1 ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, "ନମି ଞେନ୍‌ ପାରୋନ୍‍ଆଡଙ୍ ଇନି ଏଙ୍ଗାତାୟ୍ ଆମନ୍‌ ଗିୟ୍‌ତେ । ଇନିଆସନ୍‌ଗାମେଣ୍ଡେନ୍‌ ବୋର୍ସାଞେନ୍ ଅବ୍‌ତୁୟ୍‌ଲାୟ୍‌ଡେନ୍ ଆନିନ୍ ମନ୍‌ରାଞ୍ଜିଆଡଙ୍ ଅମ୍‌ରେଙ୍‌ତେ । ଆରି ଡେନ୍ନାଞେନ୍‌ ଆବୋର୍ସା ଅବ୍‌ତୁୟ୍‌ଲାୟ୍‌ଡେନ୍‌ ଆଡେସାନ୍‌ ସିଲଡ୍‌ ଆନିଞ୍ଜିଆଡଙ୍ ଅମ୍‌ଡୁଙ୍‌ଲେ ସେତ୍ତଜି ।"

2 ଇସ୍ୱରନ୍‌ ମସାନ୍‍ ସରିନ୍‌ କଡାଡ଼ିଲନ୍ ଆରି ବତର ଗାମେନ୍‌ । "ଞେନ୍ ମା ପ୍ରବୁନ୍‌ । 3 ଞେନ୍‌ ଅବ୍ରାଆମନ୍‌, ଇସାକନ୍, ଡ ଜାକୁବନ୍‌ ଆ ବୋର୍ସା ଇସ୍ୱରନ୍‌ ଗାମ୍‍ଲେ ଅବ୍‌ତୁୟ୍‌ଡମ୍‌ଲନାୟ୍‌, ବନ୍‌ଡ ଅଞୁମ୍‌ଞେନ୍ ପ୍ରବୁ ଗାମ୍‌ଲେ ଆନିଞ୍ଜିଆଡଙ୍‌ ଅଃସେକୁଲ୍‌ଲନାୟ୍‌ । 4 ଅଙ୍ଗା ଡେସାଲୋଙ୍ ଆନିଞ୍ଜି ଡକୋଲଞ୍ଜି, ତି ଆ କିଣାନ ଡେସାନ୍‌ ଆନିଞ୍ଜିଆଡଙ୍‌ ତିୟ୍‌ତାଜି ଗାମ୍‌ଲେ, ଆନିଞ୍ଜି ସରିନ୍‌ ଅନଗଡନ୍‌ ଗବ୍‌ରିଲାୟ୍ । 5 ନମି ମିସରବାଜି ଆନାଜିଆଡଙ୍‌ କମ୍ବାରିନ୍‌ ଡକ୍କୋଏଞ୍ଜି, ତି ଆ ଇସ୍ରାଏଲନ୍‌ ଆନ୍‌ଞ୍ଜି ଆୟନେ ଞେନ୍ ଅମ୍‌ଡଙ୍‌ଲାୟ୍‌, ତିଆସନ୍‌ ଅନସୟ୍‌ଞେନ୍ ଞେନ୍ ମନ୍ନେଲାୟ୍ । 6 ତିଆସନ୍‌ ଇସ୍ରାଏଲନ୍‌ ଆ ଅନ୍‌ଞ୍ଜିଆଡଙ୍‌ ବର୍ବାଜି, ଞେନ୍‌ ପ୍ରବୁନ୍‌; ଞେନ୍‌ ଆମ୍ୱେଞ୍ଜିଆଡଙ୍‌ ମିସରବାଜି ଆ କାବ୍ବାଡ଼ାନ୍ ସିଲଡ୍‌ ଅବ୍‌ଡ଼ୁର୍‌ତାଜି ଆରି ଞେନ୍ ଆମ୍ବେଞ୍ଜିଆଡଙ୍ ଆ କମ୍ବାରି କାବ୍ବାଡ଼ାନ୍ ସିଲଡ୍‌ ଉର୍‌ତାଜି । ଞେନ୍‌ ସୋଡ଼ା ଡେନ୍ନାନ୍‌ ଡ ସୋଡ଼ା ସୋଡ଼ା ଡନଣ୍ଡାୟନ୍‌ ବାତ୍ତେ ଆମ୍ବେଞ୍ଜିଆଡଙ୍‌ ଡୋବ୍‌ତବେନ୍‌ । 7 ଞେନ୍ ଆମ୍ବେଞ୍ଜିଆଡଙ୍ ମନ୍‌ରାଞେନ୍ ଅନ୍ତମ୍‌ ଜାତବେନ୍‌, ଆରି ଞେନ୍ ଇସ୍ୱରବେନ୍ ଡେଲାୟ୍‌ । ମିସରବାଜି ଆକାବ୍ବାଡ଼ା ସିଲଡ୍‌ ଅନବ୍‌ଡ଼ୁର୍‌ମର୍‌ ବେନ୍‌ ପ୍ରବୁ ଇସ୍ୱରବେନ୍ ତିଆତେ ଆମ୍ବେନ୍ ଜନାତବେନ୍ । 8 ଞେନ୍ ଅବ୍ରାଆମନ୍, ଇସାକନ୍, ଡ ଜାକୁବନ୍‌ଆଡଙ୍ ଅଙ୍ଗା ଡେସା ତନିୟନ୍ ଆସନ୍‌ ସିବ୍‌ଡେୟ୍‌ବର୍ରନାୟ୍; ତି ଆ ଡେସା ଞେନ୍ ଆମ୍ବେଞ୍ଜିଆଡଙ୍ ଓରୋଙ୍‌ତବେନ୍ ଆରି ତେତ୍ତେ ଡରକୋନେନ୍ ଆସନ୍‌ ଞେନ୍ ଆମ୍ବେଞ୍ଜିଆଡଙ୍ ତିୟ୍‌ତବେନ୍‌ ଞେନ୍ ପ୍ରବୁ ଇସ୍ୱରନ୍‌ ।"

9 ମସାନ୍ ଇସ୍ରାଏଲମରଞ୍ଜିଆଡଙ୍ ବରେଞ୍ଜି ବନ୍‌ଡ ଆନିଞ୍ଜି ଆବର୍ନେନ୍ ଅଃନମ୍‌ଡଙ୍‌ଲଜି, ଇନିଆସନ୍‌ଗାମେଣ୍ଡେନ୍‌ କମ୍ବାରିନ୍ ଆ କାବ୍ବାଡ଼ାନ୍ ଆସନ୍‌ ଆ ପରାନ୍ନାଞ୍ଜି ଆପଲାଙ୍ ।

10 ପ୍ରବୁନ୍‌ ମସାନ୍‍ଆଡଙ୍‌ ବରେନ୍‌, 11 "ଆମନ୍‌ ଜିରା ଆରି ମିସରନ୍ ଆ ରାଜା ପାରୋନ୍‌ଆଡଙ୍‌ ଇୟ୍‌ବରା ଆନିନ୍ ଆଡେସାନ୍ ଆଡ୍ରକୋତଞ୍ଜି ଆ ଇସ୍ରାଏଲମରଞ୍ଜିଆଡଙ୍ ଅମ୍‌ରେଙ୍‌ତଜି ।"

12 ବନ୍‌ଡ ମସାନ୍‍ ପ୍ରବୁନ୍‍ଆଡଙ୍ ବରେନ୍, "ଗିଜା ଇସ୍ରାଏଲ୍‌ମରଞ୍ଜି ବର୍ନେଞେନ୍‌ ଅଃନମ୍‌ଡଙେଜି, ଞେନ୍‌ ଆଜାଡ୍ଡାଗୋ ବର୍ତନାୟ୍‌ । ତିଆସନ୍‌ ବର୍ନେଞେନ୍ ପାରୋନ୍‌ ଏଙ୍ଗାଲେ ଅମ୍‌ଡଙେ ?"

13 ପ୍ରବୁନ୍‌ ମସାନ୍‍ ଡ ଆରୋଣନ୍‌ ସରିନ୍‌ କଡାଡ଼ିଲଞ୍ଜି, "ଇସ୍ରାଏଲମରଞ୍ଜି ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଆନୋରୋଙ୍ ଆସନ୍‌ ଡ ଇସ୍ରାଏଲ୍‌ମରଞ୍ଜି ଆମଙ୍‌ବା ମିସର୍‌ ଡେସାନ୍‌ ଆ ରାଜା ପାରୋନ୍‌ ଆମଙ୍‌ବା ଆରି ଇସ୍ରାଏଲମରଞ୍ଜି ଆମଙ୍‌ବା ଆବର୍ରନ୍‌ ଆବର୍ନେ ଆନିଞ୍ଜିଆଡଙ୍‌ ବାଞେଞ୍ଜି ।"

14 କେନ୍‌ ଅଡ଼୍‌କୋ ମନ୍‌ରାନ୍‌ ତର୍ଡମ୍‌ ତର୍ଡମ୍‌ ଆପ୍ପେୟଞ୍ଜି ଆକେଜ୍ଜାଲୋଙ୍‌ସିଲଡ୍‌ ମୁଡ଼ ଡକୋଏଞ୍ଜି, ଇସ୍ରାଏଲନ୍‌ ଆ ସୋଡ଼ା ଡାଙ୍ଗାଡ଼ାଅନ୍‌ ରୁବେନନ୍ ଆଅନ୍‌ଞ୍ଜି ଅନୋକନ୍‌, ପଲ୍ଲୁନ୍‌, ଇସ୍ରୋଣନ୍‌ ଡ କର୍ମିନ୍‌, କେନ୍‌ଆନିଞ୍ଜି ରୁବେନନ୍‌ ଆକେଜ୍ଜା । 15 ଆରି,ସିମିଅନନ୍‍ ଆ ଡାଙ୍ଗାଡ଼ାଅନ୍ ଜିମୁଏଲ୍‍, ଜାମିନ୍‌, ଓଅଦ୍‍, ଜାକିନ୍‍, ସୋଅରନ୍, ଆରି କିଣାନିଆନ୍‌ ଆଡୁକରି ଆ ଡାଙ୍ଗାଡ଼ାଅନ୍ ସଉଲ, କେନ୍‌ଆନିଞ୍ଜି ସିମିଅନନ୍‍ ଆକେଜ୍ଜାମର୍‌ଜି । 16 କେଜ୍ଜାନ୍ ଗିୟ୍‌ଲବଡେନ୍ ଲେବିନ୍‍ ଆ ଡାଙ୍ଗାଡ଼ାଅଞ୍ଜି ଆଞୁମ୍‌ ଗେର୍ସୋନ୍‍, କଆତ ଡ ମରାରି; ଲେବିନ୍‍ ବସଅ ତିରିସି ସାତ ବର୍ସେଙ୍‍ ଡକୋଲନ୍‌ । 17 ଆରି ଗେର୍ସୋନନ୍ ଆ ଡାଙ୍ଗଡ଼ାଅନଞ୍ଜି ବାଗୁ; ଲିବନିନ୍ ଡ ସିମିଅନନ୍, କେନ୍‌ଆନିଞ୍ଜି ଜୋଜୋଞ୍ଜି ଆ କେଜ୍ଜା ଡକୋଏଞ୍ଜି । 18 କଆତନ୍‌ ଆ ଡାଙ୍ଗଡ଼ାଅନ୍‌ ଉଞ୍ଜି ଡକୋଏଞ୍ଜି; ଅମ୍ରମନ୍‍, ଜିସରନ୍‌, ଇବ୍ରୋଣନ୍‌, ଡ ଉସିଏଲନ୍‍ । କଆତନ୍‌ ବସଅ ତେତିସି ବର୍ସେଙ୍‍ ଡକୋଲନ୍‌ । 19 ମରାରିରନ୍‍ ଆ ଡାଙ୍ଗଡ଼ାଅନ୍‌ ବାଗୁ; ମଅଲିନ୍‌, ଡ ମୁସିନନ୍‌, ଲେବିନ୍ କେନ୍ ଆକେଜ୍ଜାଜି ଡକୋଏନ୍ ।

20 ଅମ୍ରାମନ୍ ଆପ୍ପେୟନ୍ ଆତନାନ୍ ଜୋକେବଦନ୍‍ଆଡଙ୍‌ ବିବାଲନ୍‌, ଆଅନଞ୍ଜି ଆରୋଣନ୍‌ ଡ ମସାନ୍‍ । ଅମ୍ରାମନ୍‍ ବସଅ ତିରିସି ସାତ ବର୍ସେଙ୍‍ ଡକୋଲନ୍‌ । 21 ଜିସରନ୍‍ ଆ ଡାଙ୍ଗଡ଼ାଅନ୍ ୟାଗି; କୋରଅନ୍‌, ନେପଗନ୍, ଡ ସିକ୍ରିନନ୍ । 22 ଉସିଏଲନ୍‍ ଆ ଡାଙ୍ଗାଡ଼ାଅନ୍‌ ନିୟ୍ ୟାଗି; ମିସାଏଲନ୍, ଇଲିସାପନନ୍‍, ଡ ସିତ୍ରିନ୍‌ ।

23 ଆରୋଣନ୍‌ ଏଲିସାବେତନ୍‌ଆଡଙ୍ ବିବାଲନ୍, ଆନିନ୍ ଅମିନାଦବନ୍‌ ଆ ଡାଙ୍ଗଡିଅନ୍‍ ଆରି ନଅସୋନନ୍‍ ଆତନାନ୍‍ ଡକୋଏନ୍; ଆନିନ୍‌ ନାଦବନ୍‍, ଅବିଉନ୍‌, ଇଲିଆଜରନ୍‌, ଡ ଇତାମରନ୍‍ କୋଡେଞ୍ଜି । 24 କୋରଅନ୍‍ ଆ ଡାଙ୍ଗାଡ଼ାଅଞ୍ଜି ୟାଗି; ଅସିରନ୍‍, ଇଲ୍‍କାନାନ୍, ଡ ଅବିଆସପନ୍‌; କେନ୍‍ ଆନିଞ୍ଜି କୋରଅନ୍‍ ଆକେଜ୍ଜାଜି । 25 ଆରୋଣନ୍‌ ଆ ଡାଙ୍ଗଡ଼ାଅନ୍‌ ଇଲିଆଜରନ୍‍, ଆନିନ୍ ପୁଟିଏଲନ୍‍ ଆ ଡାଙ୍ଗଡିଅନନ୍‌ଆଡଙ୍ ବିବାଲନ୍‍, ଆନିନ୍ ପିନଅସନନ୍‍ଆଡଙ୍‌ କୋଡେନ୍‌, କେନ୍‌ଆନିଞ୍ଜି ଲେବିଅମର୍‌ଜି ଆକେଜ୍ଜାଲୋଙନ୍‍ ଆନିଞ୍ଜି ସୋଡ଼ା ଡକୋଏଞ୍ଜି ।

26 ପ୍ରବୁନ୍‌ ଆରୋଣନ୍‌ ଡ ମସାନ୍‍ଆଡଙ୍ ବରେଞ୍ଜି, "ଆମ୍ବେନ୍ ସିପ୍ପାୟଞ୍ଜି ଆସିଲୋଙ୍ ସିଲଡ୍‌ ଇସ୍ରାଏଲମରଞ୍ଜିଆଡଙ୍ ମିସରନ୍ ସିଲଡ୍‌ ଅମ୍‌ଡୁଙ୍‌ଲେ ଓରୋଙାୟ୍‌ବାଜି ।" 27 କେନ୍‍ ଆନିଞ୍ଜି ମିସରନ୍‍ ସିଲଡ୍‌ ଇସ୍ରାଏଲ ମରଞ୍ଜିଆଡଙ୍‌ ଅମ୍‍ଡୁଙ୍‌ଲେ ଅନୋରୋଙନ୍‌ ଆସନ୍‌ ମିସରନ୍‍ ରାଜାନ୍‍ ପାରୋନ୍‍ ସରିନ୍‌ କଡାଡ଼ିଲଞ୍ଜି । କେନ୍‌ଆନିଞ୍ଜି ମସାନ୍‍ ଡ ଆରୋଣନ୍‌ ।

28 ମସାନ୍ ମିସର୍‌ ଡେସାନ୍‌ ଆଡ୍ରକୋଲନ୍ ଆଡିଡ୍ ପ୍ରବୁନ୍‌ ଆନିନ୍‌ ସରିନ୍‌ କଡାଡ଼ିଲଞ୍ଜି, 29 ପ୍ରବୁନ୍‌ ମସାନ୍‍ଆଡଙ୍ ବରେନ୍, "ଞେନ୍‌ ପ୍ରବୁନ୍‌ । ଞେନ୍ ଆମ୍ବେଞ୍ଜିଆଡଙ୍ ଇନିଜି ବର୍ତବେନ୍ ତିଆତେ ଅଡ଼୍‌କୋନ୍ ମିସରନ୍ ଆ ରାଜାଆଡଙ୍ ଇୟ୍‌ବର୍ବା ।"

30 ବନ୍‌ଡ ମସାନ୍ ପ୍ରବୁନ୍ ଆତେମଡ୍ ଗାମେନ୍‌, "ଆମନ୍‌ ଜନା ଞେନ୍ ଜରାଡ୍ଡା ବର୍ତନାୟ୍‌; ବର୍ନେଞେନ୍ ଏଙ୍ଗାଲେ ମିସରନ୍ ଆ ରାଜା ଅମ୍‌ଡଙେ ?"