayssi

neeppe geemmibeenna.

10 Taas wozina ayfen guppees;

ta wolqqay cingides;

ta ayfeppe poo7oy kichchides.

11 Ta madunththa gaason

ta shoorotinne ta laggetikka

taappe baqatida;

Ta dabbotikka taappe haakkida.

12 Tana wodhanawu koyzayti

bantta narxa tana oykkana woththida;

Tana qohanawu koyzayti,

«Naagaashsha; nuni nena

demmana» giidi

ta bolla mandida;

gallas kumeth ta bolla

genen duulatida.

13 He wode tani siyontta

tulle asa mala gidadis;

doonakka pogontta

duude asa mala gidadis.

14 Tumappe tani hayththi siyontta

asa malanne

doonay haasayontta

asa mala gidadis.

15 Gido attiin abeet GODAWU!

Tani nenan hidota ooththays;

Abeet ta GODAWU!

Neni taas zaaro imma.

16 Tani GODAA,

«Ta tohoy handaraashin,

ta morkketi ‹Izas hashshu›

gaana malanne

ta bolla ceeqettana mala

ooththofa» gaada woossays.

17 Tani kundana matadis;

ta sakoykka paxontta ixxides.

18 Ta nagaray tana metides;

hessa gishshas ta qoho

ta nees paaxays.

19 Ta morkketi gitanne wolqqama;

tana coo ixxizayti cora.

20 Tani lo7o ooso ooththiin

taas iita zaarizayti

tani lo7o kaalliza gishshas

tanara eqetteettes.

21 Abeet GODAWU!

Ne tana yeggofa;

Abeet Xoossawu

taappe neni haakkofa.

22 Abeet tana ashshiza Godawu!

Tana maaddanaas eesota.