Mateus 25

Mfano wa mhambe kumi

1 "Chipindi icho, ufaume wa kuulanga woilinga na mhambe kumi wasolile vimuli vao, kuita kumbokela mfunga zengele. 2 Mmwao mwa waja mhambe kumi watano wakala wabozi na watano wakala na nzewele. 3 Waja wabozi wasola koloboi zao, mbali hawasolile mavuta ga usigavu. 4 Mbali waja weli na nzewele wasola mavuta ga usigavu na mzi koloboi zao. 5 Kwa vija mfunga zengele kakawa kuvika, waja mhambe wose wakukila wawasa. 6 Muichilo chikulu hakala na nyangi, ‘Cheleko, cheleko! Mfunga zengele kokwiza, gendeni mkambokele.’ 7 Baho waja mhambe wose walamka, wazitanda goya koloboi zao. 8 Waja wabozi wawalongela waja weli na nzewele, ‘Ching’heni mavuta genu chidogo manake koloboi zetu zofa.’ 9 Mbali waja weli na nzewele wawalongela, ‘Mavuta hagachenela cheye na mweye! Yofaya muite mmagenge mkaigulile mavuta genu!’ 10 Ivo waja mhambe wabozi viwaitile kugula mavuta, mfunga zengele kavika, na waja mhambe waitandile goya wengila hamwe nayo muing’anda ya zengele, amala lwivi uhindigwa. 11 Hamwande waja mhambe wabozi weza, wakema, ‘Gomkulu, gomkulu, chivugulile! 12 Mbali yeye kawedika, ‘Kweli nomlongeni, siwamanyile mweye.’" 13 Hachikomelezo Yesu kalonga, "Ivo itandeni, kwa vija hamdimanya zua hebu saa.