1 Tani GODAA dandayan naagadis;

izi taakko simmidi

ta woosaa siyides.

2 Ciimma ollafe, mittiza urqqafe

tana kessides;

ta tohota zaalla bolla essides;

qasse ta hemeththa minththides.

3 Izi ta doonan

ooraththa mazamure woththides;

he yeththay,

«Nu Xoossay galatetto» gizaaza.

Daroti be7idi yayyananne

GODAAN ammanettana.

4 GODAAN ammanettizay,

otoranchchatakko simmonttay,

wordanchchatakko xeellonttay

anjjettidaade.

5 Abeet ta GODAWU!

Neni daro malalisiza

ooso ooththadasa;

nenara likkettizay

ooninne baawa!

Neni nuus qoppida lo7o qofa

ooninne qoodanawu dandayenna;

hessi tani yootiin

wurizaaz gidenna.

6 Neni yarshonne

muxuwaata koyabeekka;

xuuggiza yarshonne

nagara yarshoka

neni saamottabeekka;

gido attiin siyana mala

taas hayththata doyadasa.✝

7 Hessafe guye tani,

«Xaaththa maxaafan

ta gishshas xaafettida mala

hekko ha7i tani yadis.

8 Abeet ta Xoossawu!

Tani neni koyzayssa

ooththanaas dosays;

ne wogay ta wozina

giddon dees» gadis.

9 Gita shiiqon tani xilloteththa

mishiraachcho awajjadis.

Abeet GODAWU!

Neni eriza malakka

tani ta doonan

yootizayssa aggike.

10 Tani ne xilloteththa

ta wozinan qottabeekke;

neni ammanettizayssanne

ashshizayssa ta yootadis.

Qasse ne siiqonne

ne tumateththa

gita shiiqozappe genththabeekke.

11 Abeet GODAWU!

Ne maaroteththaa

taappe haassofa;

ne siiqoynne ne tumateththay

tana ubba wode naago.

12 Ays giikko qooday baynda

iita miishshi tana dooddides;

ta iitateththi darida gishshas

ta xeellanawu dandaykke.

Ta iita oosoy

ta hu7e binanappe darides;

ta wozinay ta giddon seerides.

13 Abeet GODAWU! Tana ashsha;

abeet GODAWU!

Tana maaddanaas eesota.

14 Tana wodhanawu koyzayti

mulekka yeellatettonne kawuyetto;

tani qohettanayssa amottizayti

kawuyidi guye simmetto.

15 Ta bolla,

«Izas hashshu! Hashshu!» gidayti,

ba hu7es yeellan dagammetto.

16 Gido attiin nena koyza ubbati

nenan ufayetettonne

hashshu getto;

ne atoteththaa dosiza ubbati,

«GODAY gitato!» getto.

17 Tani hiyeesanne metotanchcha;

Goday taas qoppees;

tana maaddizaynne

ashshizay nena;

abeet ta Xoossawu

tana eeson maadda.