1 ଜିତ୍ରୋନ୍‌ ମିଦିନିଅନ୍‌ ଆ ରାଓଡ଼ା, ଆ ଗୋସ୍ସାମେନନ୍‌ ମସାନ୍ ତୁରେନ୍‌, ବଡ଼ିନା ଆନିନ୍‌ ପଡ଼ିଆନ୍ ଅପ୍ପଲେ ଓରେବ ଆଞୁମନ୍‌ ଇସ୍ୱରନ୍‌ ଆବରୁବା ଗୋସ୍ସାମେଡନ୍‍ ଗଙେନ୍‌ । 2 ତେତ୍ତେ ଅବୟ୍‌ ବୁଡ୍ଡାଲୋଙନ୍ ପ୍ରବୁନ୍ ଆ ପାଙ୍‌ଲଙ୍‌ବରନ୍‌ଆଡଙ୍ ଅବ୍‌ରାଙ୍‌ଡାଲନ୍ । ଆନିନ୍ ତି ଆବୁଡ୍ଡା ଆରାଙାଙେନ୍‌ ବୁଡ୍ଡାନ୍‌ ତଗୋନ୍‌ ବାତ୍ତେ ଡୁଡୁତେ ବନ୍‌ଡ ବୁଡ୍ଡାନ୍ ଅଃଜୋମ୍‌ତୋଡ୍‌ଲୋ । 3 ତିଆସନ୍‌ ମସାନ୍‍ ଗାମେନ୍‌ କେନ୍ ସାରାନ୍ନିଡାନ୍‌ ଆବିସୟ "ଞେନ୍‌ ଡାଅଡିଡ୍ ଇୟ୍‌ଲେ ଇୟ୍‌ତେ ଗିୟ୍‌ନାୟ୍ । ଇନିଆସନ୍ ବୁଡ୍ଡାନ୍ ଅଃଜ୍ଜୋମ୍‌ତୋଡେ ?"

4 ବନ୍‌ଡ ଅଙ୍ଗାଆଡିଡ୍‌ ପ୍ରବୁନ୍‌ ଗିଜେନ୍‌ ଆନିନ୍‌ ଗିୟ୍‌ଗିଜନ୍‌ ଆସନ୍‌ ଅବ୍‌ତୁୟାୟ୍‌ଲନ୍ ପାଙ୍‌ତାୟ୍, ଆଡୁଡୁ ବୁଡ୍ଡାଲୋଙନ୍ ସିଲଡ୍‌ ଆନିନ୍‌ଆଡଙ୍‌ ଓଡ୍ଡେଲେ ବରେନ୍, "ଏ ମସା ଏ ମସା"

ଆନିନ୍ ଗାମେନ୍‌, "ଗିଜା ଞେନ୍ ତେନ୍ନେ ଡକୋ ।"

5 ଇସ୍ୱରନ୍‌ ଗାମେନ୍‌, ଅବ୍‌ତୁୟାୟ୍‌ଲନ୍ ଜିର୍ଡଙାୟ୍ । ତାଲ୍‌ଜଙ୍‌ନମ୍ ଆପାଣ୍ଡୋଁୟ୍ ତବ୍‌ନା, ଇନିଆସନ୍‌ଗାମେଣ୍ଡେନ୍‌ ଅଙ୍ଗାଲୋଙ୍‌ ଆମନ୍‌ ଆତନଙ୍ ତେତ୍ତେ ମଡ଼ିର୍‍ଲ । 6 ଆନିନ୍‌ ଆରି ଗାମେନ୍‌, "ଞେନ୍ ଆପ୍ପେୟ୍‌ ଜୋଜୋବେଞ୍ଜି ଆ ଇସ୍ୱର, ଆଗରାମ୍‌ଗାମନ୍ ଅବ୍ରାଆମନ୍‌, ଇସାକନ୍‌, ଡ ଜାକୁବନ୍‌ ଆ ଇସ୍ୱର ।" ମସାନ୍ ଆମୁକ୍କାନ୍‍ ୟୋମେନ୍‌, ଇନିଆସନ୍‌ଗାମେଣ୍ଡେନ୍‌ ଆନିନ୍ ଇସ୍ୱରନ୍‌ ଆଗନିୟ୍ ଆସନ୍‌ ବତଙେନ୍‌ ।

7 ପ୍ରବୁନ୍‌ ଗାମେନ୍‌, "ଞେନ୍‌ ମିସର୍‌ ଡେସାନ୍‌ ଡକୋନ୍ ଆ ମନ୍‌ରାଞେଞ୍ଜି ଆଡଣ୍ଡ ଗିୟ୍‌ତାୟ୍; ଆରି କାବ୍ବାଡ଼ାବାଁୟ୍‌ମରଞ୍ଜି ଆଲତେଙ୍‌ଲୋଙ୍‌ ଆସନ୍‌ ଆନିଞ୍ଜି ୟେୟେଡାନ୍‌ ଅମ୍‌ଡଙ୍‌ଲାୟ୍ । ଞେନ୍ ଆବିକଡ଼ଞ୍ଜି ଜନାଲାୟ୍ । 8 ତିଆସନ୍‌ ମିସରନ୍‌ ଆମନ୍‍ରାଜି ଆସିଲୋଙ୍‌ସିଲଡ୍‌ ଆନିଞ୍ଜିଆଡଙ୍‌ ଅନୁରନ୍‌ ଆସନ୍‌ ଆରି ତି ଆଡେସାଲୋଙ୍ ସିଲଡ୍‌ ଅମ୍‌ଡୁଙ୍‌ଡାଲେ କିନାନିଅ, ଇତିଅ, ଇମୋରିଅ, ପରିସିଅ, ଇତିଅ ଡ ଜିବୁସିଅଞ୍ଜି ଅଙ୍ଗାଲୋଙ୍‌ ଡକୋତଞ୍ଜି, ତିଆ କିଣାନ ଡ଼େସାନ୍‍ ଆନିଞ୍ଜିଆଡଙ୍ ଅନୋରୋଙ୍‍ ଆସନ୍‌ ପଡ୍‌ଲନାୟ୍‌ । 9 ଇନିଆସନ୍‌ଗାମେଣ୍ଡେନ୍‌ ଇସ୍ରାଏଲମରଞ୍ଜି ଆୟନେ ଞେନ୍ ଅମ୍‌ଡଙ୍‌ତାୟ୍‌, ଆରି ମିସରନ୍‌ ଆମନ୍‍ରାଜି ଆନିଞ୍ଜିଆଡଙ୍ ଅରର୍‌ସୁୟମ୍‌ଡାନ୍ ଅମ୍ମେତଜି ତିଆତେ ଞେନ୍ ଗିୟ୍‌ଲାୟ୍ । 10 ତିଆସନ୍‌ ନମି ଞେନ୍ ଆମନ୍‌ଆଡଙ୍‌ ମିସର ଆ ରାଜା ଆମଙ୍‍ ଆପ୍ପାୟ୍‌ତମ୍‌, ଇନିଆସନ୍‌ଗାମେଣ୍ଡେନ୍‌ ଆମନ୍‌ ମିସର୍‌ ଡେସାନ୍‌ ସିଲଡ୍‌ ଇସ୍ରାଏଲନ୍‌ ଆ ମନ୍‍ରାଞେଞ୍ଜିଆଡଙ୍ ଅମ୍‍ଡୁଙ୍‍ଡାଲେ ଓରୋଙାୟ୍‍ ।"

11 ତି ସିଲଡ୍‌ ମସାନ୍‍ ଗାମେନ୍‌, "ଞେନ୍‌ ଆନା ଡ, ପାରୋନ୍‍ ଆମଙ୍‍ବା ଇୟ୍‌ଲେ ମିସର୍‌ ଡେସାନ୍‌ ସିଲଡ୍‍ ଇସ୍ରାଏଲମରଞ୍ଜି ଅମ୍‍ଡୁଙ୍‌ଲେ ଓରୋଙାୟ୍‍ ?"

12 ଇସ୍ୱରନ୍‌ ଗାମେନ୍‌, "ଞେନ୍‌ ଆମନ୍‌ ସରିନ୍‌ ଡକୋତନାୟ୍‌, ଆରି ଅଙ୍ଗାଆଡିଡ୍‌ ଆମନ୍‌ ଇସ୍ରାଏଲ ମରଞ୍ଜିଆଡଙ୍ ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‌ଲାଜି ସିଲଡ୍‌, ଆମନ୍‌ କେନ୍ ଆବରୁଲୋଙ୍ ଇସ୍ୱରନ୍‌ଆଡଙ୍‌ ସେବାବା । ଞେନ୍ ଆମନ୍‌ଆଡଙ୍ ଆପ୍ପାୟ୍‌ଲମ୍‌ ଗାମ୍‌ଲେ ଅବୟ୍ ଅରମ୍ମଡନ୍ ଜନାତମ୍ ।"

13 ବନ୍‌ଡ ମସାନ୍ ଇସ୍ୱରନ୍‌ଆଡଙ୍ ବରେନ୍, "ଅଙ୍ଗାଆଡିଡ୍‌ ଞେନ୍ ଇସ୍ରାଏଲନ୍‌ ଆମନ୍‍ରାଜି ଆମଙ୍‍ ଇୟ୍‌ଲେ ଆନିଞ୍ଜିଆଡଙ୍ ଇୟ୍‌ତେବର୍ନାଜି, ପୁର୍ବା ଜୋଜୋବେଞ୍ଜି ଆ ଇସ୍ୱର ଞେନ୍‌ଆଡଙ୍ ଅମଙ୍‌ବାବେନ୍ ଆପ୍ପାୟ୍‌ଲିଁୟ୍, ଆରି ‘ଆଞୁମନ୍ ଇନି ଗାମ୍‌ଲେ ?’ ଆନିଞ୍ଜି ଞେନ୍‌ଆଡଙ୍ ବର୍ରିଁୟ୍‌ଞ୍ଜିଡେନ୍‌, ଞେନ୍‌ ଆନିଞ୍ଜିଆଡଙ୍‌ ଇନି ଗାମାଜି ?"

14 ଇସ୍ୱରନ୍‌ ମସାନ୍‍ଆଡ଼ଙ୍‍ ବରେନ୍, "ଞେନ୍ ଆନା ଡକୋ ଞେନ୍ ଆନିନ୍ । ଆରି ଗାମେନ୍‌, ଆମନ୍‌ ଇସ୍ରାଏଲମରଞ୍ଜିଆଡଙ୍ ବରାଜି ଞେନ୍‌ ଡମ୍‌ ଡକୁ ଞେନ୍‍ମା" ଆନିନ୍‌ ଅମଙ୍‌ବାବେନ୍ ଆପ୍ପାୟ୍‌ଲିଁୟ୍ । 15 ଇସ୍ୱରନ୍‌ ମସାନ୍‍ ଆରି ବରେନ୍‍, ଆମନ୍‌ ଇସ୍ରାଏଲନ୍‌ ଆମନ୍‍ରାଜିଆଡଙ୍‌ କେନ୍‍ ଆବର୍ନେ ବରାଜି, ପୁର୍ବା ଜୋଜୋବେଞ୍ଜି ଆ ଇସ୍ୱର ଆଗରାମ୍‌ଗାମନ୍ ଅବ୍ରାଆମନ୍, ଇସାକନ୍‌ ଡ ଜାକୁବନ୍‌ ଆ ଇସ୍ୱର, ଆନା ପ୍ରବୁନ୍ ଆନିନ୍‌ଡମ୍ ଆନିନ୍ ଅମଙ୍‌ବାବେନ୍ ଞେନ୍‌ଆଡଙ୍ ଆପ୍ପାୟ୍‌ଲିଁୟ୍ । କେନ୍ ଅଞୁମ୍‌ଞେନ୍‌ ଆଏଡ଼ର୍‌ ଡକୋତନ୍ ଆରି ଅଲ୍‌ସଙ୍କୁଡ୍‌ ସଙ୍କୁଡ୍‌ ମନ୍ନେତଜି । 16 ଆମନ୍‌ ଇୟ୍‌ଲେ ଇସ୍ରାଏଲନ୍ ଆ କେଜ୍ଜା ସିଲଡ୍‌ ଆମ୍ମୁଙ୍‌ଗଡ୍‌ମରଞ୍ଜିଆଡଙ୍‌ ଅବ୍‌ରୁକ୍କୁଡାଲେ କେନ୍‌ ଆବର୍ନେ ଆନିଞ୍ଜିଆଡଙ୍ ବରାଜି ପୁର୍ବାଜୋଜୋଞ୍ଜି ଆ ଇସ୍ୱର ଆଗରାମ୍‌ଗାମନ୍ ଅବ୍ରାଆମନ୍, ଜାକୁବନ୍ ଆ ଇସ୍ୱର ପ୍ରବୁନ୍‌ ଞେନ୍‌ଆଡଙ୍‌ ଅବ୍‌ଗିୟ୍‌ତାଲନ୍‌ ବର୍ରିୟ୍ । ମିସର୍‌ ଡେସାଲୋଙନ୍ ଆମ୍ବେଞ୍ଜିଆଡଙ୍ ଇନି ଇନି ଡେଲବେନ୍ ତି ଅଡ଼୍‌କୋନ୍‌ ଞେନ୍ ଗିୟ୍‌ଲାୟ୍ । 17 ଆରି ଞେନ୍‌ ଆମ୍ୱେଞ୍ଜିଆଡଙ୍ ମିସରନ୍ ଆଡଣ୍ଡ ସିଲଡ୍‌ ଅନୁରନ୍ ଞାଙ୍‌ଲେ କିଣାନିଅନ୍‌, ଇତିଅ, ଇମୋରିଅ, ପରିସିଅ, ଇଦିଅ ଆରି ଜିବୁସିଅମରଞ୍ଜି ଆ କିଣାନ ଡେସାନ୍‌ ଏର୍ଜାଡ଼ିକାନ୍ ଆଗରଡେଲ୍‌ତେନ୍‌ ଆଡେସା ଓରୋଙ୍‍ତବେନ୍‍ ଗାମ୍‍ଲେ ବର୍ରବେନ୍‍ ।

18 ଆମ୍ବେନ୍ ଆମଙଞ୍ଜି ଇନି ଏଗାମ୍‌ତେ ଆନିଞ୍ଜି ଅମ୍‌ଡଙ୍‌ତଜି । ତିଆସନ୍‌ ଆମ୍ବେନ୍ ଡ ଇସ୍ରାଏଲ ମରଞ୍ଜି ଆମ୍ମୁଙ୍‌ଗଡ୍ ମରଞ୍ଜି ମିସରନ୍ ରାଜାନ୍ ଆମଙ୍‌ବା ଇୟ୍‌ଲେ କେନ୍ ଆବର୍ନେ ଇୟ୍‌ବର୍‌ନାବା, ଏବ୍ରିଅମରଞ୍ଜି ଆ ଇସ୍ୱର ପ୍ରବୁନ୍‌ ଞେନ୍ ସରିନ୍‌ ଅବ୍‌ରାଙ୍‌ଡାଲନ୍ । ତାସନ୍‌ କାକୁର୍ତିତନାୟ୍ ଇସ୍ୱର ପ୍ରବୁଲେନ୍‌ ଆଞୁମ୍‌ଲୋଙ୍ ଅନମଙନ୍‌ ତନିୟନ୍ ଆସନ୍‌ ନମି ଇନ୍‌ଲେଞ୍ଜିଆଡଙ୍‌ ୟାଗିଡିନା ଆତଙର୍ ଜନିରନ୍ ଆସନ୍‌ ଅନଡ଼େନ୍‌ ତିୟ୍‌ଲେ । 19 ବନ୍‌ଡ ଞେନ୍‌ ଜନା ମିସରନ୍‍ ଆ ରାଜା ଆନାପ୍ପାୟନ୍‌ ଆସନ୍‌ ଅନଡ଼େନ୍‌ ଅଃତିୟ୍‌ବେନ୍‌ ବୋର୍ସା ରନପ୍ତି ଆସି ଅନବ୍‌ଜନାନ୍‌ ଡେଏନ୍‌ ଜାକିଁୟ୍‌ଡେନ୍‌ ଜନିରନ୍ ଆସନ୍‌ ଅଃତିୟ୍‌ବେନ୍‌ ।

20 ଞେନ୍ ଅସିଞେନ୍ ତେକ୍କେଡାଲେ ମିସର୍‌ ଡେସାଲୋଙନ୍ ଅଡ଼୍‌କୋନ୍ ସାନ୍ନି କାବ୍ବାଡ଼ାନ୍ ଲୁମ୍‌ତାୟ୍ ଏତ୍ତେଲ୍‌ଡେନ୍‌ ମିସର୍‌ ଡେସାନ୍‌ ଡନଣ୍ଡାୟନ୍‌ ତିୟ୍‌ଲାୟ୍ ସିଲଡ୍‌ଡେନ୍‌ ଆନିନ୍ ଆମ୍ବେଞ୍ଜିଆଡଙ୍ ଜନିରନ୍‌ ଆସନ୍‌ ଅନଡ଼େନ୍‌ ତିୟ୍‌ତବେନ୍‌ ।

21 ଆରି "ଞେନ୍‌ ମିସର ଡେସାନ୍‌ ଆମନ୍‌ରାଜି ଆତେମଡ୍‌ କେନ୍‌ ଆମନ୍‌ରାଜିଆଡଙ୍‌ ଅସୁୟୁମ୍‌ମର୍‌ଜି ଏମ୍ମେତାୟ୍‌, ଏତ୍ତେଲ୍‌ଡେନ୍‌ ଆମ୍ବେନ୍‌ ଏଜିର୍ତେନ୍‌ ଆଡିଡ୍‌ ଆରିକାସିନ୍‌ ଏଜ୍ଜିରେ । 22 ବନ୍‌ଡ ଅଡ଼୍‌କୋନ୍‌ ଆଇବୟ୍‍ ରମ୍ମଙ୍‌ ତୟ୍‌ଲିବଜଞ୍ଜି ଡ ତୟ୍‌ଲିସିଂବଜଞ୍ଜି ଆମଙ୍‌ବା ସିଲଡ୍‌ ରୁପାନ୍ ଆ ରନୁରୁନ୍‌, ସୁନ୍ନାନ୍ ଆ ରନୁରୁନ୍‌ ଡ ସିନ୍‌ରିନ୍ ବେଡ୍‌ଲେ ପାଙ୍‌ତଜି । ଆରି ତିଆତେ ଆମ୍ବେଞ୍ଜି ଡାଙ୍ଗଡ଼ିଅନ୍‌ବେଞ୍ଜି ଡ ଡାଙ୍ଗାଡ଼ାଅନ୍‌ବେଞ୍ଜିଆଡଙ୍ ଇୟ୍‌ନବ୍ ଜିଜିବାଜି ଆରି ଏନ୍ନେଗନ୍‌ ମିସରନ୍ ଆମନ୍‌ରାଜି ଆ ଜିନିସ ବୋୟ୍‌ଲେ ଏପାଙ୍‌ତେ ।"