Mateus 25

Mfano wa watumigwa wadatu

14 "Chipindi icho yokuwa kama munhu imwe yafungile mwanza wa kutali. Kawakema watumigwa wake, kaweng’ha vinhu vake. 15 Kamwing’ha chila munhu vija viyodaha, imwe sente vikadi vitano va zahabu, na imwenga sente vikadi vidi va zahabu na imwenga sente kadi imwe ya zahabu, amala kafunga mwanza. 16 Bahaja ija yeng’higwe sente vikadi vitano kazisang’hanila sang’hano na zongezeka vikadi vimwenga vitano. 17 Ivija ija yeng’higwe vikadi vidi va zahabu nayo zongezeka vikadi vidi va zahabu. 18 Mbali ija yeng’higwe sente ya kikadi chimwe, kaita kahimba kombo muisi kakisila, kaifisa sente imwe ya zahabu ya mkulu wake.

19 "Vichibitile chipindi chitali, mndewa ija kabwela, kasonga kupeta hisabu ya vinhu vake. 20 Mtumigwa yeng’higwe sente za zahabu tano keza, kasola zahabu tano fungu jongezeke, kamlongela, ‘Gomkulu kuning’ha sente zahabu tano, hano hana sente zahabu tano fungu jongezeke.’ 21 ‘Mkulu wake kamlongela, ‘Kusang’hana goya, mtumigwa unogile na utogoligwe. Kutogoligwa kwa mbuli ndodo ivo nokwing’ha gamwenga makulu. Izo udeng’helele hamwe na mkulu wako!’ 22 Mtumgwa yeng’higwe sente zahabu mbili keza, kalava zahabu mbili zongezeke, kalonga, ‘Gomkulu kuning’ha sente zahabu mbili, sola zahabu zimwenga mafungu maidi gongezeke gamhatile.’ 23 ‘Mkulu wake kamlongela, ‘Kusang’hana goya mtumigwa unogile na utogoligwe. Kutogoligwa kwa mbuli ndodo ivo nokwing’ha gamwenga makulu. Izo udeng’helele hamwe na mkulu wako!’ 24 Mbali ija yeng’higwe sente zahabu imwe keza, kalonga ‘Gomkulu, nivimanya gweye hubunzagwa. Kosola chinhu si chako na kokwaha chinhu huchihandile. 25 Nidumba na niihimbila sente yako ya zahabu mdikombo. Sola basi sente yako imwe ya zahabu.’ 26 ‘Mkulu wake kamlongela, ‘Gweye iyo mtumigwa mbananzi na mbwa! Kovimanya niye nokwaha chinhu sichihandile na nosola chinhu si changu. 27 Ivo kulondeka, kuika sente yangu ya zahabu mwa wanhu wakuzisang’hanila sang’hano amala nihabwela mhate fungu jangu na dija fungu jongezeke. 28 Ivo, mbokeni iyo sente ya zahabu inimwing’ile mwing’heni munhu ija yeli na vikadi kumi va zahabu. 29 Manake, munhu yokisang’hanila sang’hano chinhu chinimwing’ile nomwongezela na chimwenga, nayo kokua navo vingi. Mbali munhu yoyose ija hakisang’hanila sang’hano chidodo chinimwing’ile, hata icho chidodo chiyeli nacho, nacho nomboka. 30 Na kwa mbuli ya ino mtumigwa yeli bule fungu chongezeke, mwaseni kunze mdizizi! Uko kokua na ndilo na kuluma meno.’