1 Tani GODAA ubba wode galatana;

iza galatay ay wodenkka

ta doonappe paccenna.✝

2 Tani GODAAN ceeqettays;

naaqettidayti hessa siyidi

ufayetetto.

3 Ane tanara issife

GODAA bonchchoos;

iza sunththaaka

dhoqqu dhoqqu ooththoos.

4 Tani GODAA koyadis;

izikka taas zaarides;

tani yayyiza miish ubbaafe

tana ashshides.

5 Izakko xeelliza ubbaa

sinththay poo7ees;

istti mulekka yeellatettenna.

6 Ha hiyeesay waassides;

GODAY iza waasoza siyides;

meto ubbaafe iza ashshides.

7 GODAA kiitanchchay

GODAAS yayyizayta naagees;

izi istta yuushozan gididi

istta ashshees.

8 GODAY kiya gididayssa

yuushshi qopite;

izakko shiiqiday anjjettidaade.✝

9 Intteno geeshsha asatoo!

GODAAS yayyite;

ays giikko izas yayyiza ubbatas

aykkoyka paccenna.

10 Gaammoti mizaazi dhayiin

koshatteettes;

GODAA koyzaytas gidikko

lo7o miishshi

aykkoka paccenna.

11 Naytoo! Haa yiite;

ta gizaaz siyite;

tani inttena

GODAAS yashshateth

tamaarsana.

12 Adussa layth daanaas dosizaynne

lo7o miish beyanaas

koyzay oonee?

13 Ne inxarsaa

iita haasayontta mala naaga;

ne doonappe wordoy

kezontta mala naagetta.

14 Iitappe shaaketta;

lo7o miish ooththa;

saroteth koyada kaalla.

15 GODAA ayfey xillotakko xeellees;

qasse iza hayththi

istta woosa ezgees.

16 Istta hassa7issiza miish

biittafe dhayssana mala,

GODAY iita ooththizayta

ba hanqo ayfen xeellees.✝

17 Xilloti waasseettes;

GODAY istta waaso siyees;

izikka istta meto

ubbaafe ashshees.

18 GODAY wozinay meqqidaytas

matan dees;

qasse hidota qanxxidaytakka

ashshees.*

19 Xillo as gakkiza metoy daro;

gido attiin GODAY

iza he ubbaafe ashshees.

20 GODAY iza minththi naagees;

iza meqeththatappe

issoyka meqqenna.✝

21 Iitata istta iitateththi wodhana;

xillota ixxizayti pirdettana.

22 GODAY ba oosanchchata ashshees;

izakko baqatida ooninne

pirdettenna.