1 यहोवा को यो वचन मरा पास आयो: 2 हे इन्सान का बच्चा, अपनो मुडो मागोग देश का गोग का तरफ करीखे, जो रोश, मेशेक अरु तूबल को मुख्य शासक हइ, ओका विरुध्द भविष्यवाणी कर, 3 अरु यो बोल, हे गोग, हे रोश, मेशेक, अरु तूबल को प्रधान, परमेश्वर यहोवा यो बोलस हइ: देख, मी तरा विरुध्द हइ. 4 मी तोखे घुमइ ली जायु, अरु तरा जबडाहोन मे आकडा डालीखे तोखे नीकाल्यु; अरु तरी सब सेना खे भी अर्थात घोडा अरु सवारहोन खे जो सब का सब कवच पेन्या हुया एक बडी भीड हइ, जो भरची अरु ढाल ली हुया सब का सब तलवार चलानवाला हुये; 5 अरु उनका संग फारस, कूश अरु पूत खे, जो सब का सब ढाल लिया हुया अरु माथा को कवच पेन्यो हुया हइ; 6 अरु गोमर अरु ओका सब दलहोन खे, अरु उत्तर दिशा का दुर दुर देशहोन का तोगर्मा का कुल, अरु ओका सब दलहोन खे निकाल्यु; तरा संग बहोत सा देशहोन का दुनीया हुये. 7 येकालिये तू तयार हुइ जा; तू अरु जेत्ती गर्दी तरा पास जमा हुये, तयार रेनु, अरु तू उनको रक्षक बननु. 8 बहोत दिन बितना पर तरी याद करी जाये; अरु अन्त का साल मे तू उ देश मे आये, जो तलवार का वश से छुट्यो हुयो हुये, अरु जिनका ऱ्हेनवाला बहोत सा राष्ट्रहोन मे से जमा हुये; अर्थात तू इस्राएल का पहाडहोन पर से आये जो हमेशा उजाड ऱ्हिये हइ; पर वे देश देश का दुनीयाहोन से छुडायो जैइखे सब का सब सुरक्षित ऱ्हिये. 9 तू उनका पर आक्रमण कर्ये, अरु तुफान का जसो आये, अरु अपना सब दलहोन अरु बहोत देशहोन का दुनीया का साथ बद्दल का जसा छइ जाये. 10 "परमेश्वर यहोवा यो बोलस हइ: उ दिन तरा मन मे असी असी बातहोन आये कि तू एक बुरी साजीस करनु सुरवात कर्ये." 11 अरु तू बोल्ये, मी उ देश पर आक्रमण करन जायु जेका नगर बिना दिवाल का हइ वे दुनीयाहोन शान्तिसे ऱ्हेस हइ. वे समझस हइ कि वे सुरक्षित हइ. जो सब का सब बिना दिवाल अरु दरवाजा का बस्या हुया हइ, 12 ताकि छीनीखे तू उनखे लुट्ये अरु अपना हाथ वे खण्डरहोन पर बडाये जो दुबारा बस्या हइ, अरु वे दुनीयाहोन का विरुध्द जाये जो राष्ट्रहोन मे से जमा हुया था अरु उनका पास जनवर अरु सब धन जो देश का बीच मे रखस हइ. 13 शबा अरु ददान का दुनीया अरु तर्शीश का व्यापारी अपना देश का सब जवान शेरहोन का साथ तरा से बोल्ये, का तू लुटन खे आस हइ? का तोने धन छिनन , सोन्नो-चांदी उठान, जनवर अरु सब सम्पत्ती ली जान, अरु बडी लुट अपनो लेन खे अपनी गर्दी के जमा करी हइ. 14 यो कारण, हे इन्सान का बच्चा, भविष्यवाणी करीखे गोग से बोल, परमेश्वर यहोवा यो बोलस हइ: जो टेम मरी प्रजा इस्राएल शान्ति से बस्या ऱ्हिये, का आप येका पर ध्यान नी देनका? 15 तू उत्तर दिशा का दुर दुर जगा से आये; तू अरु तरा साथ बहोत सा राष्ट्रहोन का दुनीया हुये, जो सब का सब घोडाहोन पर चड्या हुया हुये, अर्थात एक बडी गर्दी अरु ताकतवर सैनीक. 16 जसो बद्दल जमीन पर छइ जास हइ, वसो ही तू मरी प्रजा इस्राएल का देश पर असो आक्रमण कर्ये. येकालिये हे गोग, आखरी का दिनहोन मे असो ही हुये, कि मी तरा से अपना देश पर येकालिये आक्रमण कर्यु, कि जब मी राष्ट्रहोन का देखता भर मे तरा द्वारा खुद खे पवित्र ठहरायु, तब वे मेखे पहिचानी लिये.

17 "परमेश्वर यहोवा यो बोलस हइ: का तू उही नी जेकी चर्चा मेने प्राचीनकाल मे अपना दोस्तहोन से बोल्यो, अर्थात इस्राएल का वे भविष्यवाणी करन वाला का द्वारा करी थी, जो वे दिनहोन मे सालो तक या भविष्यवाणी करता गया, कि यहोवा गोग से इस्राएलीहोन पर आक्रमण कर्ये? 18 जो दिन इस्राएल का देश पर गोग आक्रमण कर्ये, उय दिन म्हरो गुस्सा मरा मुंडा पर दिख्ये, परमेश्वर यहोवा की या वाणी हइ. 19 मेने गुस्सा की अंगार मे यो बोल्यो कि मी कसम खइ हइ कि इस्राएल मे एक बडो भुकम्प आये. 20 उ टेम सब जिन्दा जनवर डर से कापन लगी जाये. समुद्र मे मच्छीहोन, आकाश मे पक्षी, खेतहोन मे जगली जनवरहोन अरु वे सब छोटा जनवर जो धरती पर रेगस हइ, अरु जतना इन्सान ऱ्हेस हइ सब डर से कापी उठे, पहाड गिरी पड्ये अरु खइहोन खतम हुइ जाये. हर एक दिवाल धरती पर अइ गिर्ये." 21 परमेश्वर यहोवा की या वाणी हइ कि मी ओका विरुध्द तलवार चलान का लिये अपना सब पहाडहोन खे पुकार्यु अरु हर एक की तलवार ओका भइ का विरुध्द उठ्ये. 22 मी महामारी अरु खुन का वजेसे ओका से मुकद्दमो लड्यु; अरु ओका पर अरु ओका दलहोन पर, अरु वे भोत सा राष्ट्र पर जो ओका पास हुये, मी बडी झडी करायु अरु गार अरु अंगार अरु गन्धक बरसायु. 23 यो प्रकार मी खुद खे महान अरु पवित्र ठहरायु अरु बहोत सी राष्ट्रहोन का सामने खुद खे प्रकट कर्यु. तब वे जानी लिये की मी यहोवा आय.