1 Abeet GODAWU!

Tani hiyeesanne metotanchcha

gidida gishshas

ta waasoza siyada

taas zaaro imma.

2 Tani nees dumma as gidida gishshas

ne ta shemppo naaga;

neni ta Xoossa;

nenan ammanettiza

ne aylleza tana ashsha.

3 Abeet Godawu!

Kumeththa gallas

ta neekko waassiza gishshas

ne tana maara.

4 Abeet Godawu!

Tani wozinappe

nena woossiza gishshas

tana ne aylleza ufayssa.

5 Abeet Godawu!

Neni nuus kiyanne atto gizaade;

nena woossiza ubbaas

ne mernaa siiqo bessaasa.

6 Abeet GODAWU!

Ta woosa siya;

ta shoobba woossizayssa ezga.

7 Ne taas zaaro immiza gishshas

tani meto gallassan

neekko waassays.

8 Abeet Godawu!

Ne malay xoossata giddon baawa;

ne oosora ginattiza

oosoykka deenna.

9 Abeet Godawu!

Neni medhdhida

kawoteththay ubbay

neekko yiidi nees goynnana;

ne sunththaaka bonchchana.✝

10 Neni gita;

malalisiza miish ooththaasa.

Neni xalla Xoossa.

11 Abeet GODAWU!

Tani ne tuman baana mala

tana ne oge tamaarsa;

tani ne sunththas yayyana mala

taas issi wozina imma.

12 Abeet Godaa ta Xoossawu!

Tani nena

ta kumeththa

wozinappe galatana;

Ne sunththaaka

mernaas bonchchana.

13 Ays giikko ne tana bessida

mernaa siiqoy keehi gita;

neni ta shemppoyo

duufoppe ashshadasa.

14 Abeet Xoossawu! Otoranchchati

ta bolla dendida;

tana wodhana koyidi

pangati duulateettes;

nena wudankka yeggibeettenna.

15 Gido attiin abeet Godawu!

Neni qadhettizaadenne

maariza Xoossa;

hanqettanaas gam7iza Xoossa;

ne siiqoynne ne ammaneteththay

keehi daro.

16 Taakko simmada taas qadhetta;

taas ne ayllezas wolqqa imma;

ne aylley naaza tana ashsha.

17 Abeet GODAWU!

ne tana maaddizayssanne

minththeththizayssa

tana ixxizayti be7idi

yeellatana mala

ne kiyateththa malata tana bessa.