1 Abeet Xoossawu!

Asay tana un7eththees;

ta morkketi tana

ubba wode yedeththeettes;

hessa gishshas ne taas qadhetta.

2 Ta morkketi ubbaa gallas

tana yedeththeettes;

daroti otoreteththan tana oleettes.

3 Tana babisiza wode

ta nenan ammanettays.

4 Tani Xoossan

ammanettiza gishshas babbike;

izi immida hidota qaala

gishshassika

iza galatays;

ta Xoossan ammanettays;

asi tana ay ooththanee?

5 Ubbaa gallas ta morkketi

taappe mooro demmanaas

woxxeettes;

istti ubba wode

tana qohanaas zoretteettes.

6 Shiiqidi ta bolla maqetteettes;

zamadi uttidi tana kaaletteettessinne

ta geedon eqqetteettes;

tana wodhanaaska koyeettes.

7 Xoossoo! Istta iitateththaa gishshas

istta yeddofa;

he kawoteththata

ne hanqon kawushsha.

8 Neni ta yeeho beyadasa;

ta afunththaa makkadasa;

ubbatikka ne mazgaban

xaafettida.

9 Tani nena xeygiza wode

ta morkketi guye simmeettes;

Xoossi tanara dizayssa

tani hessan erays.

10 Ta iza qaala galatiza Xoossan,

ta iza qaala sabbiza GODAAN,

11 tani he Xoossan

ammanettiza gishshas babbike;

asi tana ay ooththanee?

12 Abeet Xoossawu!

Tani nees adina adinettadis;

ta adinettoyssa galata yarsho

nees gaththana.✝

13 Neni ta shemppoyo hayqoppe

ta tohota dhupheppe ashshadasa.

Hessa gishshas izi

shemppora paxa dizaytas

poo7isiza poo7on

Xoossa sinththan

ta simerettana.