Ezequiel 23

दो पापी बहिनहोन

1 यहोवा को वचन मरा पास आयो: 2 हे इन्सान का बच्चा, दो बइहोन थी, जो एक ही माय की बेटी थी. 3 वे अपना बचपन मे ही वेश्या को काम मिस्र मे करन लगी; अरु उनणे कुवारो पन खोय दियो अरु वेश्या बनी गइ. 4 वे पोरइहोन मे से बडी को नाम ओहोला अरु ओकी बहिन को नाम ओहोलीबा थो. वे मरी हुइ गइ, अरु उनखे बेटा-बेटीहोन पइदा हुया. उनको नामहोन का अनुसार ओहोला शोमरोन, अरु ओहोलीबा यरुशलेम हइ. 5 ओहोला जब मरी थी, तब ही वेश्या को काम करन लगी वा अपना दोस्तहोन का लिये मोहित होन लगी जो उनका पडोसी अश्शूरी योध्दा था. 6 वे तो सब की सब नीला कपडा पेननवाला सुंदर अरु जवान राज्यपाल अरु प्रधान था, अरु घोडाहोन पर बठ्या करता था. 7 येकालिये ओने उनका साथ व्यभिचार कर्यो जो सब का सब अच्छा अश्शूरी था; अरु जो कोइ पर वा मोहित हुइ ओकी मुर्तीहोन से वा अशुध्द हुइ. 8 जो व्यभिचार ओने मिस्र मे सीख्यो थो, ओखे भी ओने नी छोड्यो; क्योकि बचपन मे ही दुनीयाहोन ने उनका साथ कुकर्म कर्यो, अरु उनकी छाती पर हात फेरता था अरु तन-मन से उनका साथ व्यभिचार कर्यो गयो थो. 9 यो कारण मे ने ओखे वही अश्शूरी दोस्तहोन का हाथ मे सौपी दी, जिनका पर वा मोहित हुइ थी. 10 उन्हे ओखे बिना कपडा कि करी दि; ओका बेटा-बेटी छुडइ लिया अरु उनखे तलवार से मारि डाल्या; यो प्रकार उनका हाथ से दण्ड पइखे वा बइहोन मे प्रसिध्द हुइ गइ. 11 ओकी बहिन ओहोलीबा ने विनाश देख्यो, तेभी वा मोहित हुइ खे व्यभिचार करना मे अपनी बहिन से भी जादा बडी गइ. 12 वा अपना अश्शूरी पडोसिहोन पर मोहित होती थी, जो सब का सब बहोत सुंदर कपडा पेननवाला अरु घोडाहोन पर सवारी करन वाला जवान राज्यपाल अरु सब प्रकार का प्रधान था. 13 तब मे ने देख्यो कि वा भी अशुध्द हुइ गइ; वे दोइ बहिनहोन कि एक ही चाल थी. 14 पर ओहोलीबा जादा व्यभिचार करती गइ; आखीर: जब ओने दिवाल पर सेंदुर से खेची हुइ असा कसदी अदमीहोन को चित्र देख्यो. 15 चित्र मे अदमीहोन का कम्मर मे पट्टो बाद्यो थो अरु उनका माथा पर लहराती पगडी थी; वे सब का सब बेबीलोन का निवासी, बेबीलोन रथ का अधिकारी जसा लगता था.उनकी जन्मभुमी कसदी थी. 16 वा उनखे देखते बराबर मोहित हुइ गइ अरु उनका पास कसदीहोन का देश मे दूत भेज्या. 17 येकालिये बेबीलोन का दुनीया ओका पास पलंग पर आया, अरु ओका साथ व्यभिचार करी खे ओखे अशुध्द करी; अरु जब वा उनका से अशुध्द हुइ गइ, तब उनको मन उनका से फिरी गयो. 18 जब ओने व्यभिचार करती गइ, अरु अपनो आंग उघाडती गइ.ते मी घुस्सा मे ओकासे दुर हुय गयो,जसो कि मी ओकी बहिन से दुर हुय गयो थो. 19 येका पर वा मिस्र देश का अपना बचपन का दिन याद करिखे जब वहा वेश्या काम करती थी, अरु जादा व्यभिचार करती गइ; 20 अरु असा दोस्तहोन पर मोहित हुइ, जिनको आग गधा का जसी, अरु घोडाहोन का जसो वासनो थो. 21 तु यो प्रकार से अपना बचपन का उ टेम का बडा पाप खे याद करस हइ जब मिस्र दुनीयाहोन तरी छाती से लाड करता था.

छोटी बहिन पर परमेश्वर को दण्ड

22 यो कारण हे ओहोलीबा, परमेश्वर यहोवा तरा से यो बोलस हइ: देख, मी तरा दोस्तहोन खे भडकायु जिन से घुस्सा करते हुये दुर हुय गयो,अरु चारी तरफ से तरा खिलाप ली आयु. 23 बेबीलोन का र्हेन आला सब कसदीहोन खे, अरु पकोद, शोआ अरु कोआ खे दुनीयाहोन खे; अरु उनका साथ सब अश्शूरिहोन खे लायु जो सब का सब घोडाहोन का सवार सुंदर जवान राज्यपाल अरु सेनापति, रथ अधिकारी अरु कइ प्रकार का प्रतिनिधी, प्रधान अरु नामी अदमी हइ. 24 वे हथियार, रथ, छकडो अरु देश देश का दुनीयाहोन को दल लीया उत्तर दिशा से तरा पर चढाइ कर्ये; अरु ढाल अरु फरी अरु टोपी पेरी खे तरा विरुध्द चारी तरफ मोर्चाबन्दी कर्या; अरु मी उनका हाथ मे न्याय को काम सौप्यु, अरु वे अपना अपना नियम का अनुसार तरो न्याय कर्ये. 25 मी तरा पर अपनो जलन भर्यो क्रोध बतायु, अरु वे तरा साथ गुस्सा का साथ बर्ताव कर्ये. अरु वे तरी नाक अरु कान काटी लिये, अरु तरो जो भी बच्यो रीये उ तलवार से मार्यो जाये. वे तरा बेटा-बेटीहोन खे छुडइ खे ली जाये, अरु तरो जो भी बच्यो रीये, उ अंगार से जली जाये. 26 वे तरा कपडा भी उतारीखे तरा अच्छा अच्छा सोन्नो छुडइ खे ली जाये. 27 यो प्रकार से मी तरो बडो पाप अरु जो वेश्या को काम तोने मिस्र देश मे सीख्यो थो, ओखे भी तरा से छुडायु, यहा तक कि तु अपना आख उनका तरफ नी लगान की अरु नी मिस्र देश मे फिर याद कर्ये. 28 क्योकि प्रभु यहोवा तरा से यो बोलस हइ: देख, मी तोखे उनका हाथ मे सौप्यु जेका से तु गुस्सा करस हइ. अरु जेका से तरो मन फिरी गो हइ; 29 अरु वे तरा से दुश्मन जसो बर्ताव कर्ये, अरु तरी सब कमइ खे उठइ लिये, अरु तोखे बिना कपडा की करीखे छोडी दिये, अरु तरा आग खे उघाड्यो जाना पर तरो व्यभिचार अरु बडो पाप प्रकट हुइ जाये. 30 यो काम तरा से यो कारण कर्यो जाये क्योकि तु हर राष्ट का दुनीयाहोन का पिच्छे व्यभिचार का समान हुइ गइ, अरु उनकी मुर्ती पूजीखे अशुध्द हुइ गइ हइ. 31 तु अपनी बहिन का रस्ता पर चली हइ; येकालिये मी तोके भी ओका जसो कटोरो तरा हात मे सोपी दियु. 32 प्रभु यहोवा यो बोलस हइ: अपनी बहिन का कटोरा से तोखे पिनु पड्ये जो गहेरो अरु चौडो हइ; यो कारण तरो तिरस्कार अरु हंसी को कारण बन्ये, क्योकि उ कटोरा मे बहोत कुछ समास हइ. 33 तु मतवालोपन अरु दु:ख से भरी जाये. तु अपनी बहिन शोमरोन को कटोरा खे, अर्थात डर अरु विनाश खे पीखे छकी जाये. 34 ओमेसे तु गारी गारीखे पीये, अरु ओका ठीकराहोन खे भी चबाये अरु अपनी छाती घायल कर्ये; क्योकि मे ने असो बोल्यो हइ, प्रभु यहोवा की या वाणी हइ. 35 तोने जो मेखे भुलइ दियो अरु अपनो मुडो मरा से मोडी लिये हइ, येकालिये तु खुद ही अपनो पाप अरु व्यभिचार को बोज उठाये, परमेश्वर यहोवा को यो वचन हइ.

दोइ बहिनहोन खे परमेश्वर को दण्ड

36 यहोवा ने मरा से बोल्यो: हे इन्सान का बच्चा, का तु ओहोला अरु ओहोलीबा को न्याय कर्ये? ते फिर ओका घिनोना काम उनखे जतइ दे. 37 क्योकि उन्हे व्यभिचार कर्यो हइ, अरु उनका हाथहोन मे खुन लग्यो हइ; उन्हे अपनी मुर्तीहोन का साथ व्यभिचार कर्यो, अरु अपना बच्चाहोन खे जो मरा से पइदा हुया था, वे मुर्ती का आगे उनको बलिदान चडइ दियो. 38 फिर उन्हे मरा से असो बर्ताव भी कर्यो कि ओका साथ मरी पवित्र जगह खे भी अशुध्द करी हइ, अरु मरा आराम दिन खे अपवित्र कर्या हइ. 39 वे अपना बच्चाहोन खे अपनी मुर्तीहोन का आगे बलिदान कर्या, उ दिन उन्हे मरा पवित्र जगह पर प्रवेश कर्यो अरु ओखे अपवित्र कर्यो. उन्हे यो तराह को काम मरा भवन का अंदर कर्यो हइ. 40 उन्हे दुर से अदमीहोन खे बुलावो भेज्यो, अरु वे चली भी आया. उनका लिये तु नही ले, आख मे काजल लगा, अरु सोन्नो पेन; 41 अच्छी पलंग पर बठी री; अरु तरा सामने एक टेबल रखी थी, जेका पर मरो धुप अरु तेल रख्यो थो. 42 तब ओका सात मद मस्त दुनीयाहोन की भीड को चिल्लानो सुन्यो, अरु वे साधारण दुनीया का पास जंगल से बुलाया गया बेवडा दुनीयाहोन भी था; उन्हे वे दोइ बहिनहोन का हाथ मे चुडी पेरइ, अरु उनका माथा मे सुंदर मुकुट रख्यो. 43 तब जब व्यभिचार करते करते बुड्डी हुइ गइ थी, तब मेने ओका बारे मे बोली पड्यो, अब तो वे ओका ही साथ व्यभिचार कर्ये. 44 क्योकि वे ओका पास असा गया जसा दुनीया वेश्या का पास जास हइ. ओसा ही वे ओहोला अरु ओहोलीबा नामकी पापी बइहोन का पास गया. 45 अत: धर्मी दुनीया व्यभिचारणीहोन अरु हत्याराहोन का काबील उनको न्याय कर्ये; क्योकि वे व्यभिचारणीहोन हइ, अरु उनका हाथहोन मे खुन लग्यो हइ. 46 यो कारण प्रभु यहोवा यो बोलस हइ, मी एक गर्दी से उनका पर चडाइ करइ खे उनखे असो कर्यु कि वे मारी मारी फिर्ये अरु लुटी जाये. 47 वे भीड का दुनीयाहोन उनका पर पत्थर मार्ये अरु उनखे अपनी तलवार से काटी डाल्ये; वे उनका बेटा-बेटिहोन खे मारि डाल्ये अरु उनका घरहोन खे जलइ दिये. 48 यो प्रकार मी बडा पाप खे देश से दुर कर्यु, अरु सब बइहोन शिक्षा पइखे तुम्हारा जसो बडो पाप नी करना से बची जाये. 49 तुमखे अपनो पाप को दण्ड भोगनु पड्ये अरु तुमखे अपनी मुर्तीहोन को पाप को फल भी भोगनु पड्ये. तब तुम जान्ये की मी प्रभु यहोवा आय.