Êxodo 12

Ilagi’li’zyo lya Pasaka

1 Gu’ku' Mulungu wav’awi’laga Mose na Aloni, aho v’av’age v’akaali' v’ali' mu nsi' ya Misili ati', 2 "Mwezi gwenu’gu' gu’ku’v’a gwa kwandya gwa mwaka ku' winywe. 3 V’awi’lagi iv’ilingano lyose lya V’aizilaeli ati', lu’siku' lwa iku’mi lwa mwezi gwenu’gu', ki’la mugosya ha lu’go lwakwe alasole kadi’lana kamo ku’nguno ya mugana gwakwe, na yeni’yi' yi’lav’e ku' ki’la nnumba. 4 U’lu' mbe nnumba yi’mo yi’li' na v’antu' v’adoo av’o v’akakowola ku’mala kadi’lana kose, nnumba yeni’yo yi’lav’adime v’asangi’le na v’antu' v’a nnumba ya wu’zenganwa wa bi’hi', ku’londana na wingi wa v’antu' v’a mwenu’mo. Haho v’alasogole ndimu ku’londana na ki’lyi’le cha ki’la muntu'. 5 Kadi’lana ako mulasogole, kav’e kagosya ka mwaka gu’mo, ako kakav’ile na wu’lema. Mukowolile ku’sola mugati' na nkolo ninga mbu’li. 6 Mulav’e muli’yi’tu’u’la yeni’yo ndimu na ku’yi’su’nga mpaka lu’siku' lwa iku’mi na ine lwa mwezi gwenu’gu'. Lu’siku' lwenu’lo mpi’ndi', iv’ilingano lyose lya V’aizilaeli yi’lav’adime ku’si’nza ndimu zyeni’zyo. 7 Hangi' v’alav’e v’ali’sola lwandi' lwa magazi ga ndimu zyeni’zyo, na ku’v’ila mu mi’i’mo zya muzigo na mu vipimbilyango vya mu igu’lya, ku' ki’la nnumba i’yo v’alav’e v’ali’lyi’la tu’di’lana twenu’to. 8 Wu’ziku' wene wu’wo v’alav’e v’ali’yi’komela nyama ha moto, na ku’yi’lya haki’mo na mugate u’go gu’katumba na nyenyi zya madu’tu' ndu’lu'. 9 Ku’du' mwize muyi’lye ntoto, ninga ya ku’tekwa na minzi', sumbwa mulav’e muli’yi’komela ha moto, haki’mo na mutwe, magu’lu', vikono na nyama zyayo zya mugati'. 10 Hangi' ku’du' mwize muv’e muli’lekela nyama ninga yi’mo mpaka ndiyu'. U’lu' yasigali’la mpaka ndiyu', mulayi’time ha moto. 11 Kadi’lana kenako mulakalye i’vi: Mulitunge mikwato mu miki’mbi’li' zinywe, ku’no muzwalile vilatu', na ku’dima milanga mu makono ginywe. Hangi' mulalye wangu' wangu'. Yeni’yo yi’li' Pasaka yamwa Gu’ku' Mulungu.

12 "Nanne ndav’i’te wu’ziku' wenu’wo mu nsi' yose ya Misili, na ku’wu’laga ki’la ki’v’yalwa cha mbele cha v’antu' na cha ndimu. Nanne ndazitemele ki’tanga milungu zyose zya mu Misili. Ene hu' ni' Gu’ku' Mulungu. 13 Ali’vi ku' lwandi' lwinywe, magazi genago galav’e hu' lu’manyi’lo lwa ku’lagi’la nnumba i’zyo muli'. Nanne ndav’e u’lu' nagawona magazi genago, ndav’i’te ha igu’lya yinywe, ki’gele ku’du' mupandi’ke ki’gu’mo cha ku’zimangu’ziwa, aho ndav’e nu’yi’gu’ma nsi' ya Misili. 14 Lu’siku' lwenu’lo lu’lav’e lwa mwizu' ku' winywe, na inywe mulalu’v’ezye lu’v’e mwanya gwamwa Gu’ku' Mulungu. Yeni’yi' yi’lav’e nhama ya nhananhana ku’v’ezya mwanya mu wu’v’yalwa winywe wose."

15 Hangi' Gu’ku' Mulungu wayombaga ati', "Mugati' na nsiku' mupungati' mulav’e muli’lya migate i’zyo zikatumba. Lu’siku' lwa kwandya lwa nsiku' zyeni’zyo, mulasinie itumbyo mu nnumba zinywe. Muntu' u’yo alalye ki’ntu' ninga ki’mo i’cho ki’li' na itumbyo mu itungo lya nsiku' zyeni’zyo mupungati'. Yi’lamudime akomwe ku’le na iv’ilingano lya V’aizilaeli. 16 Lu’siku' lwa kwandya na lu’siku' lwa mupungati' mulav’e na nkuti’la nsondo. Mugati' na nsiku' zyeni’zyo iv’i’li' ku’du' mwize mutumame muli’mo ninga gu’mo, sumbwa muli’mo gwa kwiv’anga ki’liwa cha ki’la yu’mo, cheni’cho du' hu' i’cho mulav’ezye. 17 Mudime nsiku' zya ku’v’ezya Mwanya gwa Migate I’zyo Zikatumba, ku’nguno gwenu’go hu' gu’li' mwanya gwa kwizu’ki’la lu’siku' u’lo ndi' namufumya inywe, madale ga V’aizilaeli ku’fuma ku' Misili. Lu’siku' lwenu’lo mulalu’v’ezezye mwizu' ku' wu’v’yalwa winywe wose ku’v’a nhama ya nhananhana. 18 Mugati' na mwezi gwa kwandya, mulav’e muli’lya migate i’zyo zikatumba, ku’lamuli’la mpi’ndi' ya lu’siku' lwa iku’mi na ine lwa mwezi, mpaka mpi’ndi' ya lu’siku' lwa maku’mi av’i’li' na lu’mo. 19 Mu itungo lyeni’lo lya nsiku' mupungati', ku’du' mwize muv’e na itumbyo ninga hadoo mugati' na nnumba zinywe. Muntu' u’yo alalye ki’ntu' ninga ki’mo cha wu’sankalazu, av’e mugeni mwizi’li’zi ninga muv’anda, yi’lamudime akomwe ku’le na iv’ilingano lya V’aizilaeli. 20 Ki’la aho mulakikale, gu’li' muzilo ku’lya cha itumbyo. Yi’li’mudima ku’lya migate i’zyo zikatumba."

Pasaka ya kwandya

21 Haho Mose wav’itanaga v’anamala v’ose v’a Izilaeli, na ku’v’awi’la ati', "Yagi mukasogole tu’di’lana ku’londana na migana zinywe i’vyo zili', na mukasi’nze ki’la yu’mo kadi’lana ka Pasaka. 22 Musole katambi' ka itigala lya hisopo, na ku’dobya magazi mu ki’seme na ku’v’ila ha vipimbilyango, na mu mi’i’mo zyose iv’i’li' zya mizigo zya nnumba zinywe. Muntu' ninga yu’mo ku’du' afume ha ibala na muzigo gwa nnumba yakwe mpaka ndiyu'. 23 Ku’nguno Gu’ku' Mulungu aku’v’i’ta ki’gele av’agu’me v’enav’o V’amisili. Ali’vi u’lu' wagawona magazi genago ha vipimbilyango na mu mi’i’mo zya mizigo, aku’v’i’ta ha igu’lya, aku’leka ku’muzumi’zya muwu’lagi ingi’le mu nnumba zinywe na ku’muwu’laga inywe. 24 Muli’dime igambo lyeni’li', inywe na v’av’yalwa v’inywe, yi’v’e nhama ya nhananhana. 25 Aho mulav’e mwingi’la mu nsi' i’yo Gu’ku' Mulungu alamupe, ki’ti' i’vyo walagana, yi’lamudime ku’dima mwanya gwenu’gu'. 26 Hangi' ki’la aho v’ana v’inywe v’alav’e u’lu' v’awu’zya, ‘Mwanya gwenu’gu' gu’li' na nguno ki'?’ 27 Hohene mulav’awi’le ati', ‘Cheni’chi' ki’li' ki’taambo cha Pasaka yamwa Gu’ku' Mulungu, u’yo ndi' wav’i’ta ha igu’lya na nnumba zya V’aizilaeli ku' nsi' ya Misili, aho wav’age ali’v’awu’laga V’amisili, ali’vi iswe akaku’wu’lagile.’ " Haho V’aizilaeli v’akundamyaga mitwe zyav’o na ku’ku’v’i’i’la.

28 Hangi' V’aizilaeli v’ayaga ku’kav’ezya magambo genago, ki’ti' i’vyo Gu’ku' Mulungu wav’alagi’li’zizye Mose na Aloni.

Mulungu ali’wu’laga v’av’yalwa v’a mbele v’a Ki’misili

29 Yav’aga mu itungo lya wu’ziku' wa hagati', Gu’ku' Mulungu wamuwu’lagaga ki’la muv’yalwa wa mbele mu nsi' ya Misili. Ku’lamuli’la muv’yalwa wa mbele wamwa Falao u’yo ikali’lile isumbi' lya wu’temi, mpaka muv’yalwa wa mbele wa mutungwa wa mu igelezya. Hangi' na viv’yalwa vya mbele vya ndimu navyo vyafwaga. 30 Hohene Falao, v’akumba v’akwe v’ose, na V’amisili v’ose, v’atunu’laga wu’ziku'. Kasinaga ku’li' na ki’li’lo ki’hanya mu nsi' yose ya Misili, ku’nguno ndi' ku’du’hu' nnumba ninga yi’mo i’yo akafwile muntu'. 31 Haho Falao wav’itanaga Mose na Aloni wu’ziku' wenu’wo, na ku’v’awi’la ati', "Wu’ki! Mumufume mugati' na v’antu' v’anne. Yagi inywe haki’mo na V’aizilaeli, mukamwisenge Gu’ku' Mulungu ki’ti' i’vyo mwayombile. 32 Solagi madale ginywe ga ng’ombe, nkolo na mbu’li ki’ti' i’vyo mwayombile. Muye mukandombele nanne lu’v’ango."

33 Nav’o V’amisili v’av’angu’hyaga V’aizilaeli ki’gele v’awu’ke wangu' na ku’yi’leka nsi' yav’o. V’ayombaga, "Nhanayene ku’ku’fwa v’ose!" 34 Hohene V’aizilaeli v’asolaga wu’fuma wav’o wa wu’kanywe, u’wo wu’kaali' ku’ti’ti’lwa itumbyo, v’awu’tu’u’laga mu mabakuli gav’o ga ku’kanyi’la, v’agatungaga mu myenda zyav’o, na ku’gasomba mu mav’ega gav’o. 35 V’aizilaeli v’asangwa v’av’ezyaga ki’ti' i’vyo Mose wakav’awi’laga: V’av’alombaga V’amisili vintu' vya mupango i’vyo viv’eziv’ilwe ku' mawe ga feza na zahabu, haki’mo na vizwalo. 36 Nawe Gu’ku' Mulungu wasangwa wav’av’ezyaga V’amisili ku’v’a na moyo gwa wu’hegela ku' V’aizilaeli, nav’o V’amisili v’av’apaga ki’la ki’ntu' i’cho ndi' v’alombaga. I’vi hu' vyene V’aizilaeli v’asampaga nsawo zya V’amisili.

V’aizilaeli v’ali’wu’ka ku' Misili

37 V’aizilaeli v’awu’kaga na v’ayu’mbaga ku’fuma ku' kaya ya Lamesesi, v’ayaga mpaka ku' kaya ya Sukoti. Lu’v’alo lwav’o v’av’age v’afikile v’agosya ki’ti' laki mukaga, ku’leka v’aki’ma av’o v’av’age nav’o haki’mo na v’ana. 38 Hangi' kwav’age na v’antu' v’angi' av’o ndi' v’ilonda nav’o, haki’mo na madale mahanya ga mitugo mingi, ng’ombe, nkolo na mbu’li. 39 Haho v’av’ezyaga migate i’zyo zikatumba, ku' wu’fuma wa wu’kanywe u’wo v’awu’fumizye ku' Misili. Wu’fuma wenu’wo ndi' v’akawu’tu’u’li’lile itumbyo, ku’nguno v’afumiv’agwa ku' Misili wangu' wangu' na ku’gaiwa itungo lya kwiv’anga ki’liwa chav’o.

40 Wikalo wa V’aizilaeli ku' Misili, v’ikalaga itungo lya myaka magana ane na maku’mi adatu'. 41 Yav’aga lu’siku' lwa ku' mpelo lwa myaka zyeni’zyo magana ane na maku’mi adatu', lu’siku' lwene lu’lo v’antu' v’amwa Gu’ku' Mulungu ku' madale gav’o gose v’aku’fumaga ku' nsi' ya Misili. 42 Wu’ziku' wenu’wo Gu’ku' Mulungu wav’alindi’li’zya V’aizilaeli ki’gele av’afumye mu nsi' ya Misili. Wenu’wo wu’li' wu’ziku' wa ku’keyu’la na kwizu’ki’la ku' V’aizilaeli v’ose mugati' na wu’v’yalwa wav’o, ku’nguno Gu’ku' Mulungu ndi' wav’alindi’li’zya.

43 Gu’ku' Mulungu wamuwi’laga Mose na Aloni ati', "I’yi' hu' nhama ya ki’lyi’le cha Pasaka. Muntu' mugeni ku’du' ize alye kadi’lana ka Pasaka. 44 Sumbwa mukumba u’yo wagu’lilwe na muntu' ku' hela, u’lu' waputwa nyu’nzu', haho alazumi’ziwe ku’lya kadi’lana ka Pasaka. 45 Ali’vi muv’i’tayi’la na mutu’mami, akasye azumi’ziwe ku’lya kadi’lana ka Pasaka. 46 Kadi’lana ka Pasaka kalaliwe mu nnumba yi’mo. Ku’du' mwize mufumye nyama ninga yi’mo ha ibala na nnumba yeni’yo, ninga ku’du' mwize muv’ele iguha ninga li’mo. 47 V’aizilaeli v’ose yi’li’v’adima ku’v’ezya mwanya gwenu’go. 48 Mugeni mwizi’li’zi u’yo alav’e ikalile mugati' na inywe, u’lu' watogwa ku’muv’ezezya Gu’ku' Mulungu Mwanya gwa Pasaka, yi’lamudime ku’v’a av’e av’aputile nyu’nzu' v’agosya v’ose v’a mu nnumba yakwe, haho alazumi’ziwe ku’yi’lya ki’ti' muv’anda. Mugosya u’yo akaputwa nyu’nzu' akazumi’ziwa ku’yi’lya. 49 Yeni’yi' yi’ku’v’a nzi’la ya nhana ku' ki’la muv’anda, haki’mo na mugeni mwizi’li’zi u’yo ikalile mugati' na inywe." 50 I’vi hu' vyene V’aizilaeli v’ose v’adimaga ilagi’li’zyo ki’ti' i’vyo Gu’ku' Mulungu wav’awi’lile Mose na Aloni. 51 Lu’siku' lwene lu’lo Gu’ku' Mulungu wav’afumyaga V’aizilaeli ku' nsi' ya Misili ku' madale gav’o.