1 ଆମ୍ୱେନ୍‌ ପାତ୍ୟାବରନ୍‍ ଏଅମ୍‍ଡୁଙ୍‌ଡଙାୟ୍‌; କଣ୍ତାୟ୍‌ ସାକିନ୍‍ ବର୍ରନ୍‌ ପେଲ୍ଲାମରନ୍‌ ଏସାୟ୍‌ସିଡଙ୍‌* । 2 ଆମ୍ୱେନ୍‌ ଇର୍ସେଲୁମନ୍‌ ଆସନ୍‌ ଗୋଗୋୟ୍‌ ମନ୍‌ରାନ୍‌ ଏସନ୍‌ଡୋଙ୍‌ଡଙେ, ଆରି ପନ୍‌ସୁଆତିନ୍‌ କାଜ୍ଜାନ୍‌ଆନମ୍ମେ ଆସନ୍‌ ଅଗୋୟ୍‌ମରନ୍‌ ଆମଙ୍‌ବା ଡନେଡାଲେ ଏଲ୍‌ବାଡଡଙ୍‌; 3 ଅଡ଼େ ପନ୍‌ସୁଆତିଲୋଙନ୍‌ ଡୋଲେୟ୍‍ମରନ୍‌ ଏଡୁଲ୍‌ମଡ୍‌ଡଙେ । 4 ବନେରାମର୍‌ବେନ୍‌ ଆ ତାଙ୍‌ଲେୟ୍‌ କି ଆ ଗୋଡୋୟ୍‌ଁ ତଙରନ୍‌ ଆଡ଼ଲେ ଆଜନିର୍‌ ଏଗିଜେନ୍‌ ଡେନ୍‌, ଆବ୍‌ଡିଡ୍‌ଲେ ଆମଙନ୍‌ ଗଙ୍‌ଲେ ପାଙ୍‌ତିୟ୍‌ବା । 5 ସଙ୍ଗତାମର୍‌ବେନ୍‌ ଆ ଗୋଡୋୟ୍‌ଁଆଡଙ୍‌ ବୁଡ଼ାରନ୍‌ ଆଜାୟ୍‍ତା ଆସେଡ୍‌ ଏଗିଜେନ୍‌ ଡେନ୍‌, ଆନିନ୍‌ଆଡଙ୍‌ ଅମ୍‌ରେଙ୍‌ଲେ ଏଜିର୍‌ଡଙେ, ଆମ୍ୱେନ୍‌ ଆନିନ୍‌ ସରିନ୍‌ ଆନିନ୍‌ଆଡଙ୍‌ ଉର୍ବା । 6 ଡୋଲେୟ୍‍ମରନ୍‍ ଆ ପନ୍‌ସୁଆତିଲୋଙ୍‌ ଆମ୍ୱେନ୍‌ ଆନିନ୍‌ଆଡଙ୍‌ ଅନିଆୟ୍‌ ଏଅବ୍‌ମେଡଙ୍‌ । 7 ପାତ୍ୟା ବର୍ନେନ୍‌ ସିଲଡ୍‌ ସବ୍‍ଙାୟ୍‌ଲନ୍‍ ଡକୋନାବା; ଆରି ଏର୍ଡୋସାମରନ୍‌ଆଡଙ୍‌ ଡ ଡରମମରନ୍‌ଆଡଙ୍‌ ଏଅବ୍‌ମୋସାଡଙ୍‌; ଇନିଆସନ୍‌ଗାମେଣ୍ତେନ୍‌ ଞେନ୍‌ ପେଲ୍ଲାମରନ୍‌ଆଡଙ୍‌ ଏର୍‌ଡୋସା ଅଃନେମ୍ମେଆୟ୍‌ । 8 ଆମ୍ୱେନ୍‌ ଲାସନ୍‍ ଏପାଙ୍‍ଡଙେ, ଇନିଆସନ୍‌ଗାମେଣ୍ତେନ୍‌ ଲାସନ୍‌ ଆଗରିୟ୍‌ତେନ୍‌ ଆମନ୍‌ରାଆଡଙ୍‌ ଅବ୍‌କାଡ଼ୁତେ ଆରି ଡରମ୍ମମରଞ୍ଜି ଆବର୍ନେ କାଜ୍ଜାନ୍‌ ଅବ୍‌ମେତେ । 9 ଆମ୍ୱେନ୍‌ ବଡେସାବାୟ୍‌ ଆଡଅଙ୍‌ ଏଜୁରୁଡଙେ,ଇନିଆସନ୍‌ଗାମେଣ୍ତେନ୍‌ ଆମ୍ୱେନ୍‌ ବଡେସାନ୍‌ ଆମନ୍‌ରା ଆ ମନ ଜନାଜି, ଇନିଆସନ୍‌ଗାମେଣ୍ତେନ୍‌ ଆମ୍ୱେଞ୍ଜି ମିସର୍‌ ଡେସାଲୋଙ୍‌ ବଡେସାମର୍‌ ଡକୋଲବେନ୍‌ ।

10 ଆରି ଆମ୍ୱେନ୍‌ ବସେଙ୍‌ଲୋଙ୍‍ବେନ୍‍ ତୁଡ୍‌ରୁ ବର୍ସେଙ୍‌ ଜାୟ୍‌ ଜମ୍ମଲନ୍‍ ବୁଡ୍‌ଲେ ଆଗଲେ ଜନ୍‌ରୋମନ୍‌ ରୁକ୍କୁବା । 11 ବନଡ୍‌ ସାତ ବର୍ସେଙ୍‌ ଆଡିଡ୍‌ ଏଅର୍‌ଡଙ୍‌ ଆରି ପଡ଼ିଆ ଡକ୍କୋବା; ସିଲତ୍ତେ ଡୋଲୟ୍‌ମର୍‌ବେଞ୍ଜି ଗାଗାନେନ୍‌ ଞାଙ୍‌ତଜି; ଆନିଞ୍ଜି ଆତରଲ୍‌ତେଞ୍ଜିଆତେ, କିନ୍‌ରେଙ୍‌ ଜନ୍ତୁଜି ଜୋମ୍‌ତଜି । ଆରି ଦାକ୍ୟାକୋତ୍ତାବେନ୍‌ ଡ ଜିତ ନୁବନ୍‌ ଜାୟ୍‌ ଆଜନ୍‌ ଏର୍ରନୋଡନ୍‌ ଡକୋବା । 12 ଆମ୍ୱେନ୍‌ ତୁଡ୍ରୁ ଡିନ୍ନା କାବ୍ବାଡ଼ାବେନ୍‌ ଲୁମ୍‌ଲେ ସାତ ଡିନ୍ନା ଆଡିଡ୍‌ ଲୋଲୋନବା, ସିଲତ୍ତେ ତାଙ୍‌ଲେୟ୍‌ବେନ୍‌ ଡ ଗୋଡୋୟଁନ୍‌ ଆରି କମ୍ୱାରିବୟ୍‌ବେନ୍‌ ଆ ଡାଙ୍ଗାଡ଼ାଅନ୍‌ ଡ ବଡେସାବାୟ୍‌ ଲୋଲୋନେନ୍‌ ଞାଙ୍‌ତଜି । 13 ଞେନ୍‌ ଆମ୍ୱେଞ୍ଜିଆଡଙ୍‌ ଇନି ଇନିଜି ବର୍ରବେନ୍‌, ତିଅଡ଼୍‌କୋନ୍‌ ଆବର୍ନେଲୋଙ୍‌ ଗିୟ୍‌ଡମ୍‌ନାବା; ଆନା ସନୁମଞ୍ଜିଆଡଙ୍‌ ଏସେବାଡଙ୍‌ କି ତଅଡ୍‌ଲୋଙ୍‌ବେନ୍‌ ସିଲଡ୍‌ ତିଆତେ ଡୁଙ୍‍ଡଙ୍‍ନାୟ୍‍ତଡ୍‌ ।

14 ଆମ୍ୱେନ୍‌ ବବର୍ସେଙନ୍‌ ୟାଗି ତର ଞେନ୍‌ ଆସନ୍‌ ସର୍ଡାନେନ୍‌ ଲୁମ୍‌ବା । 15 କମିରନ୍‌ ଏର୍‌ମନାୟନ୍‌ ଆ ରୁଟି ଆ ସର୍ଡାନେ ପାଡ଼େବା; ବନାଞ୍‌ବର୍‌ଞେନ୍‌ ଅନ୍ତମ୍‌ ଆବିବ୍‌ ଆଙ୍ଗାୟ୍‌ ଆଗନବ୍‌ରି ଡିନ୍ନାଇଙନ୍‌ ସାତ ଡିନ୍ନା କମିରନ୍‌ ଏର୍‌ମନାୟନ୍‌ ଆ ରୁଟି ଜୋମ୍‌ବା, ଇନିଆସନ୍‌ଗାମେଣ୍ତେନ୍‌ ଆମ୍ୱେନ୍‌ ତି ଆଡିନ୍ନା ମିସର୍‌ ଡେସାନ୍‌ ସିଲଡ୍‌ ଅନୁରନ୍‌ ଏଞାଙେନ୍‌; ଆରି ଆରିକାସିନ୍‌ ଆନ୍ନିଙ୍‌ ମଙ୍‌ବାଞେନ୍‌ ଏଜିର୍‌ଡଙାୟ୍‌, 16 ଆରି ଆମ୍ୱେନ୍‌ ଜନ୍‌ରୋମନ୍‌ ଆ ଗଗ୍ଗନେ ମନଅଁୟ୍‌ ପୁରନ୍‌, ଆଗ୍ରାମ୍‌ଗାମ୍‌, ସରବାନ୍‌ ସିଲଡ୍‌ ଇନିଜି ଏବୁଡ୍‌ତେ, ଆପର୍ତମ୍ମୁନ୍‍ ଆରନୋଡ୍‌ ଜଅନ୍‌ ଆ ସର୍ଡାନେ ପାଡ଼େବା; ଆରି ମିୟ୍‌ନୁମନ୍‌ ଆନଞିଡିଙ୍‌ ସରବାନ୍‌ ସିଲଡ୍‌ ଜଅନ୍‌ ରୋଡ୍‌ଲେ ଆ ତନର୍ତୁମ୍‌ ଆଡିଡ୍‌ ଜଅନ୍‌ ଆକନୁଡ଼ାୟ୍‌ ସର୍ଡାନେନ୍‌ ପାଡ଼େବା । 17 ବବର୍ସେଙନ୍‍ ୟାଗି ତର ଓବ୍ବାମର୍‌ବେନ୍‌ ଅଡ଼୍‌କୋନ୍‌, ପ୍ରବୁ ପ୍ରବୁନ୍‌ ଆତେମଡ୍‌ଲୋଙ୍‌ ରୁକୁନାବା । 18 ଆମ୍ୱେନ୍‌ କମିରନ୍‌ ଆମାୟ୍‌ମାୟନ୍‌ ଆଜନବ୍‌ ସରିନ୍‌ ଅନମଙ୍‌ଞେନ୍‌ ମିଞାମନ୍‌ ଏସୋରୋପ୍ପାୟ୍‌ଡଙ୍‌; ଆରି ସର୍ଡାଞେନ୍‌ ଆବର୍ନେ ତଗଲନ୍‌ ଆ ସନାଆର୍‌ ଜାୟ୍‌ ଆକରିନ୍‌ ଏଡକ୍କୋଡଙ୍‌ । 19 ଲବଲୋଙ୍‌ବେନ୍‍ ଆପର୍ତମ୍ମୁନ୍ ଆରଜତେନ୍‌ ଆଜ ସଦାପ୍ରବୁ ଇସ୍ୱରବେନ୍‌ ଆସିଙ୍‌ ପାଙ୍ଗାୟ୍‌ବା । ଆମ୍ୱେନ୍‌ ଆଅନ୍‌ମେନନ୍‌ଆଡଙ୍‌ ଆୟୋଙନ୍‌ ଆଡ଼ୁବ୍‌ ବାତ୍ତେ ଏଡିଁୟ୍‌ଡଙ୍‌ ।

20 ଗିୟ୍‌ବା, ଞେନ୍‌ ଡଅଙ୍‌ବେନ୍‌ ତଙର୍‌ଲୋଙନ୍‌ ଆଡନୋବ୍‌ ଆସନ୍‌ ଡ ଆନବ୍‌ଜାଡାନେନ୍‌ ଆଡ୍ରକୋନେ ଆମ୍ୱେଞ୍ଜିଆଡଙ୍‌ ଆପନାଙ୍‌ ଆସନ୍‌ ଆମୁଙ୍‌ଗଡ୍‌ବେନ୍‌ ଅବୟ୍‌ ପାଙ୍‌ଲଙ୍‌ବର୍‌ମରନ୍‌ ଆପ୍ପାୟ୍‌ଲାୟ୍‌ । 21 ଆ ବର୍ନେଲୋଙନ୍‌ ଆବୟ୍‌ଲନ୍‌ ଡକୋନାବା ଆରି ଆବର୍ନେନ୍‌ ଅମ୍‌ଡଙ୍‌ବା; ଆନିନ୍‌ଆଡଙ୍‌ ବିଜ୍ଜାର ଏଅମ୍ମେଡଙ୍‌; ଇନିଆସନ୍‌ଗାମେଣ୍ଡେନ୍‌ ଇର୍ସେବେଞ୍ଜି ଆନିନ୍‌ ଅକେମ୍ମାଏ; ଇନିଆସନ୍‌ଗାମେଣ୍ତେନ୍‌ ଆମଙ୍‌ବାନ୍‌ ଅଞୁମ୍‌ଞେନ୍‌ ଡକୋ । 22 ବନ୍‌ଡ ଆମ୍ୱେନ୍‌ ଆଙ୍ଗା ଆବର୍ନେନ୍‌ ଏଅମ୍‌ଡଙ୍‌ତେ, ଆରି ଞେନ୍‌ ଇନିଜି ଅଡ଼୍‌କୋନ୍‌ ବର୍ତନାୟ୍‌, ତିଆତେ ଏଲୁମ୍‌ତେ, ତିଡେନ୍‌ ଞେନ୍‌ ସଙ୍ଗତାମର୍‌ବେଞ୍ଜି ଆ ସଙ୍ଗତାମର୍‌ ଡ ବନେରାମର୍‌ବେଞ୍ଜି ଆ ବନେରାମର୍‌ ଡେତାୟ୍‌ । 23 ଇନିଆସନ୍‌ଗାମେଣ୍ତେନ୍‌ ପାଙ୍‌ଲଙ୍‌ବର୍‌ମର୍‌ ଞେନ୍‌ ଆମୁଙ୍‌ଗଡ୍‌ବେନ୍‌ ଜିର୍ରେ ଡଅଙ୍‌ବେନ୍‌ ଇମୋରିଅନ୍‌ ଡ ଇତିୟନ୍‌ ଡ ପିରିସିୟନ୍‌ ଡ କିଣାନିଅନ୍‌ ଡ ଇତିଅନ୍‌ ଡ ଜିବୁସିଅଞ୍ଜି ଆଡେସା ଓରୋଙ୍‌ତବେନ୍‌, ଆରି ଅନିଞ୍ଜିଆଡଙ୍‌ ଞେନ୍‌ ଅବ୍‌ଗୁରୁଡେତାୟ୍‌ । 24 ଆମ୍ୱେନ୍‌ ଆସନୁମ୍‌ଜିଆଡଙ୍‌ ଏଲୋମ୍‌ଡଙ୍‍ କି ଏସେବାଡଙ୍‍ଞ୍ଜି, ଆରି ଆଞନ୍‌ରମ୍‌ନେଞ୍ଜି ନିୟ୍‍ ଏଲୁମ୍‌ଡଙ୍‌; ବନ୍‌ଡ ଆନିଞ୍ଜିଆଡଙ୍‌ ମେରନ୍‌ ଅବ୍‌ଗୁରୁଡେବା ଆରି ଆସୋଣ୍ତାଙଞ୍ଜି ଅଡ଼୍‌କୋନ୍‌ ଅଲ୍‌ଡୋବ୍‌ବା । 25 ଆମ୍ୱେଞ୍ଜି ସଦାପ୍ରବୁ ଇସ୍ୱରବେନ୍‍ଆଡଙ୍‌ ସେବାବା; ସିଲତ୍ତେ ଆନିନ୍‌ ଗାଗାନେନ୍ ଡ ଡାଆଲୋଙନ୍‌ ଆସିର୍ବାଦତେ, ଆରି ଞେନ୍‌ ଅମଙ୍‌ବେନ୍‌ ସିଲଡ୍‌ ବନମ୍‌ବମଞ୍ଜି ସବ୍‌ଙାୟ୍‌ତାୟ୍‌ । 26 ଡେସାଲୋଙ୍‌ବେନ୍‌ ଆନ୍ନିଙ୍‌ ଅଜଲଡ୍‌କୋଡେ, ଆରି ଆନ୍ନିଙ୍‌ ଆଞ୍ଜେବୟ୍‌ ଅଃଡେ; ଞେନ୍‌ ଅନମେଙ୍‌ ବର୍ସେଙ୍‌ବେନ୍‌ ବବ୍‌ରିୟ୍‌ତାୟ୍‌ । 27 ଞେନ୍‌ ମୁକ୍କାବାବେନ୍‌ ଞେନ୍‌ ଆସନ୍‌ ବନନ୍‌ତଙ୍‌ଞେନ୍‌ ଆପ୍ପାୟ୍‌ତାୟ୍‌; ଆରି ଆମ୍ୱେନ୍‌ ଅଙ୍ଗା ଆମନ୍‍ରାଜି ଆମଙ୍‌ବା ଏଡ଼ୋତେ, ଆନିଞ୍ଜିଆଡଙ୍‌ ବାଉଲ୍ଲିକାଉଲ୍ଲି ଏମ୍ମେତାୟ୍‌ ଆରି ଞେନ୍‌ ବନେରାମର୍‌ବେଞ୍ଜିଆଡଙ୍‌ ଅବ୍‌ୟର୍‌ମୋଡ୍‌ତାୟ୍‌ । 28 ଞେନ୍‌ ମୁକ୍କାବାବେନ୍‌ ତେଙ୍କେରଞ୍ଜି ଆପ୍ପାୟ୍‌ତାୟ୍‌; ଆନିଞ୍ଜି ଇତିଅନ୍‌, କିଣାନିଅନ୍‌ ଡ ଇତିଅଞ୍ଜିଆଡଙ୍‌ ମୁକାଲୋଙ୍‍ବେନ୍‌ ସିଲଡ୍‌ ଗଙ୍‌ତିଡ୍‌ତଜି । 29 ବନ୍‌ଡ ଆବବର୍ସେଙ୍‍ ମୁକାଲୋଙ୍‌ବେନ୍‌ ସିଲଡ୍‌ ଆନିଞ୍ଜିଆଡଙ୍‌ ଅଃଗଙ୍‍ତିଡାୟ୍‌, ଏତେଲ୍‌ଡେନ୍‌ ଡେସାନ୍‌ ରିକାତେ ଆରି ବିରୁଦଲୋଙ୍‌ବେନ୍‌ କିନ୍‌ରେଙ୍‌ ଜନ୍ତୁଜି ଗୋଗୋୟ୍‌ଲେ ପାଙ୍‌ତଜି । 30 ଆମ୍ୱେଞ୍ଜି ଅଙ୍ଗାଜାୟ୍‌ ଅନ୍‌ରଙ୍‌ଗୋଗୋୟ୍‌ବେନ୍‌ ଆରି ଡେସାନ୍‌ ଆମ୍ୱେନ୍‌ଆତେ ଅନ୍‌ରଙ୍‌ଡେ, ତିଜାୟ୍‌ ଞେନ୍‌ ମୁକାଲୋଙ୍‌ବେନ୍‌ ସିଲଡ୍‌ ଆନିଞ୍ଜିଆଡଙ୍‌ ଅର୍ସୋୟ୍‌ ଅର୍ସୋୟ୍‌ ଗଙ୍‌ତିଡ୍‌ତାୟ୍‌ । 31 ଆରି ଞେନ୍‌ ସୁପ୍‌ ସମେଁୟ୍‌ଣ୍ଡ୍ରାନ୍‌ ସିଲଡ୍‌ ପଲେସ୍ଟିଅଞ୍ଜି ଆ ସମେଁୟ୍‌ଣ୍ତ୍ରା ଜାୟ୍‌ ଆରି ଆରିଙ୍‌ରିଙ୍‌ବସେଙନ୍‌ ସିଲଡ୍‌ ପରାତ ଅଲନ୍‌ ଜାୟ୍‌ ସଣ୍ତିବେନ୍‌ ଡେତେ; ଇନିଆସନ୍‍ଗାମେଣ୍ଡେ ଞେନ୍‌ ତି ଆଡେସା ଆମନ୍‍ରାଜିଆଡଙ୍‌ ଅସିଲୋଙ୍‌ବେନ୍‌ ତିୟ୍‌ତାୟ୍‌; ସିଲତ୍ତେ ମୁକାଲୋଙ୍‌ବେନ୍‌ ସିଲଡ୍‌ ଆନିଞ୍ଜିଆଡଙ୍‌ ଏଗଙ୍‍ତିଡ୍‌ତେ । 32 ଆମ୍ୱେନ୍‌ ଆନିଞ୍ଜି ସରିନ୍‌ ଅଡ଼େ ଆସନୁମ୍‍ଜି ସରିନ୍‌ ଇନ୍ନିଙ୍‌ ଆନଗଡ୍‌ ଏଗବ୍‍ରିଡଙ୍‍ । 33 ଆନିଞ୍ଜି ଡେସାଲୋଙ୍‌ବେନ୍‍ ଅଡ୍‌କୋନେଜି, ଡକୋଲଞ୍ଜିଡେନ୍‌ ବିରୁଦଲୋଙ୍‌ଞେନ୍‌ ଆମ୍ବେଞ୍ଜିଆଡଙ୍‌ ଅବ୍‌ନିର୍‌ସେତବେଞ୍ଜି; ଇନିଆସନ୍‌ଗାମେଣ୍ତେନ୍‌ ଆଙ୍ଗା ଆମ୍ୱେନ୍‌ ଆନିଞ୍ଜି ବିରୁଡଲେନ୍‍ ଇର୍ସେକାବ୍ବାଡ଼ାନ୍‍ ଆବ୍‍ଲୁମ୍‍ଲୁମ୍‌ତବେଞ୍ଜି ଇନିଆସନ୍‌ଗାମେଣ୍ଡେନ୍‌ ଆମ୍ୱେନ୍‍ ଆ କୁଣ୍ଡାୟ୍‌ସୁମଞ୍ଜି ଏସେବାଏଣ୍ଡେନ୍‌ ଏତ୍ତେଲ୍‌ଡେନ୍‌ ଆମ୍ବେନ୍‌ ଆନୋଡ଼େଙ୍‌ଗୋ ଡେତବେନ୍‌ ।