ମସାନ୍ ଆ କନୋଡ୍
1 ଲେବିନ୍ ଆକେଜ୍ଜାଲୋଙ୍ସିଲଡ୍ ଅବୟ୍ ମନ୍ରାନ୍ ଜିର୍ରେ ଲେବିନ୍ ଆକେଜ୍ଜାଲୋଙ୍ ସିଲଡ୍ ଅବୟ୍ ଡାଙ୍ଗଡ଼ିବଜନ୍ଆଡଙ୍ ବିବାଲନ୍ । 2 ତିଆସନ୍ ଆନିନ୍ ପାଙ୍ଗୁରନେନ୍ କି ଅବୟ୍ ଓବ୍ବାସିଜନ୍ କୋଡେନ୍ । ଆରି ଓବ୍ବାସିଜନ୍ ଆ ମନନଙ୍ ଗିୟ୍ଲେ ଆନିନ୍ ଆନିନ୍ଆଡଙ୍ ୟାଗି ଆଙ୍ଗାୟ୍ ଜାୟ୍ ସଲେ ଡକ୍କୋଏନ୍ । 3 ବନ୍ଡ ଗୋଗୋୟ୍ ଡିନା ସଲେଡକ୍କୋଲେ ଅଃରପ୍ତିଲୋ, ଆନିନ୍ ଅବୟ୍ କୁରିଙ୍ଜିଙନ୍ ବାତ୍ତେ ଅବୟ୍ ପେଲାନ୍ ଆରି ମାଟିଆ ମିଞଲନ୍ ଡ ଜୁଣାନ୍ ଜବ୍ଲିଡ୍ଲେ ଆନିନ୍ ତି ଆପେଲାଲୋଙ୍ ପସିଜନ୍ଆଡଙ୍ ଡକ୍କୋଡାଲେ ଆନେଙ୍ ଅଲନ୍ କୁରିଙ୍ଜିଙ୍ରେଙନ୍ ଡକ୍କୋଏନ୍ । 4 ଆରି ପସିଜନ୍ଆଡଙ୍ ଇନିଡେତେଗାମ୍ଲେ ପସିଜନ୍ ଆତନାନ୍ ସାଙାୟ୍ ତନଙ୍ଡାଲେ ଗିୟ୍ଗିଜେନ୍ ।
5 ପାରୋ ରାଜାନ୍ ଆ ଡାଙ୍ଗଡ଼ିଅନ୍ ଉମ୍ମାନେନ୍ ଆସନ୍ ଅଲନ୍ ଆରିୟେନ୍, ଆ ସର୍ସିବଜଞ୍ଜି ଅନେଙ୍ ଅଲନ୍ ବୁଲ୍ଲେଏଞ୍ଜି । ତିଆଡିଡ୍ ଆନିନ୍ କୁରିଙ୍ଜିଙ୍ରେଙନ୍ ଅବୟ୍ ପେଲାନ୍ ଗିୟ୍ଲେ ତି ଆପେଲା ପନାଙନ୍ ଆସନ୍ ଆ କମ୍ବାରିବଜଞ୍ଜିଆଡଙ୍ ଆପ୍ପାୟେନ୍ । 6 ଆନିନ୍ ପେଲାନ୍ ରୋଲେ ଅବୟ୍ ଆରେସା ଓବ୍ବାସିଜନ୍ ଗିଜେନ୍ । ଆନିନ୍ ୟେୟେଡାତନ୍, ବନ୍ଡ ଆନିନ୍ ପସିଜନ୍ଆଡଙ୍ ଗିୟ୍ଲେ ଆର୍ଗୁଡ଼ିଡାଏନ୍ । ଆନିନ୍ ଗାମେନ୍, "କେନ୍ଆତେ ଅବୟ୍ ଏବ୍ରିଅ ସିୟ୍ ।"
7 ତି ଆବନେଡ଼ା ଆ ତନାନନ୍ ପାରୋ ରାଜାନ୍ ଆ ଡାଙ୍ଗଡ଼ିଅନ୍ଆଡଙ୍ ବରେନ୍, "ଞେନ୍ ଇୟ୍ଲେ ଆମନ୍ ଆସନ୍ କେନ୍ ଆ ଓବ୍ବାସିଜନ୍ଆଡଙ୍ ଅନବ୍ମେମେନ୍ ଆସନ୍ ଏବ୍ରିଅ ବଜଞ୍ଜିଲୋଙ୍ ସିଲଡ୍ ଅବୟ୍ ଦାଇ ବଜନ୍ ଓଡ୍ଡେଲେ ଓରୋଙାୟ୍ ?"
8 ପାରୋନ୍ ଆ ଡାଙ୍ଗଡିଅନ୍ ଗାମେନ୍, "ଇୟା" ଆନିନ୍ ଡାଙ୍ଗିଡ଼ିବଜନ୍ ଜିର୍ରେ ତି ଆ ଓବ୍ବାସିୟ୍ ଆୟୋଙ୍ଆଡଙ୍ ଓଡ୍ଡେଲେ ଓରୋଙ୍ଲାୟ୍ । 9 ପାରୋନ୍ ଆ ଡାଙ୍ଗଡିଅନ୍ ଅନିନ୍ଆଡଙ୍ ବରେନ୍, "ଆମନ୍ କେନ୍ ଆ ଓବ୍ବାସିୟ୍ ଓରୋଙ୍ଲେ ଞେନ୍ ଆସନ୍ ଇୟ୍ନବ୍ ମେମ୍ମେଆ, ଆରି ଞେନ୍ ଆମନ୍ଆଡଙ୍ ବଡିନ୍ ତିୟ୍ତମ୍ ।" ତି ଆଇବୟ୍ ଓବ୍ବାସିଜନ୍ଆଡଙ୍ ଓରୋଙ୍ଲେ ଇୟ୍ଲେ ଅଃମେମେଏନ୍ । 10 "ତିକ୍କି" ଓବ୍ବାସିଜନ୍ ଆସ୍ରୋଡ଼ାଏନ୍, ଆନିନ୍ ପାରୋନ୍ ଆ ଡ଼ାଙ୍ଗଡିଅନ୍ଆଡଙ୍ ଇୟ୍ଲେ ତିୟେନ୍, ଆରି ଓବ୍ବାସିଜନ୍ ଆ ଡାଙ୍ଗାଡ଼ାଅନନ୍ ଡେଏନ୍ । ତିଆସନ୍ ଆନିନ୍ ଆଞୁମନ୍ ମସା ଅବ୍ଞୁମେନ୍ । "ଇନିଆସନ୍ଗାମେଣ୍ଡେନ୍ ଆନିନ୍ ଗାମେନ୍, ଞେନ୍ ଡାଆଲୋଙନ୍ ସିଲଡ୍ କେନ୍ଆନିନ୍ ଅମ୍ଡୁଙ୍ଲେ ଞାଙ୍ଲାୟ୍ ।"
ମସାନ୍ନ୍ ମିଦିନିଅନ୍ ଜିରେନ୍
11 ମସାନ୍ ଆସ୍ରୋଡ଼ାଏନ୍ ସିଲଡ୍, ବଡିନ୍ନା ଆନିନ୍ ଆବୋଞାଙଞ୍ଜି ଆମଙ୍ବା ଇୟ୍ଲେ, ଆନିଞ୍ଜିଆଡଙ୍ ଲଗିନ୍ କାବ୍ବାଡ଼ାନ୍ ଆର୍ଲୁମେଞ୍ଜି ଗିଜେନ୍ । ଆରି ଅବୟ୍ ମିସରିଅବାୟ୍ ଆ ବୋଞାଙ୍ଲୋଙଞ୍ଜିଲୋଙ୍ ସିଲଡ୍ ଅବୟ୍ ଏବ୍ରିଅନ୍ଆଡଙ୍ ଆତରିଡେନ୍ ଗିଜେନ୍ । 12 ତିଆସନ୍ ଆନିନ୍ ଅଡ଼େତେ ଅଡ଼େନେ ଆଙାଙେନ୍, ଆରି ଆନନ୍ ଆଗରିୟ୍ଗିଜେନ୍ ଆନ୍ନିଙ୍ ଅଃରାଙ୍ଡାଲୋ, ତିଆସନ୍ ଆନିନ୍ ମିସରିଅବାୟ୍ଆଡଙ୍ ରବ୍ବୁଡାଲେ ଲକିୟ୍ଲୋଙନ୍ ତିଲେନ୍ । 13 ଆରି ଆନିନ୍ ଆବାର୍ତାନ୍ ଇୟେନ୍ ଆରି ବାଗୁ ଏବ୍ରିଅବାଜି ଆଗରୋଡ଼େତଞ୍ଜି ଗିଜେନ୍ । ଆନିନ୍ ବରେନ୍ ଆନିଞ୍ଜିଆଡଙ୍ ବରେଞ୍ଜି, "ଇନିବା ଆମ୍ବେନ୍ ସର୍ସି ଏବ୍ରିଅବାୟ୍ ବୋଞାଙ୍ମନ୍ ସରିନ୍ ଏଲ୍ତିତ୍ତେ ?"
14 ଆନିନ୍ ଗାମେନ୍, "ଆନା ଆମନ୍ଆଡଙ୍ ତବ୍ନଙ୍ଲମ୍ ରାଜାଲେନ୍ ଡ ପନ୍ସ୍ସୁଆତିମର୍ଲେ ଗାମ୍ଲେ ? ଆମନ୍ ଏଙ୍ଗାଲେ ମିସରିଅବାୟ୍ଆଡଙ୍ ରବ୍ବୁଏନ୍ ଏତ୍ତେଲେ ଞେନ୍ଆଡଙ୍ ରନବ୍ବୁନ୍ ଆସନ୍ ଇଃୟମ୍ତେ ପଙ୍ ?" ତିଆସନ୍ ମସାନ୍ ବତଙେନ୍ ଆରି ଆନିନ୍ଡମ୍ ଗାମେନ୍, "ଞେନ୍ ଇନି ଲୁମ୍ଲାୟ୍ ତିଆତେ ମନ୍ରାଞ୍ଜି ଜନାଏଞ୍ଜି ।" 15 କେନ୍ ଆବର୍ନେ, ପାରୋନ୍ ଅମ୍ଡଙ୍ଡାଲେ ମସାନ୍ଆଡଙ୍ ରନବ୍ବୁନ୍ ଆସନ୍ ଏରେନ୍ଗୋଜେନ୍, ବନ୍ଡ ମସାନ୍ନ୍ ପାରୋନ୍ ଆମାଙ୍ବା ସିଲଡ୍ ମିଦିଅ ଡ଼େସାନ୍ ଜିରେନ୍ ଆରି ତେତ୍ତେ ଡକୋନେନ୍ ଆସନ୍ ଜିର୍ରେ ଅବୟ୍ କୁଆନ୍ ଆତୁୟା ତଙ୍କୁମେନ୍ ।
16 ମିଦିନିଅନ୍ ଆ ରାଓଡ଼ା ଜିତ୍ରୋନ୍ ଆ ଡ଼ାଙ୍ଗଡିଅନଞ୍ଜି ସାତଟା ଡକୋଏଞ୍ଜି, ଆନିଞ୍ଜି ତି ଆଡ୍ରକୋଲୋଙ୍ ଇୟ୍ଲେ ଆପ୍ପେୟନ୍ ଆଗୋସ୍ସାମେନନ୍ ଅନବ୍ଗାଡାନ୍ ଆସନ୍ ଡାଆନ୍ ଗେନ୍ଲେ ଡୋଙ୍କାଲୋଙନ୍ ବବ୍ରିଜେଞ୍ଜି । 17 ମେଣ୍ଡାତୁର୍ମରଞ୍ଜି ଜିର୍ରେ ଆନିଞ୍ଜିଆଡଙ୍ ଗଙ୍ଗଙ୍ଙାଜେଞ୍ଜି । ବନ୍ଡ ମସାନ୍ ତନଙ୍ଡାଲେ ଆନିଞ୍ଜିଆଡଙ୍ ସାୟ୍ସିଏଞ୍ଜି ଆରି ଆ ଗୋସ୍ସାମେନଞ୍ଜିଆଡଙ୍ ଅବ୍ଗାଡାଏଞ୍ଜି । 18 ଆନିଞ୍ଜି ଆପ୍ପେୟନ୍ ରୁୟେଲନ୍ ଆମଙ୍ବା ଜିର୍ରେ, ଆନିନ୍ ଆନିଞ୍ଜିଆଡଙ୍ ବରେଞ୍ଜି, "ଆମ୍ବେଞ୍ଜି ଲଙେ ଏଙ୍ଗାଲେ ଏଲଜିର୍ରାୟ୍ ?"
19 ଆନିଞ୍ଜି ବର୍ରଞ୍ଜି, ଅବୟ୍ ମିସରବାୟ୍ ତୁର୍ମେମ୍ମରଞ୍ଜି ଆସିଲୋଙ୍ ସିଲଡ୍ ଇନ୍ଲେଞ୍ଜିଆଡଙ୍ ଡୋବ୍ଲଲେନ୍, ଆରି "ଇନ୍ଲେଞ୍ଜି ଆସନ୍ ଡାଆନ୍ ଗେନ୍ଲେ ଗୋସ୍ସାମେନଞ୍ଜିଆଡଙ୍ ଅବ୍ଗାଡାଏନ୍ ।"
20 ଆନିନ୍ ଆ ଡାଙ୍ଗଡିଅନଞ୍ଜିଆଡଙ୍ ବରେଞ୍ଜି । "ଆନିନ୍ ଅଙ୍ଗାଲୋଙ୍ ? ଆମ୍ବେଞ୍ଜି ଇନିଆସନ୍ ଆନିନ୍ଆଡଙ୍ ତେତ୍ତେ ଅମ୍ରେଙ୍ଲେ ଏଜିର୍ରାୟ୍ ? ଆନିନ୍ଆଡଙ୍ ଓଡ୍ଡେବା; ଆରି ଆନିନ୍ ଇନ୍ଲେନ୍ ସରିନ୍ ଗାଗାନେତୋ ।"
21 ମସାନ୍ ତି ଆମନ୍ରା ସରିନ୍ ଡକୋନେନ୍ ଆସନ୍ ଅଡ଼େଏନ୍, ଆରି ଆନିନ୍ ମସାନ୍ ସରିନ୍ ଆ ଡାଙ୍ଗଡିଅନନ୍ ସିପୋରାନ୍ ବାତ୍ତେ ଅଃବିବାଏନ୍, 22 ତି ଆଇବୟ୍ ଅବୟ୍ ଓବ୍ବାସିୟ୍ କୋଡେନ୍ । ମସାନ୍ ଆଞୁମନ୍ ଗେର୍ସୋମ୍ ଗାମ୍ଲେ ଅବ୍ଞୁମେନ୍ । ଇନିଆସନ୍ଗାମେଣ୍ତେନ୍ ଆନିନ୍ ଗାମେନ୍, "କେନ୍ ଆଡେସାଲୋଙ୍ ଞେନ୍ ଅବୟ୍ ବଡେସାବାୟ୍ ।"
23 ଗୋଗୋୟ୍ ବର୍ସେଙ୍ ସିଲଡ୍ ମିସ୍ରିଅ ରାଜାନ୍ ରବୁଏନ୍, ଆରି ଇସ୍ରାଏଲ୍ମରଞ୍ଜି କମ୍ବାରି କାବ୍ବାଡ଼ାନ୍ ଆଡଣ୍ଡ ଆସନ୍ ୟନେନ୍ ଗନୁନ୍ ଅମ୍ମେଲଞ୍ଜି; ଆୟନେଞ୍ଜି ଇସ୍ୱରନ୍ ଆମଙ୍ବା ଅଡ଼ୋଏନ୍ । 24 ଇସ୍ୱରନ୍ ଆୟନେଞ୍ଜି ଅମ୍ଡଙେନ୍ ଆରି ଅବ୍ରାଆମନ୍, ଇସାଆକନ୍ ଡ ଜାକୁବନ୍ ସରିନ୍ ଅଡ଼୍କୋନ୍ ଆ ଅନଗଡନ୍ ମନ୍ନେଏନ୍ । 25 ଇସ୍ରାଏଲମରଞ୍ଜି ଗିଜେନ୍ ଆରି ଆକାକୁର୍ତିଞ୍ଜି ଜନାଏନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)