Mateus 20

Wasang’hanaji mumgunda wa mizabibu

1 "Ufaume wa Kuulanga uilinga na munhu yeli na mgunda wa mizabibu, yalawile yaidawile imitondo kwa mbuli ya kuweng’ha chibabalua wasang’hanaji mumgunda wake. 2 Kaitogolela nao kuweng’ha chila munhu sente ya maliho ga zua dimwe, amala kawagala mumgunda wake wa mizabibu. 3 Kalawa chipindi cha saa nhatu imitondo, kawaona wanhu wamwenga wema mdigulilo bila sang’hano. 4 Kawalongela, ‘Na mweye gendeni mkasang’hane mumgunda wangu wa mizabibu, na niye nowaliheni chimlondeka kubokela.’ 5 Ivo, waita. Iyo mwene mgunda kalawa kaidi mchipindi cha saa sita na saa tisa, katenda ivija. 6 Hata chipindi cha saa kumi na moja chigulogulo, kalawa kaidi, kawavika wanhu wamwenga wema mdigulilo. Ivo kawauza, ‘Habali mwima hano misi yose bila sang’hano?’ 7 Wamwidika, ‘kwavija habule munhu yaching’ile chibalua.’ Nayo kawalongela, ‘Na mweye gendeni mkasang’hane sang’hano mumgunda wangu wa mizabibu.’ 8 "Viivikile chigulogulo, iyo mwene mgunda kamlongela mgoga sente wake, ‘Wakeme vibalua uwalihe chitumetume chao, uhasongela kwa waja wezile hachisogo, na kukomelezela waja walongole.’ 9 Ivo weza waja weng’higwe chibalua saa kumi na moja, chila munhu kabokela sente ya maliho ga zua dimwe. 10 Waja wa walongole viwavikile wakala wagize wobokela hakulu, mbali hata wao weng’higwa chila imwe sente ya maliho ga zua dimwe. 11 Wazibokela sente izo, wasonga kumnung’hunikila ija mwene mgunda. Ivo wamlongela, huchitendele goya. 12 Walonga, ‘Wanhu wano weng’higwe chibalua haichikomelezo wasang’hana sang’hano kwa saa dimwe tu, habali kuchiliha sawa na wao kuno cheye chifunya moyo kwa kusang’hana sang’hano ndala imisi na zua kali?’

13 "Baho ija mwene mgunda kamwidika munhu imwe mmwao, ‘Mbwiga sikubunzile chinhu! Ivo, hachiitogolele chitumetume cha sente ya maliho ga zua dimwe? 14 Sola chuulondeka kwing’higwa, usegele. Nolonda kumwing’ha ino wa ichikomelezo kuilinga na gweye. 15 Ivo, silondeka kusang’hana jojose dinilonda na sente zangu nilinazo? Ivo, koona maya kwa vija vinh’endile goya.’"

16 Haichikomelezo Yesu kalonga, "Ivo, wachikomelezo wolongola na walongole wokua hachisogo."