1 Nawe Lahele aho wawonaga ku'v'a akav'ile ku'muv'yali'la Yakobo v'ana, haho walamulaga ku'muwonela iwu'v'a muku'lu'ye Leya. Hohene wamuwi'laga Yakobo, "U'mpe v'ana, u'lu' yi'kav'e vyeni'vyo, ene nku'fwa!" 2 Ali'vi Yakobo wamudaki'laga muno Lahele na ku'muwi'la ati', "I'vi, ene wambezyaga hu' Mulungu u'yo waku'tungile wu'v'yazi ki'gele u'leke ku'v'yala v'ana?" 3 Nawe Lahele wasu'v'yaga ati', "Henanha ali'ho muzya wanne Biliha, nu'ku'lomba u'lale nawe ki'gele ambyali'le v'ana. Ku'v'i'ti'la ku' wakwe nanne mpandi'ke v'ana!"

4 Hu' i'vyo Lahele wamupaga Yakobo muzya wakwe, Biliha, av'e isuli'la wakwe. Nawe Yakobo walalaga nawe. 5 Haho Biliha wav'aga na mwitungo, na wamuv'yali'laga Yakobo mwana wa ki'gosya. 6 Hohene Lahele wayombaga ati', "Mulungu wigagwa ku'lomba kwanne, wambezezyaga lole, na ku'mpa mwana wa ki'gosya." Ku'nguno yeni'yo wamupaga lina mwana mwenu'yo Dani*. 7 Biliha, muzya wamwa Lahele, hangi' wav'aga na mwitungo na ku'muv'yali'la Yakobo mwana wa wu'v'i'li' wa ki'gosya. 8 Haho Lahele wayombaga ati', "Nali' ni'na wikinde wu'hanya na muku'lu' wanne, nanne nakindaga!" Ku'nguno yeni'yo wamupaga lina mwana mwenu'yo Nafutali*.

9 Yav'aga aho Leya wawonaga ku'v'a walekaga ku'v'yala, haho wamusolaga muzya wakwe Zilipa na ku'mupa Yakobo av'e isuli'la wakwe. 10 Nawe Zilipa wamuv'yali'laga Yakobo mwana wa ki'gosya. 11 Hohene Leya wayombaga ati', "Kwenu'ku' kwelu'ki'lwa!" Ku'nguno yeni'yo wamupaga lina mwana mwenu'yo Gadi*. 12 Zilipa, muzya wamwa Leya, wamuv'yali'laga hangi' Yakobo mwana yu'ngi' wa ki'gosya. 13 Haho Leya wayombaga ati', "Ni'na hambu' ene! Ninga v'aki'ma v'ichane v'aku'nitana mwelu'ki'lwa." Ku'nguno yeni'yo wamupaga lina mwana mwenu'yo Asheli*.

14 Yav'age ha itungo lya lyi'mbu'la lya ngano, lu'siku' lu'mo Lubeni wayaga ku' mugu'nda, na kwenu'ko wawonaga mimelo zya ntalantu', wazisolaga na ku'muletela nnina Leya. Haho Lahele wamuwi'laga Leya ati', "Nu'lomba nanne mimelo zya ntalantu' i'zyo waletaga mwano." 15 Ali'vi Leya wasu'v'yaga ati', "U'li'wiganika ati' igambo ido ku'mpuzya mugosi wanne? Hangi' u'li'koov'a ku'sola na mimelo zya ntalantu' zya mwana wanne?" Sumbwa Lahele wayombaga ati', "Endita! U'lu' u'ku'mpa ntalantu' zya mwano, walelo Yakobo akwiza ku'lala nanho."

16 Yav'aga mu lyu'v'a lya mpi'ndi', aho Yakobo wav'age asu'v'ile ku'fuma ku' mugu'nda, Leya wayaga ku'kamusu'mbi'la na ku'muwi'la, "Yi'li'ku'dima walelo u'lale nanne. Naku'pandi'kaga ku' ndi'pi ya ntalantu' zya mwana wanne." Hohene Yakobo walalaga nawe wu'ziku' wenu'wo.

17 Mulungu wigagwa ku'lomba kwamwa Leya. Nawe Leya wav'aga na mwitungo, na ku'muv'yali'la Yakobo mwana wa ki'gosya wa wu'tano. 18 Hangi' Leya wayombaga ati', "Mulungu wansu'v'i'zyaga ndi'pi yanne ku'nguno nali' namupile muzya wanne mugosi wanne!" Ku'nguno yeni'yo wamupaga lina mwana mwenu'yo Isakali*. 19 Hangi' Leya wav'aga na mwitungo na ku'muv'yali'la mwana wa ki'gosya wa mukaga. 20 Haho Leya wayombaga ati', "Mulungu wampaga lu'holo lu'soga muno. Gi'si' mugosi wanne nanne aku'mpa isima, ku'nguno namuv'yali'laga v'ana v'a ki'gosya mukaga." Ku'nguno yeni'yo wamupaga lina mwana mwenu'yo Sebuloni*. 21 Aho lyav'i'taga itungo wav'yalaga mwana wa ki'ki'ma, wamwitanaga lina lyakwe Dina.

22 Hangi' Mulungu wamulawaga Lahele, wazumyaga ku'lomba kwakwe, na wamutungu'laga wu'v'yazi wakwe. 23 Haho Lahele wav'aga na mwitungo na wav'yalaga mwana wa ki'gosya na ku'yomba, "Gi'si' Mulungu wansini'zyaga nsoni zyanne!" 24 Haho wamupaga lina mwana mwenu'yo Yosefu* na ku'yomba, "Gu'ku' Mulungu anongezezye mwana yu'ngi' wa ki'gosya."

25 Aho Lahele wamuv'yalaga Yosefu, Yakobo wamuwi'laga Labani ati', "Ndeku'li'le nsu'v'e ku' lu'go ku' nsi' yiswe. 26 U'mpe v'aki' v'anne na v'ana v'anne av'o nav'apandi'kile ku' wu'tu'mami wanne ku' wako, ki'gele mbu'ke nav'o. Ku'nguno u'manyile i'vi naku'tu'mami'lile visoga." 27 Ali'vi Labani wasu'v'yaga ati', "Hani leka nanne njombe. Nu'ku'lomba wikale du' henanha! Ku'nguno nalagu'lile na ku'manya ku'v'a Gu'ku' Mulungu wandosizye ku'nguno yako. 28 Yomba ndi'pi i'yo u'li'koov'a nanne nku'ku'li'pa." 29 Nawe Yakobo wayombaga ati', "Ev'e mweni'ki'li' u'manyile i'vi naku'tu'mami'lile na i'vi nali' nu'zidi'ma mitugo zyako, na i'vyo zyav'age ku' wanne. 30 Itungo i'lo nav'age nkaali' kwiza ha wako, wav'age na mitugo midoo du'hu', sumbwa ku'fuma aho nizile ha wako, Gu'ku' Mulungu waku'dosizye ku' ki'la aho nav'i'tage. Ali'vi gi'si' ene nditu'mami'le nanali' na kwiv'ezezya magambo ga nnumba yanne?"

31 Labani wamuwu'zyaga ati', "Yomba u'li'koov'a nku'pe ki'?" Nawe Yakobo wasu'v'yaga ati', "Ku'du' u'mpe ki'ntu'. Ali'vi u'lu' u'li'koov'a nku'di'mi'lage u'zumye i'cho nku'ku'wi'la, hu' nanne nku'zumya hangi' ku'di'ma na kwangali'la mitugo zyako. 32 Ndeke walelo ningi'le mu ki'la idale, na ku'koma ki'la nkolo zya mabadomabado na zya mav'alamav'ala na ki'la nkolo nnilawu'zu na mbu'li zya mabado na zya mav'alamav'ala. Zyeni'zi hu' ziku'v'a wu'tenensya wanne. 33 Ha nsiku' zya mbele, aho u'lize ku'wu'lola wu'tenensya wanne ku'fuma ku' wako hu' aho lole yanne yi'ligele. Ki'la mbu'li na ki'la nkolo i'yo yi'lav'e yi'gele mabadomabado na mav'alamav'ala na nkolo i'yo yi'kav'ile nnilawu'zu yi'lav'aziwe ku'v'a nakwiv'i'laga." 34 Nawe Labani wayombaga, "Visoga, nazumyaga na yi'v'e ki'ti' i'vyo wayombaga."

35 Yav'aga lu'siku' lwene lu'lo, Labani wayaga ku'kazikoma ngulati' zyose zya machelule na mabado, na mbu'li zyose nki'ma i'zyo zyav'age na mav'alamav'ala na mabadomabado. Wazikomaga mbu'li zyose i'zyo zyav'age na wape mu muv'i'li' gwazyo, na nkolo i'zyo zyav'age na wilawu'zu mu miv'i'li' zyazyo. Zyose zyeni'zi wazitu'u'laga mu wu'su'ngi wa v'aane. 36 Haho Labani haki'mo na v'aane v'awu'kaga henanho na mitugo zyeni'zyo, na v'ayu'mbaga musi'nzo gwa nsiku' idatu', v'ikomaga ku'le na Yakobo. Nawe Yakobo wasigalaga ali'di'ma mitugo zyamwa Labani i'zyo zyasigali'lile.

37 Hohene Yakobo wasolaga ngito ntoto zya mulubuna, mulozi na mwalamoni. Waziku'v'aga magu'la, ki'gele gigele machelule gape mu ngito zyeni'zyo. 38 Haho Yakobo wazisolaga ngito zyeni'zyo, na ku'zikimi'ka ha mapango ga ku'nywisi'zya mitugo, aho zili'wizaga ku'nywa minzi'. Mitugo aho zizaga ku'nywa minzi' henanho ziliinaga na ku'suki'la. 39 Yav'aga ndimu i'zyo zyasuki'laga ha mbele ya ngito zyeni'zyo, zyawu'taga mitugo zya machelule, mabado na mav'alamav'ala. 40 Nawe Yakobo wagakomaga genago manyehe ga mitugo, na wagalingi'ki'zyaga ku' mitugo zya machelule na zya wilawu'zu ku' idale lyamwa Labani. Ku' nzi'la yeni'yi' Yakobo wazilekaniaga mitugo zyakwe na zyamwa Labani nawe akazisangizye. 41 Yav'aga ha itungo lya ku'liinwa mitugo migi'nu, hohene Yakobo wazikimi'kaga i'zyo ngito ha mapango ga ku'nywisi'zya ha mbele na mitugo, ki'gele zisuki'le ha mbele na ngito zyeni'zyo. 42 Ali'vi akazikimi'kile ngito zyeni'zyo ha itungo lya ku'liinwa mitugo zya wu'gande. Ku'nguno yeni'yo Labani wav'aga na mitugo zya wu'gande, na Yakobo wav'aga na mitugo zya nguzu.

43 Mpeleleko yakwe, Yakobo wadamalu'kaga muno. Wav'aga na madale mahanya ga nkolo na mbu'li nyingi, mpunda na ntwangawu'lende, haki'mo na v'akumba v'a ki'gosya na v'a ki'ki'ma.